Maharashtra Live Breaking News in Marathi: आशुतोष रांका, सौरव दास यांना पाच दिवसांची न्यायालयीन कोठडी

14 Oct 2026 10:10 AM (IST)

Maval Indrayani Rice Price Hike Drought: मावळमध्ये दुष्काळामुळे  लोकप्रिय 'इंद्रायणी' तांदूळ किलोमागे २० रुपयांनी महागणार

Maval Indrayani Rice Price Hike Drought:  पावसाने दीर्घ ओढ दिल्याने आणि एल निनोच्या (El Nino) संकटामुळे महाराष्ट्रातील शेतकरी हवालदिल झाला असून, त्याचा थेट फटका आता सर्वसामान्यांच्या खिशाला बसणार आहे. मावळ तालुक्यातील प्रसिद्ध 'इंद्रायणी' तांदळाच्या दरात किलोमागे तब्बल २० रुपयांनी वाढ होण्याची दाट शक्यता कृषी अधिकाऱ्यांनी वर्तवली आहे.

मावळ तालुक्यातील साडेबारा हजार हेक्टर भातशेती क्षेत्रापैकी तब्बल ६५ ते ७० टक्के क्षेत्राला पावसाअभावी मोठा फटका बसला आहे. पाण्याअभावी जमिनीला मोठ्या भेगा पडल्या असून, काही ठिकाणी उभे पीक करपून गेले आहे. दरवर्षी ५०० ते ५५० टन होणारे इंद्रायणी भाताचे उत्पादन यंदा केवळ १५० ते २०० टनांवर येण्याचा अंदाज वर्तवण्यात येत आहे.

14 Oct 2026 10:02 AM (IST)

Maharashtra Drought Situation: महाराष्ट्रात दुष्काळाचे भीषण तांडव! ऐन हिवाळ्यात  २६५ तालुक्यांत दुष्काळ जाहीर

राज्यात सध्या दुष्काळाने भयानक रूप धारण केले असून, ग्रामीण भागातील जनजीवन पूर्णपणे विस्कळीत झाले आहे. ऐन हिवाळ्यातही पिण्याच्या पाण्यासाठी महिलांच्या डोईवर हंडे आले आहेत, तर पाण्याचा थेंब नसल्याने आणि रोजगाराची साधने संपल्याने अनेक गावे ओस पडू लागली आहेत. पोटापाण्यासाठी ग्रामीण भागातील नागरिकांचे शहरांकडे स्थलांतर सुरू झाले आहे.

राज्य सरकारने आतापर्यंत २६५ तालुक्यांमध्ये अधिकृतपणे दुष्काळ जाहीर केला आहे, तर 'ट्रिगर २' (Trigger 2) अंतर्गत ४३ तालुके संकटात आहेत.  या ४३ तालुक्यांपैकी आणखी काही तालुक्यांचा दुष्काळग्रस्त यादीत समावेश करण्याबाबत आज अंतिम निर्णय होण्याची दाट शक्यता आहे.

14 Oct 2026 09:40 AM (IST)

Navratri 2026: नवरात्रीचा चौथा दिवस देवी कुष्मांडाला समर्पित, कशी करावी देवीची पूजा जाणून घ्या

• नवरात्रीचा चौथा दिवस देवी कुष्मांडाला समर्पित
• कुष्मांडाला देवीची पूजा करण्याची पद्धत
• निळ्या रंगांचे काय आहे महत्त्व

 बुधवार, १४ ऑक्टोबर रोजी नवरात्रीचा चौथा दिवस आहे. या दिवशी देवी कुष्मांडा देवीची पूजा केली जाते. देवीच्या नऊ रुपांपैकी हे चौथे रुप मानले जाते. कुष्मांडा म्हणजे आपल्या दिव्य हास्याने सृष्टीची निर्मिती करणारी शक्ती. त्यामुळे माता कुष्मांडा यांना सृष्टीची आदीशक्ती, ऊर्जा आणि आरोग्य देणारी देवी म्हणून पूजलं जातं.

14 Oct 2026 09:30 AM (IST)

‘बाल दृष्टी’मधून नेत्रआरोग्याला दृष्टी! ३ वर्षांत महापालिकेच्या १,२०० शाळांतील ३ लाख विद्यार्थ्यांच्या नेत्रतपासणीचे उद्दिष्ट

Mumbai News: फळा स्पष्ट दिसत नसल्याने अभ्यासात मागे पडणाऱ्या विद्यार्थ्यांना आवश्यक नेत्रोपचार उपलब्ध करून देण्यासाठी बृहन्मुंबई महानगरपालिका आणि व्हिजन फाउंडेशन ऑफ इंडियाने यांच्या समन्वयाने ‘बाल दृष्टी’ हा वेगळ्या प्रकारचा पहिला उपक्रम सुरू केला आहे. मुख्यमंत्री देवेंद्र फडणवीस यांनी या उपक्रमासाठी पुढाकार घेतला आहे. तीन वर्षाच्या कालावधीत महापालिकेच्या १२०० शाळांमधील तीन लाख विद्यार्थ्यांची नेत्रतपासणी करण्याचे उद्दिष्ट या उपक्रमातून निश्चित करण्यात आले आहे.

14 Oct 2026 09:16 AM (IST)

Weather Update : ‘ऑक्टोबर हिट’चा तडाखा कमी होणार; राज्यातील काही जिल्ह्यांमध्ये पावसाचा अंदाज

पुणे : गेल्या काही दिवसांपासून वातावरणात कमालीचा बदल पाहिला मिळत आहे. वाढत्या तापमानामुळे उष्णतेचा चांगलाच तडाखा बसत आहे. मात्र, आता ‘ऑक्टोबर हिट’मुळे वाढलेला उकाडा कमी होण्याची शक्यता निर्माण झाली आहे. बंगालच्या उपसागरातील हवामानाची स्थिती आणि दक्षिण भारतात ईशान्य मॉन्सूनच्या पावसासाठी अनुकूल होत असलेल्या वातावरणामुळे राज्यातील काही भागांत पावसाची शक्यता आहे.

14 Oct 2026 09:05 AM (IST)

Pune Division Teachers Constituency: पुणे विभाग शिक्षक मतदारसंघासाठी अपक्ष  प्रा. सचिन सानप यांना शिवसेनेचा पाठिंबा मिळण्याची शक्यता 

पुणे विभाग शिक्षक मतदारसंघाच्या निवडणुकीच्या पार्श्वभूमीवर राजकीय घडामोडींना वेग आला असून, या निवडणुकीत अपक्ष उमेदवार प्रा. सचिन सानप यांना शिवसेनेचा (शिंदे गट) पाठिंबा मिळण्याची दाट शक्यता निर्माण झाली आहे. शासकीय निवासस्थान असलेल्या 'नंदनवन' येथे पार पडत असलेल्या बैठकीमध्ये प्रा. सचिन सानप यांच्या नावावर आणि त्यांना पाठिंबा देण्याबाबत गांभीर्याने चर्चा सुरू असल्याची माहिती समोर आली आहे. सचिन सानप हे स्वतः एक प्राध्यापक असून, ते गेल्या अनेक वर्षांपासून सातत्याने शिक्षकांचे विविध प्रश्न आणि त्यांच्या अडीअडचणी लावून धरत आहेत.