Maharashtr cm meeting drought
राज्यात यंदा दुष्काळसदृश्य परिस्थिती निर्माण झाली आहे. पावसाने अपेक्षित साथ न दिल्याने शेतीच फार मोठ्या प्रमाणात नुकसान झालं आहे. राज्यातील अनेक भागांत पाणीटंचाईचं संकट समोर असून कापूस, सोयाबीन, तूर यांसारख्या पिकांच्या उत्पादनावर मोठा परिणाम झाल्याचं दिसत आहे. याच पार्श्वभूमीवर दुष्काळी परिस्थितीची पाहणी करण्यासाठी महाराष्ट्रात केंद्रीय पथक दाखल झालं आहे. (Maharashtra Drought)
गेल्या काही दिवसांपासून हे पथक राज्यातील विविध भागांत भेटी देऊन परिस्थितीची पाहणी करत आहेत. अश्यातच आज (रविवार, 11 ऑकटोबर) या पथकासोबत मुख्यमंत्री देवेंद्र फडणवीस यांची बैठक पार पडली.
केंद्रीय दुष्काळ पाहणी पथकाचे प्रमुख केंद्रीय संयुक्त सचिव मुक्तानंद अग्रवाल आणि पथकातील अन्य सदस्य या बैठकीला उपस्थित होते. राज्यातील दुष्काळाची तीव्रता, शेतीचं नुकसान आणि पाणीटंचाईच्या परिस्थितीवर यावेळी चर्चा झाली. मंत्री गिरीश महाजन, दत्तात्रय भरणे आणि मकरंद पाटील हेही बैठकीला उपस्थित होते.
राज्यातील धरणांमधील पाणीसाठा कमी होत असून जनावरांच्या पिण्याच्या पाण्याचा प्रश्न गंभीर बनत असल्याचं मुख्यमंत्र्यांनी पथकाच्या निदर्शनास आणून दिलं. कापूस आणि सोयाबीनच्या उत्पादनात घट झाली असून तूर पिकालाही फटका बसल्याचं त्यांनी सांगितलं.
राज्यात मोठं कृषी संकट निर्माण झालं असून आगामी रब्बी हंगामावरही त्याचे परिणाम होण्याची भीती आहे. त्यामुळे शेतकरी आणि शेतमजुरांना सर्व प्रकारची मदत देण्याची गरज असल्याचं फडणवीस यांनी स्पष्ट केलं.
मदतीचं नियोजन करताना सामान्य शेतकरी आणि शेतमजूर केंद्रस्थानी असतील, असंही त्यांनी सांगितलं. केंद्रीय पथकाने राज्यातील विविध भागांचा दौरा करून परिस्थितीचा आढावा घेतल्याबद्दल मुख्यमंत्र्यांनी आभार मानले.
दुष्काळाच्या काळात पिण्याच्या पाण्याला सर्वोच्च प्राधान्य असेल. नागरिकांसोबतच जनावरांसाठीही पुरेसं पाणी उपलब्ध करून देण्याचं नियोजन राज्य सरकार करेल, अशी भूमिका मुख्यमंत्र्यांनी मांडली. पाण्याचं आरक्षण करण्यात आल्याचंही त्यांनी सांगितलं.
केंद्रीय पथकाला प्राथमिक निवेदन सादर करण्यात आलं असून लवकरच अंतिम अहवाल सादर केला जाणार आहे. आता केंद्रीय पथकाच्या अहवालानंतर राज्याला किती आर्थिक मदत मिळते, याकडे शेतकऱ्यांचं लक्ष लागलं आहे. दुष्काळाचा सामना करताना शेती, पाणीपुरवठा आणि पशुधनाचं संरक्षण ही राज्यासमोरील मोठी आव्हानं ठरणार आहेत.
.png "Videos"){kind=small}
