विद्यार्थ्यांवर नाही, माझ्यावर गुन्हे दाखल करा! रोहित पवार आक्रमक; फडणवीसांवरही साधला निशाणा

एमपीएससी विद्यार्थ्यांच्या आंदोलनावरून सुरू असलेल्या पोलीस कारवाईवर राष्ट्रवादी काँग्रेस पक्ष (शरदचंद्र पवार) पक्षाचे आमदार रोहित पवार यांनी तीव्र नाराजी व्यक्त केली आहे. पवार यांनी विश्रामबाग पोलीस ठाण्यात जाऊन अधिकाऱ्यांना जाब विचारला.

पुणे : एमपीएससी विद्यार्थ्यांच्या आंदोलनावरून सुरू असलेल्या पोलीस कारवाईवर राष्ट्रवादी काँग्रेस पक्ष (शरदचंद्र पवार) पक्षाचे आमदार रोहित पवार यांनी तीव्र नाराजी व्यक्त केली आहे. विद्यार्थ्यांवर गुन्हे दाखल केले जात असताना आपल्यावर कारवाई का केली जात नाही, असा सवाल करत पवार यांनी विश्रामबाग पोलीस ठाण्यात जाऊन अधिकाऱ्यांना जाब विचारला. विद्यार्थ्यांऐवजी माझ्यावर गुन्हे दाखल करा आणि विद्यार्थ्यांवरील गुन्हे मागे घ्या, अशी मागणी करतानाच त्यांनी मुख्यमंत्री देवेंद्र फडणवीस यांच्यावरही निशाणा साधला. संबंधित पोलीस अधिकाऱ्यांवर कारवाई करण्याची मागणीही मुख्यमंत्र्यांकडे केली.

 

पुण्यातील एस. एम. जोशी पुलावर एमपीएससी अध्यक्षांच्या राजीनाम्यासह विविध मागण्यांसाठी गेल्या दहा दिवसांपासून विद्यार्थ्यांचे आंदोलन सुरू आहे. विद्यार्थी शांततेत आंदोलन करत आहेत. मात्र या आंदोलनातील आयोजक आणि विद्यार्थ्यांना पोलीस जाणीवपूर्वक त्रास देत असल्याचा आरोप रोहित पवार यांनी केला. तसेच, मध्यरात्री वसतिगृह चालकांना दिलेल्या नोटिसा आणि विद्यार्थ्यांना आंदोलनात सहभागी न होण्याबाबत दिल्या जाणाऱ्या कथित धमक्यांवर त्यांनी आक्षेप घेतला. विद्यार्थ्यांना गुन्हेगार किंवा दहशतवादी समजून वागविणे चुकीचे असल्याचे पवार म्हणाले. गरीब शेतकऱ्यांच्या मुलांना गुन्हेगार आणि हेर असल्याप्रमाणे वागणूक दिली जात असल्याचा आरोप त्यांनी केला. विद्यार्थ्यांवरील गुन्हे मागे घेऊन संबंधित कलमांनुसार आपल्यावर गुन्हे दाखल करावेत, अशी मागणीही त्यांनी केली.

… तर परिस्थिती चिघळू शकते

आंदोलनासाठी पोलिसांकडे परवानगीचे अनेक अर्ज दिले असून, काही अर्ज नाकारण्यात आल्याचे पवार यांनी सांगितले. विद्यार्थ्यांच्या मागण्यांवर सरकारने तातडीने निर्णय घ्यावा, अन्यथा आंदोलन अधिक व्यापक होण्याची शक्यता असल्याचा इशाराही त्यांनी दिला. विद्यार्थ्यांच्या प्रश्नांवर चर्चा करून तोडगा काढण्याऐवजी कारवाईचा मार्ग स्वीकारल्यास परिस्थिती चिघळू शकते, असे मत त्यांनी व्यक्त केले.

ड्रोन उडविल्याप्रकरणी पाच जणांवर गुन्हा

एमपीएससी अध्यक्षांच्या राजीनाम्यासह विविध मागण्यांसाठी सुरू असलेल्या आंदोलनस्थळी परवानगीशिवाय ड्रोन उडवून चित्रीकरण केल्याप्रकरणी विश्रामबाग पोलिसांनी पाच जणांवर गुन्हा दाखल केला आहे. पोलिसांनी ड्रोन जप्त केला आहे. पोलीस हवालदार युवराज भारत टोळे यांच्या तक्रारीवरून दिगंबर भारत खारे, प्रमोद पाटील, शिवराज मोरे, ऋषिकेश गांगुर्डे आणि अक्षय कांबळे यांच्याविरोधात भारतीय न्याय संहितेच्या कलम २२३ नुसार गुन्हा दाखल करण्यात आला आहे.

हे सुद्धा वाचा  : खबऱ्या असल्याचा संशय अन् थेट गोळीबार! दोन गटांत तुफान राडा; नेमकं काय घडलं?

पोलिसांनी दिलेल्या माहितीनुसार, सोमवार, ५ ऑक्टोबर रोजी सायंकाळी साडेसातच्या सुमारास आंदोलनस्थळाच्या मागील बाजूस जनरेटरजवळ दिगंबर खारे हे रिमोट कंट्रोलरच्या साहाय्याने ड्रोन उडविताना आढळले. चौकशीदरम्यान ड्रोन उडविण्यासाठी आवश्यक परवाना आणि पोलिसांची परवानगी नसल्याचे समोर आले. त्यानंतर पोलिसांनी कारवाई केली. या कारवाईनंतर रोहित पवार विश्रामबाग पोलीस ठाण्यात पोहोचले. विद्यार्थ्यांवर गुन्हे कोणाच्या आदेशाने दाखल केले जात आहेत, असा सवाल त्यांनी पोलिसांना केला. यापूर्वी परवानगी रद्द झाल्यानंतरही आंदोलन सुरू ठेवल्याप्रकरणी एमपीएससी विद्यार्थी प्रतिनिधींसह १५ जणांवर गुन्हा दाखल करण्यात आला होता.