तुकाराम मुंढेंची पुन्हा मोठी कारवाई; आयुर्वेदिक औषध कंपन्यांचे परवानेच केले रद्द

परवाने रद्द करण्यात आलेल्या संस्थांमध्ये गोंदिया व पुण्यामध्ये सर्वाधिक संस्था आहेत. गोंदियातील लालशाह ऑरगॅनिक प्रॉडक्ट्स, आदित्य फार्मा, अंगरस आयुर्वेद, हिलॅरियस आयुर्वेद या चार संस्थांचे परवाने रद्द करण्यात आले.

मुंबई : गुटखा, सुगंधित तंबाखू विक्रेते, हॉटेल, रेस्टॉरंट आणि औषध विक्रेत्यांविरोधात कारवाई सुरू असतानाच अन्न व औषध प्रशासनाने (एफडीए) राज्यातील आयुर्वेदिक उत्पादक संस्थांविरोधातही धडक मोहीम राबविली आहे. राज्यातील ४३४ परवानाधारक आयुर्वेदिक उत्पादक संस्थांची तपासणी करण्यात आली.

नियमांचे पालन न करणाऱ्या १३५ संस्थांना कारणे दाखवा नोटीस बजावण्यात आली असून, कायद्याचे उल्लंघन करणाऱ्या १० आयुर्वेदिक औषध उत्पादकांचे परवाने कायमस्वरूपी रद्द करण्यात आले आहेत. या तपासणीत औषधे व सौंदर्य प्रसाधने कायदा १९४०, नियम १९४५ तसेच परिशिष्ट ‘टी’नुसार संस्थांकडून होणाऱ्या अनुपालनाची पडताळणी करण्यात आली.

कारखाना परिसर, तांत्रिक मनुष्यबळ, चांगल्या उत्पादन पद्धती, गुणवत्ता नियंत्रण विभाग, कच्चा माल व तयार औषधांच्या चाचणी नोंदी, बॅच उत्पादन अभिलेख, वितरण नोंदी आणि तक्रार नोंदवहीची तपासणी झाली. तपासणीत मान्यताप्राप्त तांत्रिक व्यक्तींची अनुपस्थिती, गुणवत्ता नियंत्रण विभाग कार्यरत नसणे, आवश्यक यंत्रसामग्रीचाअभाव, अस्वच्छता, उत्पादन नोंदींमध्ये तफावत, लेबलवर चुकीचा उत्पादन दिनांक, कर्मचाऱ्यांच्या प्रशिक्षण व वैद्यकीय तपासणीच्या नोंदींचा अभाव अशा गंभीर त्रुटी आढळल्या.

डॉमिनोझच्या 3 दुकानांवर बडगा

मुंबईतील विलेपार्ले, बोरीवली आणि घाटकोपर येथील डॉमिनोझच्या तीन दुकानांचे खाद्य व्यवसाय परवाने एफडीएने निलंबित केले. तपासणीत स्वच्छता, अन्नसाठवणूक, तापमान नियंत्रण, कीटकनियंत्रण आणि कर्मचाऱ्यांच्या वैयक्तिक स्वच्छतेत गंभीर त्रुटी आढळल्या. आर-सिटी मॉलमधील दुकानात कीटकांचा प्रादुर्भाव तसेच फिफो, फेफो नियमांचे उल्लंघन आढळले. आवश्यक कागदपत्रे, स्वच्छता वेळापत्रक आणि कर्मचाऱ्यांच्य वैद्यकीय तपासणीचे रेकॉर्डही उपलब्ध नव्हते. कराडमधील डोमिनोज दुकानावरही कारवाई झाली.

गोंदिया व पुण्यामध्ये सर्वाधिक संस्था

परवाने रद्द करण्यात आलेल्या संस्थांमध्ये गोंदिया व पुण्यामध्ये सर्वाधिक संस्था आहेत. गोंदियातील लालशाह ऑरगॅनिक प्रॉडक्ट्स, आदित्य फार्मा, अंगरस आयुर्वेद, हिलॅरियस आयुर्वेद या चार संस्थांचे परवाने रद्द करण्यात आले असून त्याखालोखाल पुण्यातील कृष्णा हर्बल, कालिदास गांधी, मे. इंडुकेअर फार्मा प्रा. जेजुरी एमआयडीसी या तीन संस्था, नाशिकमधील शिवनाथ आयुर्वेदिक प्रॉडक्ट्स कंपनी, यशोदा लॅब प्रा. लि या दोन आणि अमरावतीमधील हकीम आयुर्वेदिक ब्युटी केअर आयुर्वेदिक औषधांचा वापर मोठ्या प्रमाणात होतो.

ग्रंथोक्त औषधांचे उत्पादन मान्यताप्राप्त संदर्भ ग्रंथात विहित करण्यात आल्याप्रमाणे व पेटंट आणि मालकीहक्क औषधांचे उत्पादन व गुणनियंत्रण नियमातील ठरवून दिलेल्या निकषाप्रमाणे करणे बंधनकारक आहे. असे न करणाऱ्या उत्पादकविरुद्ध कठोर कारवाई करण्यात येणार असल्याचे अन्न व औषध प्रशासन आयुक्त तुकाराम मुंढे यांनी सांगितले.

तुकाराम मुंढेंचा मोर्चा बस स्थानकांवरील कँटीनकडे; सिल्लोडमध्ये FDA ची धडक कारवाई