राज्यातील अनेक भागांत मुसळधार पावसाची शक्यता; विदर्भासह कोकणातही दिलासा मिळणार

विदर्भातील अकोला, अमरावती, बुलढाणा आणि नागपूर जिल्ह्यांत विजांसह पावसाचा अंदाज आहे. तसेच, पालघर, ठाणे, नंदुरबार आणि नाशिक घाटमाथ्यावर जोरदार पावसाचा यलो अलर्ट देण्यात आला आहे.

मुंबई : गेल्या काही दिवसांपासून वातावरणात कमालीचा बदल जाणवत आहे. ऑगस्टनंतर पावसाने उघडीप घेतल्याचे दिसत आहे. त्यामुळे आता अनेक ठिकाणी उन्हाचा कडाका देखील अनुभवत आहे. असे असताना आता विदर्भातील बुलढाणा, अकोला, अमरावती आणि नागपूर जिल्ह्यांत विजांसह पावसाचा अंदाज आहे. उर्वरित भागांत हलक्या ते मध्यम सरी कोसळण्याची शक्यता असल्याचे हवामान विभागाने म्हटले आहे.

यंदा अल निनोच्या संकटामुळे पावसाने सुरुवातीपासूनच हुलकावणी दिली. जूनमध्ये उशिराने झालेल्या पावसानंतर शेतकऱ्यांनी पेरण्यांना वेग दिला. पिके ऐन वाढीच्या अवस्थेत असतानाच पुन्हा पावसाने दडी मारली. हा खंड तब्बल ४५ दिवसांचा ठरला. त्यामुळे अनेक भागांतील पिकांवर रोगराई पसरली, तर काही ठिकाणी पिके कोमेजण्याच्या मार्गावर होती. मात्र, मागील दोन दिवसांपासून सुरू असलेल्या पावसामुळे शेतकऱ्यांना काहीसा दिलासा मिळाला आहे. या पावसाने कापूस आणि तूरपिकाला संजीवनी मिळाली आहे.

ऑगस्टच्या उत्तरार्धात आणि सप्टेंबरच्या सुरुवातीला पावसाने दिलेली ओढ तसेच उन्हाळ्यासारखे तापलेले ऊन यामुळे हलक्या व उतारावरील जमिनीतील सोयाबीनचे पीक वाचविणे कठीण झाले होते. आता पाऊस झाला असला तरी अनेक भागांतील सोयाबीन पूर्णपणे वाळले आहे. ओलावा टिकून राहिल्याने पिकांची स्थिती समाधानकारक आहे. मात्र, झालेला पाऊस पुरेसा नसल्याचे शेतकऱ्यांचे म्हणणे आहे.

अनेक ठिकाणी पावसाचा ‘यलो अलर्ट’

विदर्भातील अकोला, अमरावती, बुलढाणा आणि नागपूर जिल्ह्यांत विजांसह पावसाचा अंदाज आहे. तसेच, पालघर, ठाणे, नंदुरबार आणि नाशिक घाटमाथ्यावर जोरदार पावसाचा यलो अलर्ट देण्यात आला आहे. उर्वरित भागांत हलक्या ते मध्यम सरींची शक्यता हवामान विभागाने व्यक्त केली आहे.

अपुऱ्या पावसामुळे सोयाबीनचे नुकसान

सध्या अकोलेकरांचे लक्ष काटेपूर्णा जलाशयाच्या पाणलोट क्षेत्राकडे लागले असून, तेथे दमदार पावसाची प्रतीक्षा आहे. जिल्ह्यातील प्रमुख पीक असलेल्या सोयाबीनचे झालेले नुकसान या पावसामुळे भरून निघणे शक्य नाही. तसेच, एवढ्याशा पावसामुळे बोअरवेल तसेच भूगर्भातील पाणीपातळीत वाढ होण्यास फारशी मदत होणार नाही, असे जाणकारांचे मत आहे.

धरणातील पाणीसाठ्याकडे लक्ष

अकोला शहराला याच धरणातून पाणीपुरवठा केला जातो. सध्या धरणात केवळ २१ टक्के जलसाठा शिल्लक आहे. त्यामुळे धरणातील जलसाठ्यात वाढ होण्यासाठी वाशिम जिल्ह्यातील पाणलोट क्षेत्रात दमदार पावसाची प्रतीक्षा आहे.

Lab Grown Diamond : भारतातच तयार होणार हिऱ्यांची संपूर्ण मूल्यसाखळी; अमित शाहांचं मोठं आवाहन, नवी मुंबईत ज्वेलरी पार्कची तयारी