सातारा जिल्हा परिषदेत राडा; सत्ताधारी-विरोधक आमनेसामने, गोंधळात सभा गुंडाळली

विशेष सर्वसाधारण सभेत सुरुवातीला सर्व काही सुरळीत असल्याचा आभास होता. विविध समित्यांवर सदस्यांची निवड एकमताने जाहीर होताच ‘महायुती’तील समन्वयाचे चित्र रंगवले गेले.

सातारा : सातारा जिल्हा परिषदेत महायुतीतील एकीचा दावा प्रत्यक्षात किती पोकळ आहे, याचा प्रत्यय शुक्रवारी आलेल्या गोंधळातून आला. विषय समित्यांची निवड बिनविरोध पार पडूनही, सभागृहात मात्र सत्ताधारी आणि विरोधक आमनेसामने भिडले. अखेर वाढत्या वादाच्या पार्श्वभूमीवर सभा अचानक गुंडाळावी लागल्याने सत्ताधाऱ्यांची कोंडी झाल्याचे चित्र दिसले.

विशेष सर्वसाधारण सभेत सुरुवातीला सर्व काही सुरळीत असल्याचा आभास होता. विविध समित्यांवर सदस्यांची निवड एकमताने जाहीर होताच ‘महायुती’तील समन्वयाचे चित्र रंगवले गेले. मात्र, पुढील चर्चेतच हा समन्वय कागदोपत्रीच असल्याचे स्पष्ट झाले. चर्चेदरम्यान विरोधकांकडून पारदर्शकतेचा मुद्दा पुढे येताच वातावरण तापू लागले. काही सदस्यांनी अध्यक्ष निवडीच्या प्रक्रियेवर अप्रत्यक्ष प्रश्न उपस्थित करताच सत्ताधारी सदस्य आक्रमक झाले. “ठरलेल्या विषयापुरतेच बोला” असा इशारा देण्यात आला; मात्र त्यामुळे वाद शमण्याऐवजी अधिकच वाढला.

सभागृहात आरोप-प्रत्यारोप सुरू असतानाच काही सदस्यांमध्ये थेट शब्दिक चकमक झाली. विरोधकांनी आपला आवाज दडपण्याचा प्रयत्न होत असल्याचा आरोप करताच घोषणाबाजीला सुरुवात झाली. यामुळे सभेचे कामकाज पूर्णपणे ठप्प झाले. परिस्थिती नियंत्रणाबाहेर जात असल्याचे लक्षात येताच अध्यक्षस्थानाकडून अचानक सभा समाप्ती जाहीर करण्यात आली. या निर्णयावर विरोधकांनी तीव्र नाराजी व्यक्त करत ‘लोकशाही पद्धतीला धक्का’ असल्याचे सांगितले.

सभा संपल्यानंतर सत्ताधारी गट सभागृहाबाहेर पडला; मात्र विरोधकांनी जागा न सोडता तिथेच ठिय्या देत आपली भूमिका मांडली. “विरोधी मतांना संधीच दिली जात नाही,” असा आरोप करत त्यांनी सत्ताधाऱ्यांवर जोरदार टीका केली.

राजकीय अर्थ; समन्वयाचा अभाव ठळक

या संपूर्ण प्रकारामुळे महायुतीतील अंतर्गत विसंवाद पुन्हा एकदा अधोरेखित झाला आहे. वरकरणी एकमत दाखवले जात असले, तरी प्रत्यक्षात निर्णयप्रक्रियेत मतभेद कायम असल्याचे स्पष्ट झाले. जिल्हा परिषदेत पुढील काळात अशाच संघर्षमय बैठका होण्याची शक्यता नाकारता येत नाही.

Satara Zilla Parishad : सातारा जिल्हा परिषद सभेकडे सर्वांच्याच नजरा; सभा शांततेत होणार की वादळी होणार?