Haffkine Tender Scam : हाफकिन महामंडळात टेंडर घोटाळ्याचा आरोप; भाई जगतापांनी मुख्यमंत्र्यांकडे केली चौकशीची मागणी; सौजन्य : सोशल मीडिया
नीता परब, मुंबई
Haffkine Tender Scam : राज्य सरकारच्या अखत्यारीतील आधुनिक संशोधनासाठी अत्यंत महत्त्वाच्या समजल्या जाणाऱ्या हाफकिन बायो-फार्मा कॉर्पोरेशनमधील टेंडर प्रक्रियेत मोठ्या प्रमाणावर आर्थिक गैरव्यवहार आणि कमिशनखोरी सुरू असल्याचा गंभीर आरोप विधान परिषद सदस्य आमदार भाई जगताप यांनी केला आहे.
या प्रकरणाची वरिष्ठ सनदी अधिकाऱ्यांच्या अध्यक्षतेखाली स्वतंत्र आणि उच्चस्तरीय चौकशी करून दोषींवर कठोर कारवाई करावी, अशी मागणी त्यांनी मुख्यमंत्री देवेंद्र फडणवीस (Devendra Fadnavis) यांना पाठवलेल्या पत्राद्वारे केली आहे. तसेच, याआधी मागील अधिवेशनात दिलेल्या आश्वासनांची पूर्तता न झाल्याबद्दल त्यांनी अन्न व औषध प्रशासन मंत्री नरहरी झिरवाळ यांनाही स्वतंत्र पत्र लिहून जाब विचारणा केली आहे.
एच. के. डेटा सर्व्हिसचे मार्केटिंग मॅनेजर संतोष धांडे आणि रफिक शेख यांनी 29 ऑक्टोबर 2026 रोजी हाफकिन बायो-फार्मा कॉर्पोरेशनच्या व्यवस्थापकीय संचालकांकडे यासंदर्भात लेखी तक्रार दाखल केली होती. या तक्रारीमध्ये महामंडळाच्या मटेरियल मॅनेजमेंट विभागाचे अधिकारी उमेश वसंत पवार यांच्यावर गंभीर आरोप करण्यात आले आहेत.
ट्रान्सपोर्टेशनच्या टेंडर प्रक्रियेदरम्यान स्वतःच्या मर्जीनुसार दर निश्चित करण्यास सांगणे, टेंडरच्या रकमेवर कमिशनची मागणी करणे आणि विविध टप्प्यांत रक्कम स्वीकारल्याचे तक्रारीत नमूद करण्यात आले आहे. याशिवाय अन्य टेंडर प्रक्रियेतही आर्थिक मागणी केल्याचा आरोप असून, या व्यवहारांचे तपशील, व्हॉट्सॲप कॉल्स आणि संभाषणांचे डिजिटल पुरावे उपलब्ध असल्याचा दावा तक्रारदारांनी केला आहे.
अन्न व औषध प्रशासन मंत्री नरहरी झिरवाळ यांना पाठवलेल्या पत्रात भाई जगताप यांनी तीव्र शब्दांत नाराजी व्यक्त केली आहे. मागील विधिमंडळ अधिवेशनात हाफकिनमधील कथित आर्थिक गैरव्यवहाराच्या प्रकरणी दोषी अधिकारी व कर्मचाऱ्यांवर कठोर कारवाई करण्याचे आणि 15 दिवसांच्या आत अहवाल सादर करण्याचे आश्वासन शासनाने दिले होते. मात्र, या आश्वासनानंतर प्रत्यक्षात कोणतीही कार्यवाही झाली नसून, संबंधित दोषी अधिकारी उमेश वसंत पवार याने पुन्हा गैरव्यवहार केल्याचे उघड होत आहे.
त्यामुळे विधिमंडळाच्या सभागृहात दिलेल्या आश्वासनाची पूर्तता करत १५ दिवसांत सादर करावयाच्या कारवाई अहवालाची सद्यस्थिती तातडीने तपासावी आणि टाळाटाळ करणाऱ्या अधिकाऱ्यांची जबाबदारी निश्चित करावी, अशी मागणी त्यांनी केली आहे.
या प्रकरणात संपूर्ण प्रकरणाची वरिष्ठ सनदी अधिकाऱ्यांच्या अध्यक्षतेखाली स्वतंत्र चौकशी समिती नेमण्यात यावी, ट्रान्सपोर्टेशन टेंडरसह सर्व निविदा प्रक्रिया, दरपत्रके आणि देयकांची सखोल तपासणी व्हावी, बँक व्यवहार व व्हॉट्सॲप संभाषणांसारखे डिजिटल पुरावे सुरक्षित ठेवावेत आणि प्रथमदर्शनी भ्रष्टाचाराचे पुरावे आढळल्यास हे प्रकरण लाचलुचपत प्रतिबंधक विभागाकडे सोपवून कायदेशीर कारवाई करावी, अशा विविध मागण्या आमदार भाई जगताप यांच्याद्वारे करण्यात आल्या आहेत.
तसेच तक्रारदारांना आवश्यक संरक्षण देऊन दोषींवर निलंबनासह कठोर विभागीय व फौजदारी कारवाई करावी, अशी आग्रही भूमिकाही भाई जगताप यांनी घेतली आहे. या पत्राच्या प्रती उपमुख्यमंत्री, मुख्य सचिव, लाचलुचपत प्रतिबंधक विभागाचे महासंचालक आणि अन्न व औषध प्रशासन विभागाच्या सचिवांनाही पाठवण्यात आल्या आहेत.
हाफकीन महामंडळाचे संचालक रमेश चव्हाण यांना या प्रकरणा संदर्भात संपर्क साधला असता, त्यांनी सांगितले ह्या संपूर्ण प्रकरणाची चौकशी सुरू आहे ह्यात दोषी आढळल्यास कारवाई केली जाईल.
मंगळवारी (17 नोव्हेंबर) रोजी महाराष्ट्र राज्य कामगार विमा निगमच्या मुंबईतील कार्यालयातून लेखा अधिकारी जितेंद्र साखरकर याला लाचलुचपत विभागाने 50 हजाराची लाच घेताना अटक केल्याची घटना घडली आहे.
तर दुसरीकडे, महाराष्ट्र राज्य कामगार विमा निगमचे आयुक्त रमेश चव्हाण यांच्याकडे हाफकिन जीव औषध निर्माण महामंडळाचा देखील अतिरिक्त कार्यभार सोपवण्यात आलेला आहे. अशावेळी हाफकिन महामंडळातील सामूग्री व्यवस्थापक उमेश पवार यांच्यावर संचालक रमेश चव्हाण काय कारवाई करणार याकडे सर्वांच्या नजरा लागून राहिल्या आहेत.
Ans: टेंडर प्रक्रियेत आर्थिक गैरव्यवहार, कमिशनची मागणी आणि निविदेतील दर निश्चित करण्यासाठी दबाव आणल्याचे आरोप करण्यात आले आहेत.
Ans: विधान परिषद सदस्य आणि आमदार भाई जगताप यांनी मुख्यमंत्री देवेंद्र फडणवीस यांच्याकडे उच्चस्तरीय चौकशीची मागणी केली आहे.
Ans: हाफकिन महामंडळाच्या मटेरियल मॅनेजमेंट विभागातील अधिकारी उमेश वसंत पवार यांच्यावर तक्रारीत आरोप करण्यात आले आहेत.






