गुरुवार, 1 ऑक्टोबर 2026
आता याला काय म्हणावं? जिवंत होण्याच्या आशेने मृतदेह तब्बल 4 वर्षे फ्रीजरमध्ये; दरमहा 1.60 लाखही दिले
मुंबई : भविष्यात कधी तरी विज्ञानाच्या मदतीने मृत व्यक्तीला पुन्हा जिवंत करता येईल, या आशेने एका कुटुंबाने 78 वर्षीय व्यक्तीचा मृतदेह 4 वर्षे फ्रीजरमध्ये जपून ठेवल्याचा धक्कादायक प्रकार मालाड परिसरात समोर आला आहे. कुरार गावात कोकणीपाडा परिसरातील एका डे-केअर सेंटरमध्ये हा मृतदेह ठेवलेला होता. परिसरात दुर्गंधी पसरल्यानंतर लोकांनी पोलिसांना माहिती दिली आणि हा प्रकार उघडकीस आला. मृतदेह जतनासाठी कुटुंबाकडून दरमहा १.६० लाख रुपये दिले जात असल्याची माहिती आहे.
संबंधित व्यक्तीचा कॅन्सरच्या आजाराने ९ जून २०२२ रोजी मृत्यू झाला होता. मृताची मुलगी अमेरिकेत राहते. वडिलांशी तिचे भावनिक नाते होते. अमेरिकेत क्रायोनिक्स तंत्रज्ञानाच्या माध्यमातून मृतदेह अतिशय कमी तापमानात जतन केला जातो. भविष्यात विज्ञानाच्या प्रगतीमुळे अशा व्यक्तीला पुन्हा जिवंत करता येईल, अशी या कुटुंबाची धारणा होती. यातूनच मृतदेह जतन करण्यासाठी कुटुंबाने मालाडमधील डे-केअर सेंटरची मदत घेतली.
अमेरिकेत तंत्रज्ञानाची नेटवर शोधली माहिती
पोलिसांनी मृताच्या मुलीची चौकशी केली असता, वडिलांच्या मृत्यूमुळे कुटुंबावर दु:खाचा डोंगर कोसळला होता. शक्य तितका काळ आम्हाला पार्थिव जतन करून ठेवायचे होते. त्यासाठी इंटरनेटवर माहिती शोधली आणि अमेरिकेतील क्रायोनिक्स तंत्रज्ञानाची माहिती मिळाली, असे तिने सांगितले.
बीएमसीचे 3 महिने आधी सेंटरला सील
मुंबई महापालिकेच्या कारभारावरही प्रश्न उपस्थित होत आहे. संबंधित डे-केअर सेंटर बीएमसीने 3 महिन्यांपूर्वी सील केले होते. तेव्हा येथे फ्रीजरमध्ये मृतदेह ठेवल्याचे अधिकाऱ्यांना कसे लक्षात आले नाही, असा प्रश्न पडला आहे.
तज्ज्ञ डॉक्टरही चक्रावून गेले
कुटुंबीयांनी पोलिसांकडे मृत्यू प्रमाणपत्र आणि बीएमसी दिलेली कागदपत्रे दिली आहेत. मृतदेहाची स्थिती तपासण्यासाठी कूपर रुग्णालयातील तज्ज्ञ डॉक्टरांची मदत घेतली जात असून, हा प्रकार पाहून डॉक्टरही चक्रावून गेले आहेत.
असा कायदा आहे काय, तपासणी सुरू
मृतदेह अशा पद्धतीने जतन करणे भारतात कायदेशीर आहे का, कागदपत्रांच्या पडताळणीनंतर या प्रकरणात पुढील कारवाई केली याचाही तपास पोलीस करत आहेत. वैद्यकीय तपासणी आणि जाणार असल्याचे सांगण्यात आले आहे.
