मंगळवार, 29 सप्टेंबर 2026
122 वर्षे जुन्या ऐतिहासिक कॅफेवर FDA ची धाड ( सौजन्य - सोशल मीडिया )
एफडीएच्या पथकाने कॅफेची अचानक तपासणी केली. तपासणीदरम्यान, अधिकाऱ्यांना अन्न तयार करण्याच्या आणि साठवणुकीच्या ठिकाणी उंदराची विष्ठा, जिवंत माश्या आणि मेलेली झुरळे आढळून आली. परिसरात मांजरेही आढळली. एका रेफ्रिजरेटरमध्ये तर थेट रक्त आढळलं. त्यामुळे या कॅफेच्या स्वच्छतेवर मोठं प्रश्नचिन्ह निर्माण झालं आहे.
या सगळ्या किळसवाण्या गोष्टीच नाही तर तपासणीदरम्यान आणखी धक्कादायक प्रकार समोर आला. एका उघड्या सांडपाण्याच्या मॅनहोल जवळच अन्न तयार होत असल्याचं आढळून आलं. काही खाद्यपदार्थ थेट जमिनीवर ठेवलेले असल्याचंही निदर्शनास आलं. तर कच्चे पीठ वर्तमानपत्राने झाकलेल्या अवस्थेत होतं. अधिकाऱ्यांना कच्चे आणि तयार खाद्यपदार्थ वेगळे ठेवण्यातही बऱ्याच त्रुटी दिसून आल्या. FDA च्या मते, या परिस्थितीमुळे अन्न दूषित होण्याचा धोका लक्षणीयरीत्या वाढतो आणि ग्राहकांच्या आरोग्यावर परिणाम होतो, आणि म्हणूनच, विभागाने याला अन्न सुरक्षा आणि स्वच्छतेची गंभीर समस्या मानले आहे.
तपासणीनंतर, FDA ने Kyani & Co. Cafe चा FSSAI चा परवाना निलंबित केला आहे. या कारवाईचा एक भाग म्हणून, कॅफेला खाद्यपदार्थांची खरेदी, साठवणूक, विक्री आणि वितरण थांबवण्याचे निर्देश देण्यात आले आहेत. याचा अर्थ असा की, जोपर्यंत आवश्यक त्रुटी दूर केल्या जात नाहीत, तोपर्यंत कॅफेच्या व्यवसायावर परिणाम होणार आहे.
क्यानी कॅफेवरील ही कारवाई महाराष्ट्र FDA च्या राज्यव्यापी अन्न सुरक्षा मोहिमेचा एक भाग आहे, जी २३ ते २७ सप्टेंबर दरम्यान राबविण्यात आली. या मोहिमेदरम्यान, अनेक खाद्य आस्थापनांची तपासणी करण्यात आली. अहवालानुसार, ३० आस्थापनांचे परवाने किंवा नोंदणी प्रमाणपत्रे निलंबित करण्यात आली आणि मोठ्या प्रमाणात खाद्यपदार्थ जप्त करण्यात आले. १९०४ मध्ये सुरू झालेले Kyani & Co. Cafe हे मुंबईतील सर्वात जुन्या इराणी कॅफेपैकी एक आहे. एवढा मोठा इतिहास असलेल्या या कॅफेवर एफडीएने केलेल्या कारवाईमुळे त्याच्या स्वच्छतेबद्दल प्रश्न निर्माण झाले आहेत.
