दिवा सीएसटी लोकल सुरू करण्यासाठी आग्रही, आमदार राजू पाटील यांनी देखील केली मागणी – श्रीकांत शिंदे

दिवा रेल्वे स्टेशनच्या विकास कामांचे भूमिपूजन प्रसंगी खासदार श्रीकांत शिंदे, आमदार राजू पाटील दिव्यात आले होते.

दिवा रेल्वे स्थानकाहून दिवा सीएसटी लोकल चालू करण्यासाठी माझ्यासह, आमदार राजू पाटील आणि स्थानिक लोकप्रतिनिधी देखील प्रयत्न करत आहेत. त्याचप्रमाणे होम प्लॅटफॉर्म, लांब पल्ल्याच्या गाड्याना थांबा देण्याची प्रवाशांची मागणी आहे. याबाबत देखील पाठपुरावा सुरू असल्याची माहिती खासदार श्रीकांत शिंदे यांनी दिली. दिवा रेल्वे स्टेशनच्या विकास कामांचे भूमिपूजन प्रसंगी खासदार श्रीकांत शिंदे, आमदार राजू पाटील दिव्यात आले होते.

यावेळी श्रीकांत शिंदे यांनी सांगितले की, पंतप्रधान नरेंद्र मोदी यांच्या नेतृत्वात अमृत भारत स्टेशन अंतर्गत विविध रेल्वे स्थानकांचा कायापालट सुरू आहे. कल्याण लोकसभेमधून 45 कोटी रुपये, मुंब्रामध्ये 14 कोटी रुपये आणि शहाडमध्ये तितकाच निधी केंद्र सरकारच्या माध्यमातून देण्यात आला आहे. जेणेकरून या ठिकाणी या रेल्वेस्थानकांचा कायापालट होईल आणि प्रवाशांना सुविधा उपलब्ध होतील असे सांगितले.

यावेळी बोलताना खासदार श्रीकांत शिंदे यांनी पंतप्रधान नरेंद्र मोदी यांच्या हस्ते संपूर्ण देशभरात 554 रेल्वे स्टेशनचे अमृत भारत स्टेशन कायापालट करण्याचा कार्यक्रम होणार आहे. याच योजनेअंतर्गत आज दिवा येथे भूमिपूजन झालं. रेल्वे मंत्रालयाकडून महाराष्ट्रातील रेल्वेचे जाळ विकसित करण्यासाठी एकटया महाराष्ट्राला 15540 कोटी रुपयांचा निधी देण्यात आला आहे. त्यामध्ये देशभरातील 554 रेल्वे स्टेशनमधील 126 रेल्वे स्टेशन फक्त महाराष्ट्रातले आहेत.

महाराष्ट्रासाठी खूप मोठा दिवस आहे. नरेंद्र मोदी यांचे नेतृत्वात महाराष्ट्रामध्ये रेल्वे स्थानकांचा कायापालट होत आहे, त्यासाठी श्रीकांत शिंदे यांनी पंतप्रधान नरेंद्र मोदी यांचे आभार मानले.