अहिल्यानगरच्या कर्जतमध्ये पर्यावरणपूरक उपक्रम; आईच्या नावाने लावली ७० झाडे
पर्यावरणाचा समतोल- राखण्यासोबतच येत्या काळात प्रवाशांना सावली मिळावी आणि शहराचे सौंदर्य वाढावे, या दुहेरी उद्देशाने हा उपक्रम राबवण्यात आला आहे. शहराच्या मुख्य रस्त्याच्या दुतर्फा पिंपळ, करंजी, चिंच आणि वड यांसारख्या दीर्घायुषी व सावली देणाऱ्या देशी वृक्षांची लागवड करण्यात आली आहे.
अनेकदा वृक्षारोपण केल्यानंतर झाडांकडे दुर्लक्ष होते. मात्र, सचिन पोटरे आणि त्यांच्या सहकाऱ्यांनी गेल्या वर्षभरापासून या सर्व ७० झाडांना नियमित पाणी देणे, खते घालणे आणि त्यांच्या संरक्षणाची योग्य ती खबरदारी घेतली आहे. त्यामुळे आज ही झाडे उत्तम प्रकारे जगली असून ती वाढू लागली आहेत. पंतप्रधानांच्या संकल्पनेतून प्रेरणा घेऊन शहराला हिरवेगार बनवण्याचा हा प्रयत्न स्थानिक नागरिकांच्या कौतुकास पात्र ठरत आहे.
”पंतप्रधान नरेंद्र मोदी यांनी ‘एक झाड आईच्या नावाने’ हे अभियान सुरू करून पर्यावरणाशी नातं जोडण्याचा संदेश दिला. या अभियानाला प्रतिसाद म्हणून आम्ही कर्जत शहरात नेत्यांच्या आईच्या नावाने ७० झाडे लावली. गेल्या वर्षभरापासून आम्ही या झाडांचे नियमित संगोपन करत आहोत. मुख्य रस्त्यावरून जाणाऱ्या प्रवाशांना आगामी काळात या झाडांची उत्तम सावली मिळेल आणि शहराच्या सौंदर्यातही भर पडेल असं सचिन पोटरे, जिल्हा उपाध्यक्ष, भाजप यांनी सांगितलं.
‘एक झाड आईच्या नावाने’ हा उपक्रम पंतप्रधान नरेंद्र मोदी यांनी ५ जून २०२४ रोजी जागतिक पर्यावरण दिनानिमित्त सुरू केला. पर्यावरण संवर्धनाला चालना देतानाच प्रत्येकाने आपल्या आईप्रती कृतज्ञता व्यक्त करण्यासाठी तिच्या नावाने किमान एक झाड लावावे, असा संदेश या मोहिमेतून देण्यात आला.
या उपक्रमामागे दोन महत्त्वाचे उद्देश आहेत. एक म्हणजे वाढत्या हवामान बदलाच्या पार्श्वभूमीवर मोठ्या प्रमाणात वृक्षारोपण करून पर्यावरणाचे संरक्षण करणे आणि दुसरे म्हणजे आईबद्दलचा आदर, प्रेम आणि कृतज्ञता कृतीतून व्यक्त करणे.
पंतप्रधान मोदी यांनी देशातील नागरिक, विद्यार्थी, स्वयंसेवी संस्था, सामाजिक संघटना, स्थानिक स्वराज्य संस्था आणि विविध शासकीय विभागांना या मोहिमेत सहभागी होण्याचे आवाहन केले आहे. त्यांच्या आवाहनानंतर देशभरात लाखो नागरिकांनी आपल्या आईच्या नावाने झाडे लावून त्यांचे संगोपन करण्याचा संकल्प केला.
.png "Videos"){kind=small}
