शुक्रवार, 16 ऑक्टोबर 2026
Cricket Scorer Career: क्रिकेट स्कोरर कसा बनतात? पात्रता, काम आणि पगार जाणून घ्या एका क्लिकवर..
राज्य सरकारने 2026-27 या आर्थिक वर्षासाठी विधिमंडळाच्या पावसाळी अधिवेशनात सिंहस्थ कुंभमेळ्याच्या आवश्यक कामांसाठी 3 हजार कोटींची पुरवणी मागणीला मंजूरी दिली होती. त्यानंतर अवघ्या दिड महिन्यात कुंभमेळा प्राधिकरणाच्या विनंतीनुसार या तरतुदीपैकी 1,800 कोटी रुपये वितरित करण्यास वित्त विभागाने मान्यता दिली आहे.
यापूर्वी 2025-26 या आर्थिक वर्षात कुंभमेळा प्राधिकरणाला 3,098 कोटी रुपयांचा निधी वितरित केला होता. गेल्या दोन वर्षांत उपलब्ध झालेल्या निधीमुळे सिंहस्थ कुंभमेळ्याच्या विविध पायाभूत सुविधा आणि आवश्यक कामांना मोठी चालना मिळण्याची शक्यता आहे.
सिंहस्थ कुंभमेळ्याच्या तयारीच्या पार्श्वभूमीवर विविध टप्प्यांसाठी हा निधी वितरित करण्यात आला आहे. त्यामध्ये 283 कोटी, 717 कोटी, 501.40 कोटी, 396.60 कोटी आणि 1,200 कोटी रुपये अशा टप्प्यां हा निधी वितरीत केला जाणार आहे. या सर्व निधीची एकत्रित रक्कम 3,098 कोटी रुपये आहे.
आता 2026-27 साठी मंजूर करण्यात आलेल्या 3 हजार कोटी रुपयांच्या पुरवणी तरतुदीपैकी 1,800 कोटी रुपयांचा निधी वितरित करण्यास शासनाने मान्यता दिली आहे.
महत्त्वाची बाब म्हणजे, शासनाने मंजूर केलेला 1,800 कोटी रुपयांचा निधी फक्त सिंहस्थ कुंभमेळ्याच्या कामासाठीच वापरला जावा, अशी अट घालण्यात आली आहे. कुंभमेळ्याच्या कामासाठी मंजूर करण्यात आलेल्या उद्दिष्टांसाठीच वापरण्याचे आदेश देण्यात आले आहेत.
Cricket Scorer Career: क्रिकेट स्कोरर कसा बनतात? पात्रता, काम आणि पगार जाणून घ्या एका क्लिकवर..
वित्त विभागाने वेळोवेळी जारी केलेल्या मार्गदर्शक सूचना, आर्थिक अधिकार प्रदान करण्यासंदर्भातील नियम तसेच अन्य अटींचे पालन करूनच निधीचा वापर करावा लागणार आहे.
निधीच्या योग्य वापराची जबाबदारी कुंभमेळा प्राधिकरणाचे अध्यक्ष आणि नाशिक विभागीय आयुक्तांकडे देण्यात आली आहे. संबंधित कामांना सक्षम प्राधिकरणांकडून प्रशासकीय आणि तांत्रिक मंजुरी मिळाल्यानंतरच संबंधित संस्थांना निधी वितरित करावा किंवा खर्च करावा, अशीही अट शासन निर्णयात नमूद करण्यात आली आहे.
मंजूर करण्यात आलेल्या निधीच्या खर्चाचे प्रमाणपत्र तातडीने शासनाला सादर करणेही बंधनकारक करण्यात आले आहे. सिंहस्थ कुंभमेळ्याच्या नियोजन आणि अंमलबजावणीसाठी संबंधित अर्थसंकल्पीय शीर्षकाखाली उपलब्ध असलेल्या तरतुदीतून हा खर्च भागविण्यात येणार आहे.
निधीच्या या वितरणामुळे नाशिक-त्र्यंबकेश्वर सिंहस्थ कुंभमेळ्यासाठी आवश्यक असलेल्या पायाभूत सुविधा, वाहतूक व्यवस्था आणि इतर कामांच्या अंमलबजावणीला आता वेग येण्याची अपेक्षा आहे.
