पीक विम्याच्या रकमेवर डल्ला! तासगावच्या जिल्हा बँक शाखेत बनावट सहीने अडीच लाख लंपास

तासगावमधील कवठेएकंद येथील जिल्हा मध्यवर्ती बँकेच्या शाखेत शेतकरी खातेदाराच्या नावात फेरफार करून लाखो रुपये दुसऱ्याच्या खात्यावर ट्रान्स्फर केले.

• तासगावच्या जिल्हा बँक शाखेत चाललंय तरी काय?
• शेतकरी खातेदाराच्या नावे जमा झालेल्या पीक विम्याचे पैसे दुसऱ्या व्यक्तीच्या खात्यात ट्रान्स्फर
• बनावट सहीच्या आधारे अडीच लाख लंपास

कवठेएकंद (ता. तासगाव) येथील जिल्हा मध्यवर्ती बँकेच्या शाखेत शेतकरी खातेदाराच्या नावे जमा झालेल्या पीक विम्याच्या रकमेचा परस्पर अपहार केल्याचा धक्कादायक प्रकार उघडकीस आला आहे. तत्कालीन कॅशियरने खातेदाराच्या नावात बदल करून दुसऱ्याच्या खात्यावर रक्कम वर्ग केली आणि बनावट सहीच्या आधारे ती रक्कम रोख स्वरूपात काढून घेतल्याचे तपासात निष्पन्न झाले आहे. या प्रकरणी तासगाव पोलिस ठाण्यात संबंधित कॅशियरविरोधात गुन्हा दाखल करण्यात आला आहे.

याबाबत बँकेचे अधिकारी प्रवीण अजू कोळी (रा. माहेश्वरी हॉलजवळ, विश्रामबाग, सांगली) यांनी फिर्याद दिली आहे. राहुल विलास वास्कर (रा. सांगली) असे गुन्हा दाखल झालेल्या तत्कालीन कॅशियर-कम-एजंटाचे नाव आहे. हा प्रकार दि. ६ ते ८ नोव्हेंबर २०१९ दरम्यान घडल्याचे प्राथमिक तपासात समोर आले असून बँकेच्या अंतर्गत तपासणीत हा अपहार उघडकीस आला.

Chiplun News: राहुल गांधींच्या ‘चाय पार्टी’विरोधात भाजप आक्रमक; संसदेच्या अवमानाचा आरोप करत जोरदार निदर्शने

पोलिसांकडून मिळालेल्या माहितीनुसार, संबंधित आरोपी त्या काळात कवठेएकंद येथील शाखेत कॅशियर व एजंट म्हणून कार्यरत होता. शासनाच्या वतीने २०१२-२०१३ या कालावधीत एका शेतकरी खातेदाराच्या खात्यावर पीक विम्याची रक्कम जमा झाली होती. मात्र आरोपीने आपल्या पदाचा गैरवापर करत संबंधित खात्याच्या नावात फेरफार करून त्या खात्याला संदीप यशवंत गुरव असे नाव दिले. त्यानंतर त्या खात्यातील २ लाख ५८ हजार २१७ रुपये ही रक्कम संदीप गुरव यांच्या सेव्हिंग खात्यावर ट्रान्स्फर करण्यात आली.

त्यानंतर बँकेची बनावट स्लिप तयार करून त्यावर संदीप गुरव यांच्या नावाने बनावट सही करण्यात आली. या बनावट कागदपत्रांच्या आधारे संबंधित रक्कम रोख स्वरूपात काढून घेत आरोपीने तिचा अपहार केल्याचे फिर्यादीत नमूद करण्यात आले आहे.

Jat Patrakar Bhavan: जतमध्ये ‘पत्रकार भवना’चे थाटात भूमिपूजन; बांधकामासाठी निधीची कमतरता पडू देणार नाही – आ. गोपीचंद पडळकर

दरम्यान, बँकेच्या तपासणीत ही गंभीर आर्थिक अनियमितता समोर आल्यानंतर प्रकरण पोलिसांत दाखल करण्यात आले. या घटनेमुळे बँकेच्या व्यवहारांबाबत प्रश्नचिन्ह निर्माण झाले असून पोलिसांकडून पुढील तपास सुरू आहे.