पेणचे माजी नगराध्यक्ष शिशिर धारकर 250 गाड्यांचा ताफा घेऊन मातोश्रीवर दाखल, शिवसेनेत केला पक्षप्रवेश, राजकीय वर्तुळात चर्चांणा उधाण

पेण अर्बन बँक घोटाळा प्रकरणातील प्रमुख आरोपी

शिशिर धारकर हे पेण अर्बन बँक घोटाळा प्रकरणात आरोपी होते. त्यांना ठाकरे गटात पक्ष प्रवेश दिला जात असल्याने अनेकांकडून आश्चर्य व्यक्त केले जात आहे. धारकर हे गेली अनेक वर्ष राजकारणापासून लांब होते. मात्र आता ते पदाधिकारी कार्यकर्त्यांसह ठाकरे गटात पक्ष प्रवेश करत आहेत.

कोण आहेत शिशिर धारकर?

शिशिर धारकर पेणचे माजी नगराध्यक्ष आहेत. धारकर हे पेण अर्बन बँक घोटाळाप्रकरणी मुख्य आरोपी होते. ५०० कोटी पेक्षा अधिक रकमेचा घोटाळा केल्याचा त्यांच्यावर आरोप आहे. पेण शहरात त्यांच्या विरोधात नागरिकांमध्ये असंतोष असल्याचं बोलले जाते. शिशिर धारकर यांनीच पैसे बुडवल्याचा आरोप स्थानिक नागरिक करीत आहेत.

गेल्या काही वर्षात धारकर राजकारणात सक्रिय नसल्याचेदेखील बोलले जात आहे. याआधीही शिशिर यांनी उद्धव ठाकरे गटात प्रवेश करण्यासाठी दोन-तीन भेटी घेतल्याची चर्चा आहे, मात्र प्रवेश होऊ शकला नव्हता. अशातच उद्धव ठाकरे यांनी शिशिर धारकर पिता-पुत्रांना पक्ष प्रवेश दिल्यामुळे त्यांना किती बळ मिळते, हे पाहणे महत्वाचे ठरणार आहे.

पेणवर भाजपचे रविंद्र पाटील स्थानिक आमदारांचे वर्चस्व

काही वर्षांपूर्वी पेण मतदारसंघावर शिशिर धारकर यांचे वर्चस्व होते मात्र सध्या भाजपचे रविंद्र पाटील स्थानिक आमदार असून पेण नगरपालिकेवर भाजपची सत्ता आहे. पेण अर्बन बँक घोटाळ्यानंतर आमदार रविंद्र पाटील यांनी आपले वर्चस्व अद्यापही कायम ठेवले आहे.

वडील काँग्रेसच्या काळात राज्यमंत्री

शिशिर धारकर यांचे वडील आप्पासाहेब धारकर हे काँग्रेसच्या काळात राज्यमंत्री होते. आप्पासाहेब धारकर १९८० ते १९८६ व १९९० ते १९९६ ह्या कालावधीत ते विधान परिषद सदस्य होते. ६ मार्च १९९३ रोजी आप्पासाहेब धारकर महाराष्ट्राचे उच्च व तंत्र शिक्षण मंत्री होते. याच काळात ते रायगडचे पालक मंत्री सुद्धा होते.