गुरुवार, 12 नोव्हेंबर 2026
मुंबईला पुन्हा बॉम्बने उडवण्याची धमकी! महापौर कार्यालयासह विमानतळ, कोर्ट आणि अमिताभ बच्चन यांचा बंगला निशाण्यावर
Mumbai Bomb Threat: मुंबईला बॉम्बने उडवून देण्याची धमकी देणारा ईमेल पुन्हा एकदा मिळाला असून शहरातील सुरक्षा यंत्रणा सतर्क झाल्या आहेत. काही दिवसांपूर्वीच देशाची आर्थिक राजधानी असलेल्या मुंबईतील महत्त्वाच्या ठिकाणांना बॉम्बने उडवून देण्याची धमकी देण्यात आली होती. या घटनेला आठवडा उलटण्याआधीच गुरुवारी (१२ नोव्हेंबर) पुन्हा धमकीचा ईमेल आल्याने खळबळ उडाली आहे.
मिळालेल्या माहितीनुसार, या नव्या धमकीच्या ईमेलमध्ये मुंबई महापौर कार्यालय, शहरातील बँक, न्यायालय, बॉलिवूड अभिनेते अमिताभ बच्चन यांचा जुहू येथील जलसा बंगला, महालक्ष्मी रेसकोर्स आणि छत्रपती शिवाजी महाराज आंतरराष्ट्रीय विमानतळाचा उल्लेख करण्यात आला आहे. या महत्त्वाच्या ठिकाणांना बॉम्बने उडवून देण्याची धमकी मेलमध्ये देण्यात आल्याचे समोर आले आहे.
विशेष म्हणजे, यापूर्वी प्राप्त झालेल्या धमकीच्या ईमेलमध्ये महापौर कार्यालय, न्यायालयाची इमारत, बॉम्बे स्टॉक एक्सचेंज (BSE), वरळी रेसकोर्स आणि अमिताभ बच्चन यांच्या जलसा बंगल्याचा उल्लेख करण्यात आला होता. आता पुन्हा अशाच स्वरूपाचा धमकीचा मेल आल्याने सुरक्षा यंत्रणांसमोर आव्हान निर्माण झाले आहे.
नव्या धमकीच्या ईमेलमध्ये मुंबई महापालिकेचाही उल्लेख असल्याने पालिका प्रशासन आणि सुरक्षा यंत्रणा तातडीने सतर्क झाल्या. महापालिका परिसरात तपासणी सुरू करण्यात आली. ही तपासणी पूर्ण झाली असून, तेथे कोणतीही संशयास्पद वस्तू आढळली नसल्याची माहिती समोर आली आहे.
दरम्यान, धमकीचा ईमेल मिळाल्यानंतर संबंधित ठिकाणांच्या सुरक्षेबाबत यंत्रणा अलर्ट मोडवर आल्या आहेत. ईमेलचा स्रोत, धमकीमागील उद्देश आणि त्याची विश्वासार्हता याबाबत तपास सुरू आहे. वारंवार अशा प्रकारचे धमकीचे ईमेल येत असल्याने मुंबईतील महत्त्वाच्या ठिकाणांच्या सुरक्षेचा प्रश्न पुन्हा ऐरणीवर आला आहे.
कोलकाताहून मुंबईला येणाऱ्या एअर इंडियाच्या (AI 2772) विमानात अपहरणाची धमकी देणारी चिठ्ठी आढळल्याने एकच खळबळ उडाली होती. मात्र, संबंधित अधिकाऱ्यांनी विमानाची कसून तपासणी केल्यानंतर कोणतीही संशयास्पद वस्तू आढळली नाही. त्यामुळे या विमानाचे उड्डाण पुन्हा सुरू करण्यास मंजुरी देण्यात आली आहे. प्रवाशांना पुन्हा विमानात बसवण्यात आले असून, हे विमान लवकरच मुंबईसाठी रवाना होणार आहे.
एअर इंडियाचे हे A320 विमान कोलकाताहून मुंबईला येत होते. विमानाचा नोंदणी क्रमांक VT-TNH आहे. ११ नोव्हेंबर रोजी सकाळी १० वाजून ३७ मिनिटांनी केबिन क्रूला विमानातील वॉशरूममध्ये एक चिठ्ठी आढळली. या चिठ्ठीत विमान अपहरणाची धमकी देण्यात आल्याचे समोर आले. चिठ्ठी आढळताच केबिन क्रूने याची माहिती वैमानिकांना दिली. त्यानंतर वैमानिकांनी एअर ट्रॅफिक कंट्रोलला (ATC) सतर्क केले. विमानतळ प्रशासनाने निर्धारित सुरक्षा प्रक्रियेनुसार (SOP) विमानाला कोलकाता विमानतळावरील आयसोलेशन बेमध्ये नेले.
Ans: गुरुवार, १२ नोव्हेंबर रोजी मुंबईला बॉम्बने उडवण्याचा धमकीचा ईमेल प्राप्त झाला.
Ans: महापौर कार्यालय, मुंबईतील बँक, न्यायालय, अमिताभ बच्चन यांचा जलसा बंगला, महालक्ष्मी रेसकोर्स आणि छत्रपती शिवाजी महाराज आंतरराष्ट्रीय विमानतळाचा उल्लेख करण्यात आला.
Ans: महापालिकेतील तपासणी पूर्ण झाली असून कोणतीही संशयास्पद वस्तू आढळली नसल्याची माहिती समोर आली आहे.
