abvp mumbai nivedan
मुंबई, नवराष्ट्र न्यूज नेटवर्क / नीता परब : अखिल भारतीय विद्यार्थी परिषदेच्या वतीने शासकीय वसतिगृहातील विद्यार्थ्यांच्या विविध मूलभूत समस्यांकडे प्रशासनाचे लक्ष वेधण्यासाठी उच्च शिक्षण विभागाच्या संयुक्त संचालकांना निवेदन सादर करण्यात आले. यावेळी वसतिगृहातील विद्यार्थ्यांनीही एकत्रितपणे सहभागी होत आपल्या प्रलंबित समस्या प्रशासनासमोर मांडल्या. निवेदनानंतर या प्रश्नांवर संयुक्त संचालकांसोबत सविस्तर चर्चा करण्यात आली. (ABVP Mumbai)
शासकीय वसतिगृहांमध्ये विद्यार्थ्यांना भेडसावणाऱ्या पिण्याच्या पाण्याची समस्या, लिफ्टची अकार्यक्षमता, नियमित स्वच्छतेचा अभाव, कॅन्टीनमधील अस्वच्छता व गैरसोयी, तसेच इमारतीच्या दुरवस्थेसह अनेक महत्त्वाच्या प्रश्नांकडे या निवेदनाद्वारे लक्ष वेधण्यात आले. याशिवाय उंदीर, कबुतरे व ढेकणांचा प्रादुर्भाव रोखण्यासाठी प्रभावी उपाययोजना करणे, प्रत्येक मजल्यावर पिण्याच्या पाण्याची सुविधा उपलब्ध करून देणे, वाचनालयाचे नूतनीकरण करणे, संगणक सुविधा कार्यान्वित करणे, वसतिगृहात सुरळीत वाय-फाय सुविधा उपलब्ध करून देणे, तसेच भोजनाच्या गुणवत्तेवर नियंत्रण ठेवण्यासाठी वसतिगृह भोजन समिती स्थापन करणे या मागण्याही करण्यात आल्या. विद्यार्थी कल्याण निधीच्या वापराबाबत पारदर्शकता राखण्याबाबतची मागणीदेखील अभाविपच्या वतीने करण्यात आली.
विद्यार्थ्यांच्या शैक्षणिक प्रवासात वसतिगृहाची भूमिका अत्यंत महत्त्वाची असून, तेथील मूलभूत सुविधांच्या अभावामुळे विद्यार्थ्यांच्या दैनंदिन जीवनावर आणि शिक्षणावर परिणाम होता कामा नये. विद्यार्थ्यांना सुरक्षित, स्वच्छ आणि सन्मानजनक वातावरण उपलब्ध करून देणे ही प्रशासनाची जबाबदारी आहे, अशी भूमिका यावेळी अभाविपच्या पदाधिकाऱ्यांनी मांडली.
विद्यार्थ्यांनी मांडलेल्या समस्यांची संयुक्त संचालकांनी दखल घेत आवश्यक कार्यवाही करण्याचे आश्वासन दिले. मात्र, केवळ आश्वासन नको तर प्रत्यक्ष कार्यवाही व्हावी, यासाठी अभाविपच्या वतीने प्रशासनाला ११ दिवसांची मुदत देण्यात आली आहे. या कालावधीत मागण्यांची पूर्तता न झाल्यास वसतिगृहातील विद्यार्थ्यांना सोबत घेऊन तीव्र आंदोलन छेडण्यात येईल, असा स्पष्ट इशारा अभाविपने दिला आहे. याप्रसंगी अभाविप मुंबई महानगर मंत्री अभिषेक पवार, मुंबई महानगर वसतिगृह प्रमुख अथर्व, अभाविपचे अन्य कार्यकर्ते तसेच शासकीय वसतिगृहातील विद्यार्थी उपस्थित होते.
याबाबत बोलताना अभाविपचे मुंबई महानगर मंत्री अभिषेक पवार म्हणाले, “वसतिगृहातील विद्यार्थ्यांना मूलभूत सुविधा मिळणे हा त्यांचा अधिकार आहे. प्रशासनाने ११ दिवसांत या समस्यांचे निराकरण करावे, अन्यथा अभाविप विद्यार्थ्यांना सोबत घेऊन आंदोलन करण्यात येईल. विद्यार्थ्यांच्या हक्कांशी कोणतीही तडजोड केली जाणार नाही.”
Asha Workers : मुंबईतील आशा सेविकांची दिवाळी अंधारात? बोनस न मिळाल्यास ‘भीक मांगो’ आंदोलनाचा इशारा!
.png "Videos"){kind=small}
