Ashadhi Wari 2025: दिवे घाटातील पालखी सोहळ्याबाबत अजित पवारांनी घेतला ‘हा’ मोठा निर्णय

दरम्यान रस्त्याचे रुंदीकरण करण्यासाठी संपूर्ण घाटातील डोंगर कित्येक मीटर उंच फोडावा लागला आहे. घाटात डोंगराची उंची अनेक मीटर उंच असून डोंगर फोडल्याने डोंगरातील वर्षानुवर्षे चिकटून बसलेले दगड पूर्णपणे मोकळे झाले आहेत. अनेक ठिकाणी डोंगर निसरडा झाला असून सध्या सतत पाऊसही पडत असल्याने त्याठिकाणी गेल्यास अपघात होण्याची शक्यता नाकारता येत नाही. घाटाचे काम पूर्ण होण्यास आणखी काही महिन्यांचा कालावधी लागणार असून काम पूर्ण झाल्यानंतर डोंगराच्या बाजूने पूर्णपणे संरक्षण भिंत तसेच ज्या ठिकाणी डोंगराची उंची जास्त आहे अशा ठिकाणी जाळी बसवावी लागणार आहे.

क्षेत्र आळंदी येथून संत ज्ञानेश्वर महाराज पालखी सोहळ्याचे प्रस्थान सुरु झाल्यानंतर मुक्कामाचा सर्वात मोठा टप्पा म्हणजे हडपसर ते सासवड असा आहे. या प्रवासातील ऐतिहासिक दिवे घाटातील सोहळा एक अलौकिक दृश्य असतो. नागमोडी घाटातील वळणे घेत चाललेला सोहळा, घाटातील हिरवी वनराई, घाटाच्या पायथ्याशी असलेला ऐतिहासिक मस्तानी तलाव, लाखी वारकऱ्यांची गर्दी याची देही याची डोळा पाहण्यासाठी घाटातील डोंगरावर हजारो भाविक आतुर झालेले असतात. अनेक फोटोग्राफर, पत्रकार, छायाचित्रकार नयनरम्य सोहळा आपल्या कॅमेऱ्यात टिपण्यासाठी पुरंदरसह पुणे, मुंबई आणि राज्याच्या विविध भागातून दरवर्षी येत असतात. घाटातील दृश्य टिपण्यासाठी फोटोग्राफर यांची मोठी धावपळ सुरु असते.

विशेष म्हणजे कित्येक वर्षानंतर  यंदा प्रथमच घाटाच्या पायथ्याशी असलेला मस्तानी तलाव पाण्याने भरला असून घाटात ठिकठिकाणी पाण्याचे धबधबे वाहत आहेत. मात्र शासनाने घेतलेल्या निर्णयामुळे यंदा हजारो भाविक, पत्रकार, फोटोग्राफर हौशी छायाचित्रकार यांचा आनंदावर विरजण पडणार असून दरवर्षी प्रमाणे घाटातील विहंगम दृश्य पाहता येणार नाही. त्याच वेळी पोलिस प्रशासनाची होणारी धावपळ मोठ्या प्रमाणात थांबणार आहे. मात्र त्याबाबत योग्य नियोजन करावे लागणार असून नियोजन न झाल्यास प्रशासनाला गर्दीवर नियंत्रण ठेवण्यासाठी वेळ प्रसंगी कायद्याचा वापर करण्याची गरज भासू शकते.