‘आपले सरकार’ पोर्टल बुधवारपर्यंत बंद; विद्यार्थ्यांसह नागरिकांचीही होणार गैरसोय

विद्यार्थी, नागरिकांमध्ये नाराजी व्यक्त होत आहे. आपले सरकार पोर्टलवरील सेवांची तांत्रिक देखभाल करणे आवश्यक असेल, तर ती दिवाळीच्या सुट्टीच्या कालावधीत करता आली असती.

• शैक्षणिक कागदपत्रांसाठी कोंडी
• पर्यायी व्यवस्था उपलब्ध करून द्यावी
• विविध सेवांसाठी ‘वेट’; विद्यार्थी झाले हैराण

मुंबई : डेटा सेंटरचे स्थलांतर आणि तांत्रिक प्रणालीचे अद्ययावतीकरण करण्यासाठी महाराष्ट्र शासनाच्या ‘आपले सरकार’ पोर्टलवरील सेवा तात्पुरत्या बंद केल्या जाणार आहेत. सूत्रांच्या माहितीनुसार, १६ ऑक्टोबर २०२६ रोजी सायंकाळी ४ ते २१ ऑक्टोबर २०२६ या कालावधीसाठी पोर्टलवरील सेवा बंद राहणार आहे.

शासनाकडून शासकीय सेवा अधिकाधिक ऑनलाइन करण्यावर भर दिला जात असताना, तांत्रिक कारणांमुळे सेवा अनेक दिवस बंद राहिल्यास नागरिकांची गैरसोय होऊ शकते. विद्यार्थ्यांचे शैक्षणिक प्रवेश, शिष्यवृत्ती अर्ज, विविध प्रमाणपत्रे आणि अंतिम मुदतीशी संबंधित कामे प्रलंबित राहण्याची शक्यता व्यक्त होत आहे. त्यामुळे पोर्टल बंद असलेल्या कालावधीत पर्यायी व्यवस्था उपलब्ध करून द्यावी, मुदतीच्या आत अर्ज सादर करू न शकलेल्या नागरिकांना आवश्यकतेनुसार दिलासा द्यावा आणि पोर्टल पुन्हा सुरू होण्याची निश्चित वेळ अधिकृतपणे जाहीर करावी, अशी मागणी नागरिकांकडून होत आहे.

Baramati News : रेवती सुळे, जय पवार यांच्यावर नवी जबाबदारी; विद्या प्रतिष्ठानमध्ये महत्त्वाची घोषणा

एकीकडे या निर्णयामुळे नागरिकांना असुविधा होणार आहे तर दुसरीकडे केंद्र चालकांना आर्थिक फटका बसणार आहे. विशेषतः आपले सरकार सेवा केंद्रे आणि महा ई-सेवा केंद्रांमार्फत नागरिकांना सेवा देणाऱ्या चालकांसमोरही अडचणी निर्माण होण्याची शक्यता वर्तवली जात आहे.

शैक्षणिक कागदपत्रांसाठी कोंडी

या निर्णयामुळे विद्यार्थी, नागरिकांमध्ये नाराजी व्यक्त होत आहे. आपले सरकार पोर्टलवरील सेवांची तांत्रिक देखभाल करणे आवश्यक असेल, तर ती दिवाळीच्या सुट्टीच्या कालावधीत करता आली असती. ऐन कामकाजाच्या दिवसांत पोर्टल बंद ठेवल्यामुळे विद्यार्थी, सर्वसामान्य नागरिकांची मोठी गैरसोय होणार आहे.

पर्यायी व्यवस्था उपलब्ध करून द्यावी

अनेक नागरिकांची महत्त्वाची कामे आणि शासकीय योजनांचे अर्ज अंतिम मुदतीत पूर्ण होणे आवश्यक असते. त्यामुळे शासनाने तातडीने पर्यायी व्यवस्था उपलब्ध करून द्यावी, प्रलंबित कामांसाठी आवश्यक मुदतवाढ द्यावी आणि नागरिकांचे आर्थिक व शैक्षणिक नुकसान होणार नाही, याची दक्षता घ्यावी, अशी मागणी नागरिकांकडून होत आहे.

विविध सेवांसाठी ‘वेट’; विद्यार्थी झाले हैराण

आपले सरकार पोर्टलच्या माध्यमातून नागरिक उत्पन्नाचा दाखला, रहिवासी दाखला, जात प्रमाणपत्र तसेच विविध शासकीय सेवांसाठी ऑनलाइन अर्ज करतात. पोर्टल बंद राहिल्याने नवीन अर्ज दाखल करणे, आवश्यक कागदपत्रे अपलोड करणे आणि अर्जाची स्थिती तपासणे यांसारख्या कामांवर परिणाम होण्याची शक्यता आहे. नागरिकांना यासाठी प्रतीक्षा करावी लागणार आहे.