कोल्हापूर नगर परिषद निवडणूक निकाल समोर आला असून यामध्ये महायुतीचा विजय झाला आहे (फोटो - टीम नवराष्ट्र)
Kolhapur Nagar parishad Election Result : कोल्हापूर : कोल्हापूर जिल्ह्यातील १० नगरपालिका आणि ३ नगरपंचायतींच्या निवडणुकांनंतर सत्तास्थापनेचे चित्र स्पष्ट झाले आहे. बहुतांश ठिकाणी महायुती प्रणित आघाडींचे राजकारण निर्णायक ठरले आहे. महायुती आणि महाविकास आघाडी यांच्यातील चुरशीच्या लढतीनंतर काही ठिकाणी स्पष्ट बहुमत, तर काही ठिकाणी आघाडी व समझोत्यांच्या माध्यमातून सत्ता स्थापन झाली आहे. त्यामुळे जिल्ह्यातील स्थानिक स्वराज्य संस्थांमध्ये राजकीय समीकरणे पुन्हा एकदा बदललेली पाहायला मिळत आहेत.
जिल्ह्यातील प्रमुख नगरपालिका व नगरपंचायतींमध्ये भाजप, शिवसेना (शिंदे गट), राष्ट्रवादी काँग्रेस (अजित पवार गट) यांची महायुती यशस्वी ठरली आहे. यामध्ये चार ठिकाणी शिवसेना शिंदे गट, तीन ठिकाणी भाजप, शिरोळ, पेठ वडगाव काँग्रेस स्थानिक आघाड्या, मलकापूर ,पन्हाळा जनस्वराज्य शक्ती पक्षाने सत्ता स्थापन केली आहे या निवडणुकीचा निकाल पाहता विकास, पायाभूत सुविधा आणि केंद्र-राज्य सरकारशी सुसंवाद या मुद्द्यांवर महायुतीने मतदारांना आकर्षित केल्याचे चित्र आहे. विशेषतः शहरी भागातील काही नगरपालिकांमध्ये महायुतीला स्पष्ट बहुमत मिळाल्याने सत्ता स्थापन करणे सोपे झाले आहे. तर लाडक्या बहिणींची नगरपालिका निवडणुकीतही ओवाळणी दिली असल्याचे प्रभाव आहे.
दुसरीकडे, काँग्रेस, शिवसेना (उद्धव ठाकरे गट) आणि राष्ट्रवादी काँग्रेस (शरद पवार गट) यांची महाविकास आघाडी प्रभावी ठरली नाही पेठ वडगाव, शिरोळ वगळता अन्यत्र पराभवाला सामोरे जावे लागले आहे. एकूणच, कोल्हापूर जिल्ह्यातील नगरपालिका आणि नगरपंचायतींमध्ये आघाडींच्या सत्तेमुळे राजकीय संतुलन साधले गेले असून, आगामी काळात स्थानिक विकासकामे आणि प्रशासनातील निर्णयांवर या आघाड्यांचा प्रभाव स्पष्टपणे दिसून येणार आहे. जिल्ह्यातील स्थानिक राजकारणासाठी ही निवडणूक महत्त्वाची ठरली असून, आगामी महापालिका निवडणुकांच्या दृष्टीनेही ती दिशा दाखवणारी ठरणार आहे.
कोल्हापूर जिल्ह्यात १० नगरपालिका आणि ३ नगरपंचायत नगराध्यक्ष निवडणुकीत शिवसेना शिंदे गटाची जोरदार मुसंडी मारली आहे. शिवसेना शिंदे गटाने जयसिंगपूर, शिरोळ, मुरगुड आणि कुरुंदवाड या नगरपालिकांमध्ये नगराध्यक्षपदी विजय खेचून आणला आहे. पाठोपाठ भाजपने चंदगड, हुपरी आणि आजरा या तीन ठिकाणी विजय मिळवला आहे. काँग्रेसला अवघ्या दोन ठिकाणी समाधान मानावे लागले असून पेठवडगाव आणि शिरोळ या ठिकाणी विजय मिळवला आहे. जनसुराज्यने पन्हाळा आणि मलकापूर नगराध्यक्ष निवडणुकीमध्ये विजय मिळवला आहे. राष्ट्रवादी काँग्रेस अजित पवार गटाला गडहिंग्लज आणि कागलमध्ये विजय मिळाला आहे. त्यामुळे कोल्हापूर जिल्ह्यामध्ये नगराध्यक्ष निवडणुकीमध्ये शिवसेना शिंदे गटाने बाजी मारल्याचे दिसून येत आहे.
हे देखील वाचा : चंदगड नगराध्यक्षपदाचे उमेदवार सुनील काणेकर विजयी; भाजपच्या कार्यकर्त्यांनी जयघोष करत केली गुलालाची उधळण
दरम्यान, कोल्हापूर जिल्ह्यामध्ये राष्ट्रवादी काँग्रेस शरदचंद्र पक्ष आणि शिवसेना ठाकरे गटाची मोठी पिछेहाट झाली आहे. त्यांना भोपळाही फोडता आलेला नाही. त्यामुळे कोल्हापूर जिल्ह्यामध्ये महायुतीने नगराध्यक्ष निवडणुकीमध्ये वर्चस्व राखल्याचे चित्र आहे. दुसरीकडे आमदार विनय कोरे यांचा जनसुराज्य पक्षही महायुतीचा घटक आहे. त्यांनी आपल्या मतदारसंघांमध्ये मलकापूर आणि पन्हाळा नगरपरिषद नगराध्यक्ष पद खेचलं आहे.
