गुरुवार, 1 ऑक्टोबर 2026
मुंबईकरांसाठी मोठी बातमी! ऑक्टोबरमध्ये ३ महत्त्वाचे उड्डाणपूल होणार खुले; वाहतूककोंडीची समस्या सुटणार
CSMTवर ७५ दिवसांचा ब्लॉक; ८ मेल-एक्स्प्रेस गाड्यांचा प्रवास दादर-ठाण्यातच संपणार
११२ वर्षे जुना रेल्वे पूल सुरक्षेच्या कारणास्तव ठेवला बंद
मध्य रेल्वे मार्गावरील सायन स्थानकालगत असलेला ११२ वर्षे जुना रेल्वे पूल सुरक्षेच्या कारणास्तव ऑगस्ट २०२४ पासून सर्व प्रकारच्या वाहतुकीसाठी पूर्णपणे बंद करण्यात आला होता. विविध तांत्रिक अडचणींमुळे या पुलाच्या कामाची मुदत दोन वेळा वाढवावी लागली होती. पूल बंद असल्याने सायन, धारावी आणि
एलबीएस मार्गावर दररोज प्रचंड कोडी होत होती. आता हे काम अंतिम टप्यात पोहोचले असून प्रशासनाने येत्या १५ ऑक्टोबरपर्यंत हा पूल वाहतुकीसाठी खुला करण्याचे उद्दिष्ट ठेवले आहे, ज्यामुळे परिसरातील वाहनचालक आणि नागरिकांना मोठा दिलासा मिळणार आहे.
विद्याविहार रेल्वे उड्डाणपूल अखेर पूर्णत्वाकडे
पूर्व उपनगरातील गेल्या आठ वर्षांपासून मुंबईकरांच्या प्रतीक्षेत असलेला विद्याविहार रेल्वे उड्डाणपूलही अखेर पूर्णत्वाकडे पोहोचला आहे. सुमारे १७८ कोटी रुपये खर्चुन उभारण्यात येत असलेला हा चारपदरी पूल सुरू झाल्यानंतर विद्याविहार पूर्व आणि पश्चिमेतील थेट दळणवळण सुलभ होणार आहे. या पुलामुळे घाटकोपर परिसर तसेच सांताक्रुझ चेंबूर लिंक रोडवरील वाहतुकीचा अतिरिक्त ताण लक्षणीयरीत्या कमी होण्यास मोठी मदत होणार आहे.
प्रवासाचा वेळ ७५ वरून २५ मिनिटांवर
पश्चिम उपनगरातील गोरेगाव येथील १.२६ किलोमीटर लांबीचा नवीन उड्डाणपूल दादासाहेब फाळके चित्रनगरी परिसराला थेट जोडणार आहे. या पुलाचे मुख्य बांधकाम पूर्ण झाले असून, ऑक्टोबरच्या दुसऱ्या आठवड्यात पुलाची ‘लोड टेस्ट’ घेतली जाणार आहे. ही चाचणी यशस्वी झाल्यानंतर १५ ऑक्टोबरपर्यंत हा पूल पूर्ण क्षमतेने वाहतुकीसाठी खुला केला जाईल. या पुलामुळे पूर्व आणि पश्चिम उपनगरांना जोडणाऱ्या मार्गावरील प्रवासाचा वेळ तब्बल ७५ मिनिटांवरून थेट २५ मिनिटांवर येणार असल्याने प्रवाशांचे तब्बल ५० मिनिटे वाचणार आहेत. सणासुदीच्या तोंडावर हे तिन्ही महत्वाचे मार्ग खुले होत असल्याने मुंबईकरांचा प्रवास वेगवान आणि सुकर होणार आहे, अशी माहिती पालिकेच्या वरिष्ठ अधिकाऱ्यांनी दिली आहे.
(डिस्क्लेमर: हे नवराष्ट्र वृत्तपत्राचे स्वयंचलित न्यूज फीड आहे. ते navarashtra.com च्या कर्मचाऱ्यांनी संपादित केलेले नाही.)
