Maharashtra Live Breaking News in Marathi: आजपासून दर गुरूवारी पुणे शहरातील पाणीपुरवठा बंद राहणार

15 Oct 2026 10:10 AM (IST)

ठाण्यात हत्यासत्र सुरूच? राजकीय नेत्याच्या हत्येनंतर युट्यूबरवर गोळीबार

ठाण्यातील मनपाडा परिसरात शिवसेना ठाकरे गटाचे नेते प्रदीप पूर्णेकर यांच्या हत्येची घटना ताजी असतानाच उल्हासनगरमध्ये पुन्हा गोळीबाराचा थरार घडला आहे. उल्हासनगर रेल्वे स्टेशनबाहेरील अत्यंत वर्दळीच्या रस्त्यावर बुधवारी रात्री सव्वा आठच्या सुमारास स्थानिक प्रसिद्ध युट्यूबर हरीश गजवानी यांची गोळ्या झाडून हत्या करण्यात आली. अज्ञात हल्लेखोरांनी पाठीमागून येत गजवानी यांच्या डोक्यात अगदी जवळून दोन गोळ्या झाडल्या. या हल्ल्यात त्यांचा जागीच मृत्यू झाला. या घटनेमुळे उल्हासनगरसह संपूर्ण ठाणे जिल्ह्यात खळबळ उडाली आहे.

15 Oct 2026 10:00 AM (IST)

India vs West Indies 4th T20 Match: भारत विरुद्ध वेस्ट इंडिज चौथ्या टी-२० सामन्यात टीम इंडियाचा २४ धावांनी पराभव 

भारत आणि वेस्ट इंडिज (India vs West Indies) यांच्यातील पाच सामन्यांच्या टी-२० मालिकेतील चौथा सामना अत्यंत रोमहर्षक आणि उत्कंठावर्धक ठरला. या सामन्यात भारतीय संघाला २४ धावांनी पराभवाला सामोरे जावे लागले असून, या विजयासह वेस्ट इंडिजने मालिकेत २-२ अशी बरोबरी साधली आहे. आता मालिकेचा अंतिम फैसला ५ व्या आणि अखेरच्या सामन्यात होणार आहे. प्रथम फलंदाजी करताना वेस्ट इंडिजच्या फलंदाजांनी भारतीय गोलंदाजीची चांगलीच धुलाई केली. निर्धारित २० षटकांत ३ गडी गमावून त्यांनी तब्बल २४७ धावांचा डोंगर उभा केला.

15 Oct 2026 09:50 AM (IST)

 Pradeep Purnekar Murder Case : प्रदीप पूर्णेकर हत्या प्रकरणात ॲड. गुणरत्न सदावर्तेंचे अत्यंत स्फोटक आरोप 

ठाण्यातील ठाकरे गटाचे विभागप्रमुख प्रदीप पूर्णेकर यांच्या निर्घृण हत्या प्रकरणात आता राजकीय आणि कायदेशीर पातळीवर मोठे वादळ उठले आहे. मृत प्रदीप पूर्णेकर यांच्या कुटुंबीयांची ठाण्यातील घरी जाऊन भेट घेतल्यानंतर प्रसिद्ध वकील ॲड. गुणरत्न सदावर्ते आणि त्यांच्या पत्नी जयश्री पाटील यांनी घेतलेली पत्रकार परिषद सध्या चर्चेच्या केंद्रस्थानी आली आहे. या पत्रकार परिषदेत ॲड. सदावर्तेंनी थेट उपमुख्यमंत्री एकनाथ शिंदे यांचे नाव घेत गंभीर आरोप केले आहेत.

