कास पठारावरील बांधकामांना हात लावू देणार नाही ; हरित लवादा पुढे वस्तूस्थिती मांडण्याचे शिवेंद्रसिंहराजे यांचे आवाहन

सातारा : कास परिसरातील बांधकामे ही स्थानिकांची असून कोणीही दुसऱ्याच्या जागेत अतिक्रमण केलेले नाही. पर्यटकांचा वाढता ओघ बघून येथे हॉटेल व्यवसायाला ऊर्जितावस्था आली आहे. ज्या व्यावसायिकांना नोटीसा बजावण्यात आलेल्या आहेत. त्यांची बांधकामे पॉईंट फाईव्ह प्रमाणे नियमित करण्याच्या संदर्भात मोजणी सुरू आहे. ती तत्काळ पूर्ण करण्यात यावी, अशी मागणी आमदार शिवेंद्रसिंहराजे भोसले यांनी जिल्हाधिकारी रुचेश जयवंशी यांच्याकडे केली. राष्ट्रीय हरित लवादा पुढे कास पठारावरील व्यवसायाची वस्तुस्थिती मांडली जावी, अशी अपेक्षा त्यांनी जयवंशी यांच्याकडे व्यक्त केली.

राष्ट्रीय हरित लवादाने कास पठारावरील बांधकामां संदर्भात चार आठवड्यात जिल्हाधिकाऱ्यांनी निर्णय घ्यावा असे निर्देश दिले होते. याप्रकरणी आमदार शिवेंद्रसिंहराजे भोसले यांनी कास पठारावरील हॉटेल व्यवसायिकांच्या समवेत जिल्हाधिकारी रुचेश जयवंशी यांची शुक्रवारी त्यांच्या दालनात भेट घेतली. या विषयावर सुमारे अर्धा तास चर्चा करण्यात आली. जिल्हाधिकाऱ्यांनी आमदार शिवेंद्रसिंहराजे भोसले यांना या संदर्भात हरित लवादा पुढे सकारात्मक बाजू या संदर्भात मांडली जाईल, असे आश्वासन दिले.
बैठकीनंतर पत्रकारांशी बोलताना आमदार शिवेंद्रसिंहराजे भोसले म्हणाले, ज्या समाजसेवकांनी कास पठारावरील बांधकामा संदर्भात तक्रार केली आहे. त्यांनी काही गोष्टी समजावून घ्याव्यात. येथे कोणी कोणाच्या जागेत अतिक्रमण केलेले नाही. ज्या व्यवसायिकांना नोटीस आलेले आहेत त्यातले ९९ टक्के व्यावसायिक हे स्थानिक भूमिपुत्र असून त्यांनी त्यांच्याच जागेमध्ये ही बांधकामे उभारलेली आहेत. त्या संदर्भातील परवानग्या आणि पॉईंट फाईव्ह प्रमाणे असणारे एफएसआय प्रमाणित करण्याची प्रक्रिया सुरू आहे, असे अामदार भाेसले यांनी सांगितले.

पायाभूत सुविधांचा विकास गरजेचा
या संदर्भात जिल्हाधिकारी रूचेश जयवंशी यांनी सहकार्य करण्याचे धोरण ठेवले आहे. त्यांनी ही प्रक्रिया तात्काळ पूर्ण करावी, अशी आम्ही मागणी केली होती. या मागणीला जिल्हाधिकाऱ्यांनी सकारात्मक प्रतिसाद दिला आहे. जर पर्यटक येथे चहा, नाष्टा, पर्यटन, मुक्काम या कामांसाठी येत असतील तर येथे स्थानिक पायाभूत सुविधांचा विकास होणे गरजेचे आहे, असे अामदार भाेसले यांनी म्हटले अाहे.

पर्यटकांना सुविधा मिळणार
हॉटेल व्यवसाय जर येथे वाढला तरच पर्यटकांना सुविधा मिळणार आहेत, हे समाजसेवकांनी लक्षात ठेवावे. ज्या स्थानिक भूमिपुत्रांचा व्यवसाय वैध आहे, त्यांनी आपली बांधकामे प्रमाणित करण्याची प्रक्रिया सुरू केलेली आहे. अशा स्थानिक भूमिपुत्रांच्या बांधकामांना अजिबात हात लावू देणार नाही, असा इशारा शिवेंद्रसिंहराजे यांनी दिला आहे.

Web Title: Kaas will not touch the constructions on the plateau appeal of shivendrasinharaje to present the situation before harit lavad nrab

Get Latest  Marathi News ,  Maharashtra News and  Marathi News from Politics,  Election News ,  Sports News ,  Entertainment News,  Business News and   Religion News  only on Navarashtra.com