Eknath Shinde: दुष्काळग्रस्त बळीराजासाठी एकनाथ शिंदेंचे आवाहन; ‘सणांवरील खर्च कमी करा, बचतीतून शेतकऱ्यांना मदत करा’

Eknath Shinde: राज्यातील दुष्काळी परिस्थितीच्या पार्श्वभूमीवर उपमुख्यमंत्री एकनाथ शिंदे यांनी नवरात्रोत्सवासह आगामी सण साधेपणाने साजरे करण्याचे आवाहन केले आहे. उत्सवांवरील अनावश्यक खर्च टाळून बचत झालेला निधी दुष्काळग्रस्त शेतकरी आणि त्यांच्या कुटुंबीयांच्या मदतीसाठी द्यावा, असे आवाहन शिंदे यांनी केले आहे.

• नवरात्रोत्सवासह आगामी सण साधेपणाने साजरे करा
• बचत झालेला निधी दुष्काळग्रस्त शेतकऱ्यांना द्या
• उपमुख्यमंत्री एकनाथ शिंदे यांचे आवाहन

मुंबई: राज्यात निर्माण झालेल्या भीषण दुष्काळजन्य परिस्थितीच्या पार्श्वभूमीवर, आपल्या अन्नदात्याच्या पाठीशी खंबीरपणे उभे राहण्यासाठी आगामी नवरात्रोत्सव आणि इतर धार्मिक-सांस्कृतिक कार्यक्रम अत्यंत साधेपणाने साजरे करावेत, असे आवाहन उपमुख्यमंत्री एकनाथ शिंदे (Eknath Shinde) यांनी केले आहे. या उत्सवांमधून बचत झालेला निधी थेट दुष्काळग्रस्त शेतकऱ्यांना मदत म्हणून द्यावा, असेही आवाहन त्यांनी शिवसेना पदाधिकाऱ्यांना, सार्वजनिक मंडळांना आणि नागरिकांना केले आहे.

बहुतांश ठिकाणी दुष्काळाचे सावट

यंदा विदर्भ, मराठवाडा आणि राज्यातील इतर भागांत पावसाने ओढ दिल्यामुळे बहुतांश ठिकाणी दुष्काळाचे सावट पसरले आहे. निसर्गाच्या कोपामुळे उभी पिके करपून गेल्याने हजारो शेतकरी हवालदिल झाले आहेत. या बिकट परिस्थितीवर बोलताना “राज्याच्या तिजोरीवर पहिला हक्क आमच्या बळीराजाचा आहे,” या भूमिकेचा पुनरुच्चार शिंदे यांनी केला. अशा संकटकाळात महायुती सरकार आणि शिवसेना पक्ष पूर्ण ताकदीने शेतकऱ्यांच्या पाठीशी ठामपणे उभा आहे. शासकीय पातळीवर सर्वतोपरी मदतीच्या उपाययोजना सुरू आहेतच; परंतु एक समाज म्हणूनही प्रत्येकाने पुढे येऊन या परिस्थितीत योगदान देणे गरजेचे असल्याचे त्यांनी नमूद केले.

पावसामुळे शाळांच्या परिसराती बसथांबा कोसळला, मनसे आक्रमक; महापालिका आयुक्तांकडे केली ‘ही’ मागणी

शेतकरी बांधव संकटात आणि चिंतेत असताना आगामी सण-उत्सव मोठ्या थाटामाटात व धुमधडाक्यात साजरे करणे योग्य ठरणार नाही. त्यामुळे सार्वजनिक मंडळे, शिवसेनेचे सर्व पदाधिकारी, सामाजिक संस्था आणि नागरिकांनी उत्सव अगदी साधेपणाने साजरे करावेत. उत्सवांवर होणाऱ्या अवाढव्य खर्चाला फाटा देऊन वाचलेला निधी दुष्काळग्रस्त शेतकरी बांधवांच्या थेट मदतीसाठी आणि पुनर्वसनासाठी वर्ग करावा, असे ते म्हणाले.

नैसर्गिक आपत्तीवर मात

आपला अन्नदाता संकटात असताना आपण सर्वजण त्याच्या मदतीला धावून गेलो, तर या नैसर्गिक आपत्तीवर मात करणे सहज शक्य होईल. उत्सवाच्या खर्चात बचत करून जर आपण एका जरी शेतकऱ्याच्या डोळ्यांतील अश्रू पुसू शकलो आणि त्याच्या चेहऱ्यावर हास्य आणू शकलो, तर तीच आदिशक्ती जगदंबेची खरीखुरी सेवा ठरेल, असा विश्वास उपमुख्यमंत्री एकनाथ शिंदे यांनी व्यक्त केला आहे.

आता याला काय म्हणावं? जिवंत होण्याच्या आशेने मृतदेह तब्बल 4 वर्षे फ्रीजरमध्ये; दरमहा 1.60 लाखही दिले