15 Oct 2026 09:40 AM (IST)

Supreme Court Hearing Gyanesh Kumar:  ज्ञानेश कुमारांविरोधात सुप्रीम कोर्टातील याचिकेवर आज सुनावणी 

Supreme Court Hearing Gyanesh Kumar:  मुख्य निवडणूक आयुक्त (CEC) ज्ञानेश कुमार आणि निवडणूक आयोगाच्या कारभाराविरोधात 'इंडिया' (INDIA) आघाडीने रान उठवले आहे. मतदार याद्यांमधील कथित अनियमितता, मोठ्या प्रमाणावर नावे वगळणे आणि विशेष सखोल पुनरीक्षण (SIR) प्रक्रियेत मुख्य निवडणूक आयुक्तांनी एकतर्फी निर्णय घेतल्याचा आरोप करत काँग्रेस नेते राहुल गांधी यांच्यासह विरोधी पक्षांतील ११ प्रमुख नेत्यांनी सर्वोच्च न्यायालयात (Supreme Court) याचिका दाखल केली आहे. या महत्त्वपूर्ण याचिकेवर आज सुनावणी होणार असून संपूर्ण देशाचे लक्ष याकडे लागले आहे. विरोधी पक्षांच्या तीव्र निदर्शनांनंतर राहुल गांधी आणि इतर नेत्यांनी सर्वोच्च न्यायालयात याचिका दाखल केली. या याचिकेवर सर्वोच्च न्यायालय काय भूमिका घेते, याकडे सर्वांचे लक्ष आहे.

15 Oct 2026 09:30 AM (IST)

Maharashtra Government Land Disposal Policy Amendment:  राज्य सरकारच्या जमीन विल्हेवाट धोरणात मोठा बदल 

राज्य सरकारने छोट्या, निरुपयोगी आणि अडकलेल्या (Land-locked) सरकारी जमिनींच्या विल्हेवाट लावण्याच्या धोरणात मोठे बदल करत यासंदर्भातील मर्यादा वाढवण्यास मंजुरी दिली आहे. या निर्णयामुळे आता लगतच्या भूखंडधारकांना मिळणाऱ्या सरकारी जमिनींचे क्षेत्रफळ वाढणार आहे.

ऑगस्ट २०२५ च्या धोरणानुसार, अशा प्रकारच्या जमिनी लगतच्या (शेजारील) भूखंडधारकाला देताना त्याचे क्षेत्रफळ लगतच्या जमिनीच्या एकूण क्षेत्राच्या १० टक्क्यांपेक्षा जास्त नसावी, अशी अट होती. मात्र, लोकप्रतिनिधींच्या सततच्या मागणीनंतर सरकारने ही मर्यादा थेट २५ टक्क्यांपर्यंत वाढवली आहे.

15 Oct 2026 09:21 AM (IST)

CJP Tiranga Lehra Do Movement: १६ऑक्टोबरला सीजेपी प्रमुख अभिजीत दिपकेंच 'लेहरा दो तिरंगा'चं आवाहन

कॉकरोच जनता पार्टीचे प्रवक्ते आशुतोष रांका आणि सौरव दास यांना जंतरमंतरवर तिरंगा फडकावल्या प्रकरणी आणि घोषणाबाजी केल्याप्रकरणी दिल्ली पोलिसांनी  अटक केली. त्यानंतर त्यांना पाच दिवसांच्या न्यायालयीन कोठडीतही पाठण्यात आले आहे. या अटकेच्या विरोधाप्रकरणी  उद्या १६ ऑक्टोबरला सीजेपी प्रमुख अभिजीत दिपके यांनी देशाला "लेहरा दो तिरंगा " या मोहिमेसाठी साद घातली आहे.

Lehra do Tiranga 🇮🇳

16 Oct | Central Park, CP | 5 PM https://t.co/eFO1RfUBos

— Abhijeet Dipke (@abhijeet_dipke) October 14, 2026

15 Oct 2026 09:15 AM (IST)

Maharashtra Weather Update: महाराष्ट्रात वारं फिरलं!  सोलापूर, पुणे, कोल्हापूरसह 'या' जिल्ह्यांत विजांच्या कडकडाटासह मुसळधार बरसण्याची शक्यता

Maharashtra Weather Update:   राज्यात सध्या हवामानात कमालीची उलथापालथ पाहायला मिळत असून, एकीकडे ऑक्टोबर हीटचा (October Heat) चटका वाढला आहे, तर दुसरीकडे काही भागांत पावसाचे सावट दाटले आहे. राज्यात एकाच वेळी ऊन आणि पाऊस अशी संमिश्र स्थिती निर्माण झाली आहे.