मुश्रीफ-घाटगे आघाडीला मुरगूडमध्ये झटका
दुसरीकडे कागलच्या राजकारणामध्ये शाहू ग्रुपचे अध्यक्ष समरजितसिंह घाटगे एकत्र आल्याने जिल्ह्यासह राज्याच्या राजकारणामध्ये मोठी चर्चा रंगली होती. कागलमध्ये दोघाना यश मिळालं असले, तरी मात्र मुरगुडमध्ये त्यांना दारुण पराभवाला सामोरे जावं लागलं आहे. शिवसेना शिंदे गटाचे माजी खासदार संजय मंडलिक यांच्या गटाच्या सुहासिनी देवी पाटील यांनी नगराध्यक्षपदी विजय मिळवला. नगरपालिकेवर सत्ता सुद्धा मिळवली आहे. त्यामुळे मुश्रीफ आणि घाटगे यांना तगडा झटका बसल्याचे चित्र आहे.
आमदार अशोक माने यांच्या घराणेशाहीला विरोध
दुसरीकडे चंदगडमध्ये मुख्यमंत्री देवेंद्र फडणवीस प्रचारात उतरल्याने मोठी चर्चा रंगली होती. त्या ठिकाणी भाजपचा नगराध्यक्ष पदाचा उमेदवार विजयी झाला. शिरोळ नगरपालिकेमध्ये सुद्धा धक्कादायक निकालाची नोंद झाली असून आमदार अशोक माने यांच्या घराणेशाहीला मतदारांनी सपशेल नाकारलं. सूनबाई आणि मुलगा या दोघांना सुद्धा मतदारांनी घरचा रस्ता दाखवला. त्यांचा पुतण्या सुद्धा निवडणुकीमध्ये पराभूत झाला. जयसिंगपूरमध्ये शिवसेना शिंदे गटाच्या अजित पाटील यांनी मोठा विजय मिळवला आहे.
राजकारणातील घराणेशाही हद्दपार
नगरपंचायत निवडणुकीमध्ये धक्कादायक निकालांची नोंद झाली आहे. शिरोळ तालुक्यामध्ये आमदार अशोकराव माने यांना तगडा झटका बसला आहे. अशोकराव माने यांची घराणेशाही मतदाराने अक्षरशः हद्दपार केली आहे. त्यामुळे होम ग्राउंडवर दारुण पराभवाला सामोरे जावे लागले आहे. अशोकराव माने यांची सून सारिका अरविंद माने यांचा नगराध्यक्ष पदाच्या निवडणुकीमध्ये दारुण पराभव झाला. नगरसेवक पदाच्या निवडणुकीमध्ये मुलगा अरविंद अशोकराव माने यांचा सुद्धा दारुण पराभव झाला. इतकेच नव्हे तर त्यांच्या पुतण्याला सुद्धा मतदारांनी घरचा रस्ता दाखवत एक प्रकारे घराणेशाही हद्दपार करून टाकली आहे. त्यामुळे भाजप ताराराणी आघाडीला सपशेल नाकारलं आहे. विशेष म्हणजे भाजप प्रदेशाध्यक्ष रवींद्र चव्हाण यांनीही प्रचार केला होता. त्यामुळे शिरोळ नगरपालिकेत आमदार राजेंद्र पाटील यड्रावकर यांची सत्ता संपुष्टात आली आहे.
हे देखील वाचा : चिपळूण भाजप उमेदवाराच्या विजयाची सर्वत्र चर्चा; केवळ एका मताने मारली बाजी
पन्हाळा मलकापूरमध्ये नगराध्यक्ष निवडणुकीत जनसुराज्यचे उमेदवार विजयी झाले आहेत. शिवसेना शिंदे आघाडीने कोल्हापूर जिल्ह्यामध्ये लक्षणीय यश मिळवताना जयसिंगपूर, शिरोळ, मुरगूड आणि कुरुंदवाड अशा चार ठिकाणी नगराध्यक्षपदी विजय खेचून आणला आहे. राष्ट्रवादी काँग्रेसला कागल आणि गडहिंग्लमध्ये अपेक्षित यश मिळालं आहे. मुरगुड नगरपालिकेमध्ये मतदारांनी हसन मुश्रीफ आणि समरजितसिंह घाटगे यांच्या आघाडीला नाकारत शिवसेना शिंदे गटाला कौल दिला आहे. या ठिकाणी सुहासिनीदेवी पाटील विजयी झाल्या आहेत. दुसरीकडे कोल्हापूरमध्ये राष्ट्रवादी काँग्रेस शरदचंद्र पवार पक्षाची मोठी पिछेहाट झाली असून एकाही जागेवरती विजय मिळालेला नाही. तीच स्थिती शिवसेना ठाकरे गटाची झाली आहे. काँग्रेस सुद्धा अवघ्या दोन ठिकाणी पेठवडगाव आणि शिरोळमध्ये विजय मिळाला आहे.
कोल्हापूर जिल्ह्यातील नगराध्यक्ष कौल
