मोठी बातमी! IIT बॉम्बेच्या आंदोलक विद्यार्थ्यांच्या 18 मागण्या मान्य; 3 तासांच्या बैठकीनंतर आरोपी प्राध्यापक निलंबित
मात्र, १८ मागण्यांच्या चार्टरवर संचालकांनी स्वाक्षरी केली असली तरी सर्व मागण्या तातडीने पूर्ण किंवा अंमलात आणण्यात आल्या आहेत, असा त्याचा अर्थ नाही. मागण्यांच्या अंमलबजावणीसह पुढील कार्यवाहीबाबत अधिकृत माहिती समोर येणे अपेक्षित आहे.
विद्यार्थ्यांनी साहिल वाकोडेच्या मृत्यूच्या परिस्थितीची स्वतंत्र चौकशी करण्याची मागणी केली आहे. याशिवाय संबंधित प्राध्यापकावर कारवाई, शिक्षकांसाठी आचारसंहिता, विद्यार्थ्यांसाठी मानसिक आरोग्य आणि समुपदेशन सेवा अधिक सक्षम करणे तसेच महत्त्वाच्या प्रशासकीय निर्णयांमध्ये विद्यार्थ्यांचा सहभाग वाढवण्याची मागणी करण्यात आली आहे.
विद्यार्थ्यांनी संस्थेकडून साहिलसंदर्भात प्रसिद्ध करण्यात आलेल्या माहितीबाबतही आक्षेप नोंदवत सार्वजनिक माफीची मागणी केली आहे. स्वतंत्र चौकशीच्या अंतरिम आणि अंतिम अहवालांसाठीही विद्यार्थ्यांनी मुदत निश्चित करण्याची मागणी केली आहे.
साहिल वाकोडे हा IIT बॉम्बेच्या ऊर्जा विज्ञान आणि अभियांत्रिकी विभागातील द्वितीय वर्षाचा विद्यार्थी होता. १८ सप्टेंबर रोजी तो हॉस्टेलच्या खोलीत मृतावस्थेत आढळला. त्याच दिवशी परीक्षेदरम्यान मोबाइल फोन वापरल्याचे निदर्शनास आल्याचे IIT बॉम्बेने म्हटले आहे. संस्थेच्या म्हणण्यानुसार, साहिलविरुद्ध कोणतीही शिस्तभंगाची कारवाई सुरू करण्यात आली नव्हती. त्याच्याशी संबंधित शिक्षक आणि विभागप्रमुखांनी चर्चा करून त्याचे समुपदेशन केले होते आणि या घटनेचा त्याच्या शैक्षणिक कारकिर्दीवर विपरीत परिणाम होणार नसल्याचे सांगण्यात आले होते.
साहिलचे वडील रवींद्र वाकोडे यांनी मात्र प्राध्यापक सूर्यनारायण दुल्ला यांच्यावर गंभीर आरोप केले आहेत. त्यांच्या तक्रारीनुसार, साहिलला मागील काही महिन्यांपासून जातीय टिप्पणी आणि मानसिक त्रास सहन करावा लागत होता. खोट्या प्रकरणात अडकवण्याची धमकी दिल्याचाही आरोप तक्रारीत करण्यात आला आहे. हे आरोप सध्या तपासाचा विषय आहेत. संबंधित आरोप सिद्ध झालेले नसून या प्रकरणाचा तपास सुरू आहे.
साहिलच्या वडिलांच्या तक्रारीनंतर पवई पोलिसांनी प्रा. सूर्यनारायण दुल्ला आणि इतर संबंधितांविरोधात गुन्हा दाखल केला आहे. यामध्ये आत्महत्येस प्रवृत्त केल्याच्या आरोपासह अनुसूचित जाती-जमाती अत्याचार प्रतिबंधक कायद्यातील तरतुदींचा समावेश करण्यात आला आहे.
या प्रकरणाचा तपास मुंबई पोलिसांच्या गुन्हे शाखेकडे वर्ग करण्यात आला आहे. त्यामुळे साहिलच्या मृत्यूमागील नेमक्या परिस्थितीचा तपास आता गुन्हे शाखेकडून केला जात आहे.
IIT बॉम्बे प्रशासनाने जातीय भेदभावाच्या आरोपांना नकार दिला आहे. साहिलला परीक्षेतील घटनेनंतर शैक्षणिक कारकिर्दीबाबत आश्वस्त करण्यात आले होते, अशी संस्थेची भूमिका आहे. दुसरीकडे, साहिलच्या कुटुंबीयांनी केलेल्या आरोपांनंतर पोलिसांकडून स्वतंत्र तपास सुरू आहे.
IIT बॉम्बेच्या Faculty Forum नेही संबंधित प्राध्यापकाची बाजू मांडली असून परीक्षेदरम्यान मोबाइलचा अनधिकृत वापर हा शैक्षणिक गैरप्रकार असल्याचे म्हटले आहे.
साहिलच्या मृत्यूनंतर IIT बॉम्बेच्या विद्यार्थ्यांनी कॅम्पसमध्ये आंदोलन सुरू केले. स्वतंत्र आणि पारदर्शक चौकशीसह प्रशासनाची जबाबदारी निश्चित करण्याची मागणी आंदोलकांनी केली. तीन दिवस चाललेल्या आंदोलनानंतर संचालक प्रा. शिरीष केदारे यांनी विद्यार्थ्यांशी चर्चा केली आणि १८-सूत्री चार्टरवर स्वाक्षरी केली.
आता या मागण्यांपैकी कोणत्या मागण्यांची कशा पद्धतीने आणि किती कालावधीत अंमलबजावणी केली जाते, तसेच गुन्हे शाखेच्या तपासातून काय निष्पन्न होते, याकडे विद्यार्थी आणि साहिलच्या कुटुंबीयांचे लक्ष लागले आहे.
.png "Videos"){kind=small}
