भोरमध्ये अजित पवारांची सत्ता असली तरी, मुख्यमंत्री…; चंद्रकांत पाटलांचं मोठं विधान

राज्याचे उच्च व तंत्रशिक्षणमंत्री चंद्रकांत पाटील यांनी भोर नगरपरिषदेच्या निवडणूक प्रचार शुभारंभवेळी भोर येथील जनतेला आवाहन केले आहे.

• आगामी निवडणुकांसाठी भाजपकडून प्रचार सुरु
• मंत्री चंद्रकांत पाटलांचं मोठं विधान
• भोरमधील जनतेलाही केले महत्वाचे आवाहन

भोर : भाजपा हा विचारांचा, चिन्हांचा व कार्यकर्त्यांचा पक्ष आहे. तो कधी संपणार नाही. संग्राम थोपटे यांना समाजाच्या विकासाची काळजी आहे. सत्तेत वरती नरेंद्र मोदी व देवेंद्र फडणवीस आहेत. त्यामुळे भविष्य हे भाजपाला असल्याने ते भाजपमध्ये आलेत. त्यामुळे ते लोक कल्याणासाठी इथे आलेत. त्यामुळे त्यांच्यावर कोणी टीका करण्यासारखे काही नाही. “भोरमध्ये जरी अजित पवार यांचे सरकार असेल तरीही मुख्यमंत्री देवेंद्र फडणवीस आहेत. आम्ही एका ताटात, वाटीतसोबत असलो तरी मतदान फडणवीस यांनाच करायचे, असे आवाहन राज्याचे उच्च व तंत्रशिक्षणमंत्री चंद्रकांत पाटील यांनी भोर नगरपरिषदेच्या निवडणूक प्रचार शुभारंभवेळी भोर येथील जनतेला केले.

भोर नगरपरिषद सार्वत्रिक निवडणुकमध्ये भाजपाचा प्रचाराचा प्रारंभ शुक्रवारी (दि.२१) सकाळी भोरचे दैवत वाघजाई माता मंदिर येथे पूजा व श्रीफळ वाढवून झाला. यावेळी पाटील बोलत होते. यावेळी माजी आमदार संग्राम थोपटे, राजेंद्र शिळीमकर, बाळासाहेब गरुड, शेखर वढणे, जीवन कोंडे, पल्लवी फडणीस, संतोष धावले, आकाश कांबळे, दिपाली शेटे, स्वाती गांधी, नगराध्यक्ष, नगरसेवक पदासाठी अर्ज दाखल केलेले उमेदवार व नागरिक उपस्थित होते.

पाटील म्हणाले, भोरचे नागरीक सुजाण आहेत. थोपटे यांच्या घराण्याची कारकीर्द कधीही वादग्रस्त राहिली नाही. आजकालचे राजकारण हे जात, धर्मावर आधारित असून, बिहार जनतेने राजकारणात जात, धर्म न पाहता पक्ष बघून मतदान केले आहे. जनतेला पक्षाबद्दल आत्मविश्वास आहे. त्यामुळे मोदींनी पंचवीस कोटी जनतेला दारिद्ररेषेतून बाहेर काढले, राम मंदिर बांधले व देश जगाच्या इतिहासात पहिल्या क्रमांकावर कसा जाईल यासाठी प्रयत्न करत आहेत. महिलांना सक्षम, सुखी करण्यासाठी प्रयत्न करत आहेत.