सोलापूर डीसीसी बँक निवडणुकीत स्वाभिमानी पॅनलचा प्रचार जोरात
सोलापूर शहर प्रतिनिधी : सोलापूर जिल्हा मध्यवर्ती सहकारी बँकेच्या निवडणुकीची रणधुमाळी सुरू असताना स्वाभिमानी शेतकरी सहकार पॅनलने प्रचाराला वेग दिला आहे. रविवार, दि. २२ रोजी सोलापुरातील एका हॉटेलच्या सभागृहात माजी आमदार रणजितसिंह मोहिते-पाटील आणि खासदार धैर्यशील मोहिते-पाटील यांच्या मार्गदर्शनाखाली पॅनलची विचारविनिमय बैठक पार पडली. (Solapur DCC Bank Election)
यावेळी मार्गदर्शन करताना माजी आमदार रणजितसिंह मोहिते-पाटील यांनी आपल्या चेअरमनपदाच्या कार्यकाळातील कामकाजाचा आढावा मांडला. आपण चेअरमन असताना कोणत्याही खासगी संस्थेला एक रुपयाचेही कर्ज दिले नसल्याचे त्यांनी स्पष्ट केले. मात्र, अक्कलकोट तालुक्यात अलीकडील काळात झालेल्या १० कोटी रुपयांच्या कर्जवाटपावर त्यांनी प्रश्नचिन्ह उपस्थित केले.
२००४ मध्ये आपल्या अध्यक्षतेखालील संचालक मंडळाच्या कार्यकाळात बँकेला लायसन्स मिळवून दिल्याचे सांगून ते म्हणाले, “सध्या आम्ही कोणावरही टीका-टिप्पणी न करता केवळ बँकिंगच्या मुद्द्यांवर प्रचार करीत आहोत. आमच्या पाच वर्षांच्या कार्यकाळात बँकेच्या १,५०० कोटी रुपयांच्या ठेवी दुप्पट केल्या. शेतकऱ्यांना कर्जवाटप करण्यासाठी कर्जपत्रक काढण्यात आले होते. नवीन-जुने कर्जवाटप बंद ठेवल्यामुळे सोलापूर जिल्ह्यातील सव्वादोन लाख शेतकऱ्यांना ६०० कोटी रुपयांची कर्जमाफी मिळाली आहे,” असे त्यांनी सांगितले.
Nashik Politics : नाशिक महापालिकेत स्वीकृत सदस्य निवडीचा वाद; नवीन शहराध्यक्षांच्या नियुक्तीची चर्चा
बँकेत जबाबदार व्यक्तींना संचालक म्हणून पाठवून शेतकऱ्यांच्या हिताच्या विविध योजना राबविण्याचा अजेंडा त्यांनी यावेळी मांडला. पॅनलच्या उमेदवारांना निवडून देण्याचे आवाहनही त्यांनी केले.
पॅनलचे उमेदवार अमोल शिंदे म्हणाले, “जिल्हा मध्यवर्ती बँकेच्या निवडणुकीत उमेदवारी मिळेल, असे कधी वाटले नव्हते. मोहिते-पाटील बंधू स्वतः उमेदवार नसतानाही कार्यकर्त्यांचा पॅनल निवडून आणण्यासाठी प्रयत्न करीत आहेत. पॅनलचे सर्व उमेदवार निवडून येतील,” असा विश्वास त्यांनी व्यक्त केला. या बैठकीस डॉ. अनिकेत देशमुख, अमोल शिंदे, अस्मिता गायकवाड, वसंतनाना देशमुख, चेतन नरोटे, महेश गादेकर, प्रताप चव्हाण, शिवसेना जिल्हाप्रमुख अमर पाटील, माजी महापौर आरिफ शेख, संजय हेमगड्डी, राजू सुपाते, प्रवीण डोंगरे, भारत जाधव, ज्ञानेश्वर सपाटे आदींसह कार्यकर्ते व नागरिक उपस्थित होते.
यावेळी स्वाभिमानी शेतकरी सहकार पॅनलचे उमेदवार ॲड. दत्तात्रय खडतरे यांनी बोत्रे-पाटील यांच्या कारखान्यांना दिलेल्या ८८७ कोटी रुपयांच्या कर्जाचा मुद्दा उपस्थित केला. या कर्जवाटपाचे ऑडिट करण्याचा इशारा देत त्यांनी निवडणूक निधीबाबतही प्रश्न उपस्थित केले. गोरे इंग्रज गेले आणि देशी गोरे आले, अशी टीका करत बँकेत आमचीच सत्ता येईल आणि विरोधी गटातील चार उमेदवार आमच्याकडे येतील, असा दावाही त्यांनी केला.
एकीकडे जुन्या कामांचा लेखाजोखा, तर दुसरीकडे कोट्यवधींच्या कर्जाच्या ऑडिटची मागणी, यामुळे सोलापूर डीसीसी बँकेची निवडणूक आता चांगलीच रंगात आली आहे.
Ans: स्वाभिमानी शेतकरी सहकार पॅनलने निवडणुकीच्या प्रचाराला वेग दिला असून, रणजितसिंह मोहिते-पाटील आणि खासदार धैर्यशील मोहिते-पाटील यांच्या मार्गदर्शनाखाली विचारविनिमय बैठक घेण्यात आली.
Ans: २००४ मध्ये आपल्या अध्यक्षतेखालील संचालक मंडळाच्या काळात बँकेला लायसन्स मिळवून दिले आणि पाच वर्षांच्या कार्यकाळात बँकेच्या १,५०० कोटी रुपयांच्या ठेवी दुप्पट केल्या, असा दावा त्यांनी केला.
Ans: स्वाभिमानी शेतकरी सहकार पॅनलचे उमेदवार ॲड. दत्तात्रय खडतरे यांनी बोत्रे-पाटील यांच्या कारखान्यांना दिलेल्या ८८७ कोटी रुपयांच्या कर्जाच्या ऑडिटची मागणी केली.






