मंगळवार, 22 सप्टेंबर 2026
राज्यातील तब्बल साडेपाच लाख शेतकरी कर्जमाफी प्रतीक्षेत; कर्जमाफीची यादी पाठवली परत(फोटो सौजन्य: सोशल मीडिया)
मुंबई : राज्य सरकारकडून जाहीर शेतकरी कर्जमाफी योजनेत २ लाख रुपयांपर्यंत थकीत कर्ज असलेल्या आणखी ५ लाख ५० हजार शेतकऱ्यांना लाभ मिळण्यास विलंब होत आहे. संबंधित शेतकऱ्यांची यादी सहकार विभागाने ४ ते ५ बँकांकडे परत पाठवली आहे. बँकांकडून सादर करण्यात आलेल्या कर्जाच्या आकडेवारीत तफावत आढळल्याने यादी परत पाठवण्यात आल्याची माहिती दिली.
बँकांनी शेतकऱ्यांच्या कर्जावर अधिक व्याज आकारल्याचे, तसेच बँक खात्याचा तपशील आणि कर्ज प्रकरणातील माहितीमध्ये विसंगती असल्याचे सहकार विभागाच्या निदर्शनास आले आहे. अतिरिक्त निधी मिळवण्यासाठी चुकीच्या पद्धतीने व्याज आकारले, असा संशयही व्यक्त करण्यात येत आहे.
दरम्यान, बँकांकडून दुरुस्त केलेली यादी मिळताच संबंधित शेतकऱ्यांना कर्जमाफीचा लाभ दिला जाणार आहे. २ लाखांपर्यंत थकीत कर्ज असलेल्या शेतकऱ्यांना कर्जमाफी देण्याची प्रक्रिया पूर्ण झाल्यानंतर २ लाख रुपयांपेक्षा अधिक थकीत कर्ज असलेल्या शेतकऱ्यांनाही लवकरच प्रोत्साहनपर लाभ मिळणार आहे.
सोशल मीडियावरील दुष्काळ यादी बनावट
राज्यात दुष्काळग्रस्त जिल्ह्यांची यादी सोशल मीडियावर व्हायरल होत आहे. मात्र, सरकारकडून अशी कोणतीही अधिकृत यादी जाहीर करण्यात आलेली नाही. कृषिमंत्री दत्तात्रय भरणे यांनी खामगाव येथे सावध केले. याबाबत शेतकऱ्यांना व्हायरल होणाऱ्या बनावट यादीवर विश्वास ठेवू नये, असे आवाहन त्यांनी केले. बनावट यादी करून ती प्रसारित करणाऱ्यांवर कारवाईचा इशाराही त्यांनी दिला.
१ लाख ८५ हजार हेक्टर क्षेत्रावरील पिकांना विमा संरक्षण
खरीप हंगामातील पिकांना नैसर्गिक आपत्तीपासून आर्थिक संरक्षण मिळावे, यासाठी प्रधानमंत्री पीकविमा योजना राबविण्यात येत आहे. या योजनेत जिल्ह्यातील अनेक शेतकऱ्यांनी सहभाग नोंदविला आहे. जिल्ह्यात ९४ हजार ४२३ शेतकऱ्यांनी कर्जदार आणि बिगर कर्जदार अशा १ लाख ७५ हजार २१५ अर्जाची नोंदणी झाली आहे. या माध्यमातून तब्बल १ लाख ८५ हजार ३०१ हेक्टर क्षेत्रावरील पिकांना विमा संरक्षण मिळाले आहे. यासाठी शेतकऱ्यांनी एकत्रित १ कोटी १३ लाख ३२ हजार रुपये विमा हप्ता भरला आहे.
