INS शिवाजीत Navy Day उत्साहात साजरा; शौर्य, परंपरा आणि आत्मनिर्भरतेचा अभिमान

आयएनएस शिवाजीत विद्यार्थ्यांसाठी विशेष शैक्षणिक कार्यक्रम राबवला गेला
डिसेंबर महिन्यात साजरा केला जातो भारतीय नौदल दिन

पुणे: भारतीय नौदलाच्या प्रमुख तांत्रिक प्रशिक्षण संस्थेने, आयएनएस शिवाजीने, २०२५ चा नौदल दिन अभिमानाने आणि देशभक्तीच्या उत्साहात साजरा केला. १९७१ च्या भारत–पाक युद्धातील ‘ऑपरेशन ट्रायडंट’मधील भारतीय नौदलाच्या ऐतिहासिक विजयाच्या स्मरणार्थ दरवर्षी ४ डिसेंबर रोजी नौदल दिन साजरा केला जातो.

कार्यक्रमाची सुरुवात युद्ध स्मारकावर झालेल्या श्रद्धांजली समारंभाने झाली. देशाच्या सागरी सीमांचे रक्षण करताना सर्वोच्च बलिदान दिलेल्या नौदल वीरांना वरिष्ठ अधिकाऱ्यांच्या हस्ते पुष्पहार अर्पण करण्यात आले. भारतीय नौदलाचा शौर्यपूर्ण वारसा आणि समुद्री मोहिमांमधील पराक्रम यांची ही स्मरणरंजक पुनरावृत्ती ठरली.

नौदल दिनानिमित्त आयोजित उपक्रमांच्या एक भाग म्हणून आयएनएस शिवाजीत विद्यार्थ्यांसाठी विशेष शैक्षणिक कार्यक्रम राबविण्यात आले. आकर्षक प्रात्यक्षिके, मरीन इंजिनिअरिंग संग्रहालयाचा दौरा, प्रशिक्षण सुविधांची भेट तसेच नौदलातील करिअरविषयक मार्गदर्शन यांद्वारे विद्यार्थ्यांना नौदलाच्या जीवनशैलीची प्रत्यक्ष ओळख करून देण्यात आली. महाराष्ट्र आणि गुजरातमधील सैनिक शाळांसह एकूण दहा शाळांनी या उत्सवात सहभाग नोंदविला.

Navy Day 2025: 54 वर्षापूर्वी समुद्रातील ‘ते’ युद्ध, जेव्हा भारतीय नौदलाने विणले जाळे आणि पाकिस्तानचे झाले 2 तुकडे

याच निमित्ताने २ डिसेंबर रोजी ‘आयएनएस शिवाजी इंटरस्कूल क्विझ स्पर्धे’च्या पाचव्या आवृत्तीचा अंतिम सामना पार पडला. सैनिकी शाळा सातारा यांनी लोणावळा येथील सिंहगड पब्लिक स्कूलला मागे टाकत विजेतेपद पटकावले. ज्ञान, चपळ विचार आणि अचूकता यांचा उत्कृष्ट मेळ या स्पर्धेत पाहायला मिळाला. सर्व स्पर्धकांना विशेष पारितोषिके प्रदान करण्यात आली.

३ डिसेंबर रोजी तिरुअनंतपुरमच्या शांगुमुघम बीचवर झालेले नेत्रदीपक ऑपरेशनल प्रात्यक्षिक हा कार्यक्रमाचा विशेष आकर्षणाचा भाग ठरला. भारताच्या माननीय राष्ट्रपती द्रौपदी मुर्मू यांच्या उपस्थितीत झालेल्या या सादरीकरणात ‘लढाईसाठी सज्ज, एकसंध, विश्वासार्ह आणि आत्मनिर्भर दल’ हा संदेश प्रभावीपणे मांडण्यात आला. आयएनएस शिवाजी येथील सभागृहात कर्मचाऱ्यांसाठी या कार्यक्रमाचे थेट प्रक्षेपण करण्यात आले.

Indian Navy : भारतीय नौदल किती आहे सक्षम? शेजारील देशांच्या तुलनेत तयारी किती?

४ डिसेंबर रोजी व्हाइस ॲडमिरल आय. सी. राव (निवृत्त) यांनी भारतीय नौदलाच्या स्वदेशीकरणाच्या प्रवासावर प्रेरणादायी व्याख्यान दिले. स्वातंत्र्यानंतर नौदलाने आत्मनिर्भरतेकडे केलेल्या वाटचालीबद्दल त्यांनी सविस्तर माहिती मांडली. संध्याकाळी सांस्कृतिक कार्यक्रमाने उत्सवाला अधिक रंगत आणली. प्रभावी पीटी प्रदर्शन, सी कॅडेट कॉर्प्सचे उत्साही सादरीकरण, पीएम केव्ही विद्यार्थ्यांचा लेझीम नृत्याविष्कार आणि जम्मू–काश्मीर लाईट इन्फंट्री तसेच नौदल बँडची सुरेल सादरीकरणे प्रेक्षकांच्या पसंतीस उतरली. संस्थेची विशेष रोषणाई आणि ऐतिहासिक वारसा दर्शविणारे आकर्षक ऑडिओ–व्हिज्युअल सादरीकरण हेही कार्यक्रमाचे वैशिष्ट्य होते.