बारामतीच्या ईव्हीएम कोरेगाव पार्क’च्या स्ट्रॉग रूममध्ये जमा; परिसरात कडेकोट बंदोबस्त

बारामती लोकसभा मतदारसंघातील उमेदवारांचे भवितव्य बंद असलेल्या ईव्हीएम कोरेगाव पार्क येथील धान्य गोदाम जमा करण्यात आल्या आहेत. येथे स्ट्रॉग रूम तयार करण्यात आली आहे.

पुणे : बारामती लोकसभा मतदारसंघातील उमेदवारांचे भवितव्य बंद असलेल्या ईव्हीएम कोरेगाव पार्क येथील धान्य गोदाम जमा करण्यात आल्या आहेत. येथे स्ट्रॉग रूम तयार करण्यात आली आहे. तब्बल २९ दिवसांनी म्हणजे (दि.४) जून २०२४ रोजी मतमोजणी होणार असल्याने ईव्हीएम सुरक्षेची मोठी जबाबदारी प्रशासनावर आहे. या ठिकाणी सीसीटीव्ही बसविण्यात आले. कोरेगाव पार्क येथील गोदामाला छावणीचे स्वरुप आले असून, याठिकाणी सीआरपीएफचे जवान आणि पोलीस बंदोबस्त तैनात आहेत.

बारामती लोकसभा मतदारसंघात एकूण २ हजार ५१६ मतदान केंद्र होती. मतदान केंद्र ते मतदारसंघाचे मुख्य ठिकाण यामध्ये बरेच अंतर तसेच मतदानाची प्रक्रिया सहा वाजता संपली असली, तरी ईव्हीएम मशीन सिल करणे, विविध अहवाल तयार करणे आदी कामकाजांसाठी वेळ लागतो. ही प्रक्रिया पूर्ण झाल्यानंतरच मतदान केंद्रावरील अधिकारी-कर्मचारी ईव्हीएम मशीन पोलीस बंदोबस्तात नेमून दिलेल्या बसेसनी विधानसभेच्या मुख्य ठिकाणी जमा केल्या. त्यानंतर एकत्रित केलेल्या ईव्हीएम बंदोबस्तात कोरेगाव पार्क येथील गोदामात जमा करण्यात आल्या.

ईव्हीएमची वाहतूक करणाऱ्या वाहनांना जीपीएस यंत्रणा बसविण्यात आलेली आहे. कोरेगाव पार्क येथील गोदामात निवडणूक निरीक्षकांच्या देखरेखेखाली आणि राजकीय पक्ष प्रतिनिधींच्या उपस्थितीत या रूम बुधवारी सील करण्यात आल्या.