डिझेल चोरणारी टोळी जेरबंद; १७ लाखांचा मुद्देमाल जप्त

जुन्नर व आंबेगाव तालुक्यात डिझेल चोरणाऱ्या टोळीस आळेफाटा पोलीसांनी जेरबंद केले. त्यांच्याकडून १७ लाख ५२ हजार ४११ रूपयांचा मुद्देमाल जप्त केला.

पुणे : जुन्नर (Junnar) व आंबेगाव (Ambegaon) तालुक्यात डिझेल चोरणाऱ्या टोळीस आळेफाटा पोलीसांनी (Police) जेरबंद केले. त्यांच्याकडून १७ लाख ५२ हजार ४११ रूपयांचा मुद्देमाल जप्त केला. पोलिसांनी कुणाल रोहीदास बोंबले, ओमकार काळुराम देवकर, राहुल संजय हिंगे ( सर्व रा. राजगुरूनगर ता. खेड जि. पुणे), यांना ताब्यात घेत गुन्हा दाखल केला आहे.

आळेफाटा पोलीसांनी दिलेल्या माहितीनुसार, आळेफाटा पोलीस ठाण्यात रूपेश ज्ञानेश्वर वाळुंज (वय ३० व्यवसाय ट्रान्सपोर्ट रा. वडगांव आनंद) यांनी ८ एप्रिल रोजी फिर्याद दिली की, ३ एप्रिल रात्री १ वाजण्याच्या सुमारास आळेफाटा या ठिकाणी असलेल्या भोसले पेट्रोल पंपाच्या समोर स्वताच्या मालकीचा हायवाचे (ट्रक नं. एम.एच.४०, सीडी, ५०३८) अज्ञात चोरट्‌याने टाकीचे झाकण तोडुन टाकीमध्ये असणारे ६० लिटर डिझेल, तसेच योगेश मुरलीधर पाडेकर व सुदर्शन संजय जाधव यांचेसुध्दा बायपास ब्रीजचे जवळ लावलेल्या गाडयांमधुन डिझेल चोरीला गेल्याची तक्रार दाखल केली होती.

त्यानुसार तपासादरम्यान दाखल गुन्ह्याचे विश्लेषण करीत असतांना गोपनिय बातमीदारामार्फत माहीती मिळाली की कुणाल रोहीदास बोंबले, ओमकार काळुराम देवकर, राहुल संजय हिंगे ( सर्व रा. राजगुरूनगर ता. खेड जि. पुणे) हे डिझेल चोरीचे गुन्हे करतात. त्यांनीच हा गुन्हा केल्याची माहिती मिळाली. पोलिसांनी राजगुरूनगर (ता. खेड) येथे जाऊन संशयित आरोपींचा घेतला. त्यांच्याकडे कसुन चौकशी केली असता त्यांनी आळेफाटा येथे डिझेल संदर्भाने गुन्हा केला असल्याची कबुली दिली. त्यानंतर आरोपींना ताब्यात घेतले.

५७५ लिटर डिझेल जप्त

चौकशीदरम्यान, त्यांनी आळेफाटा पोलीस स्टेशनचे हद्दीत डिझेल चोरल्याचे कबुल केले. तसेच त्यांच्यावर मंचर व पारगाव कारखाना पोलीस स्टेशनमध्ये देखील गुन्हे दाखल आहेत. त्यांच्याकडुन ५७५ लिटर डिझेल वाकळवाडी (ता. खेड) येथील रुममधुन जप्त केले. तसेच गुन्ह्यात वापरलेली इनोव्हा व इर्टीगा कार सुध्दा जप्त करण्यात आली आहे. तर ४ गुन्हे उाडकीस आले असून एकुण १७,५२,४११ रूपये किंमतीचा मुद्देमाल जप्त करण्यात आला आहे.

ही कारवाई पुणे ग्रामीणचे पोलिस अधिक्षक पंकज देशमुख, अप्पर पोलीस अधिक्षक रमेश चोपडे, उपविभागीय पोलीस अधिकारी रविंद्र चौधर यांच्या मार्गदर्शनाखाली पोलीस निरीक्षक सतीश होडगर यांनी दिलेल्या सुचनांप्रमाणे सहायक पोलीस निरीक्षक सुनिल बडगुजर, सहायक पोलीस उपनिरीक्षक चंद्रा डुंबरे, पोलीस हवालदार विनोद गायकवाड, पोलीस हवालदार भिमा लोंढे यांनी केली आहे.