कोकण आणि किनारपट्टी भागात दमट आणि उष्ण वातावरण राहण्याची शक्यता आहे. ठाणे, मुंबई, पालघर, रत्नागिरी, रायगड आणि सिंधुदुर्ग या जिल्ह्यांमध्ये उष्णतेचा पारा चांगलाच वाढणार असून नागरिकांना घामाच्या धारा सहन कराव्या लागत आहेत. पुढील चार ते पाच दिवस राज्याच्या विविध भागांत पावसाला पोषक वातावरण तयार झाले आहे.

15 Oct 2026 09:05 AM (IST)

Indian Railways Dynamic Pricing Proposal: आता विमानांप्रमाणे बदलणार ट्रेनच्या तिकिटांचे दर! 

भारतीय रेल्वेने प्रवास करणाऱ्या कोट्यवधी प्रवाशांसाठी एक अत्यंत महत्त्वाची बातमी समोर येत आहे. रेल्वे प्रवासाच्या तिकीट दरांबाबत एक मोठा बदल होण्याची शक्यता वर्तवली जात असून, आता विमान प्रवासाच्या धर्तीवर रेल्वे तिकिटांचे दरही रोजच्या रोज बदलण्याचा प्रस्ताव विचाराधीन असल्याचे समजते.

या नव्या सुत्रानुसार प्रवाशांची वाढती मागणी आणि जागांची उपलब्धता (Demand and Supply) विचारात घेऊन तिकिटांचे दर निश्चित केले जातील. या प्रणालीमुळे आज तुम्ही ज्या दराने तिकीट बुक केले आहे, उद्या त्याच तिकिटाची किंमत मागणीनुसार वाढू शकते किंवा स्वस्तही होऊ शकते.  एअरलाइन्स कंपन्यांप्रमाणेच गर्दीच्या हंगामात किंवा तातडीच्या प्रवासादरम्यान तिकीट दर वाढण्याची शक्यता यात आहे.

15 Oct 2026 09:01 AM (IST)

Indian Railways: रेल्वे प्रवाशांच्या सुरक्षेसाठी विमा पॉलिसी

सर्वोच्च न्यायालयाने रेल्वे प्रवाशांच्या सुरक्षेसंदर्भात एक अत्यंत महत्त्वाचा निकाल दिला आहे. त्यानुसार, रेल्वे प्रवासादरम्यान मिळणाऱ्या विम्याच्या नियमांमध्ये आणि उपलब्धतेमध्ये सुधारणा होण्याची शक्यता निर्माण झाली आहे. सध्या ऑनलाइन रेल्वे तिकीट बुक करताना प्रवाशांना विम्याचा पर्याय मिळतो. हा प्रवास विमा घेणे अजिबात बंधनकारक नाही, तर तो पूर्णपणे ऐच्छिक आहे. प्रवाशाला गरज वाटल्यास तो त्यावर टिक करून हा पर्याय निवडू शकतो.

या विम्यासाठी प्रति प्रवासी केवळ ४५ पैसे इतका खर्च येतो. हे विम्याचे पैसे तिकीट शुल्कासोबतच ऑनलाइन भरावे लागतात.हा प्रवास विमा रेल्वे प्रवासादरम्यान होणाऱ्या अपघातांसाठी संरक्षण देतो. प्रवासात एखादी दुर्घटना घडल्यास, पीडित प्रवाशाला १० लाख रुपयांपर्यंतची भरपाई मिळू शकते. म्हणजेच, केवळ ४५ पैशांच्या प्रीमियममध्ये १० लाख रुपयांचे संरक्षण मिळणे प्रवाशांच्या फायद्याचे ठरते.