फोटो सौजन्य सोशल मीडिया
खासदार मतदारसंघात फिरकत नसल्याचा आरोप करीत काही नागरिकांनी परिसरात ‘लापता खासदार’ असा फलक लावण्याची तयारी सुरू केल्याची चर्चा आहे. वर्धा रोडलगत असलेल्या बेसा-बेलतरोडी परिसराने रिअल इस्टेट क्षेत्रात मोठी झेप घेतली आहे. नव्या इमारती, गृहप्रकल्प आणि वाढत्या लोकवस्तीमुळे हा भाग झपाट्याने विस्तारत आहे. मात्र, लोकसंख्येच्या तुलनेत पायाभूत सुविधांचा विकास झालेला नसल्याने नागरिकांची गैरसोय होत आहे. विकासाच्या दाव्यांमध्ये प्रत्यक्षातील समस्यांकडे दुर्लक्ष होत असल्याची भावना परिसरात व्यक्त होत आहे.
बेसा-बेलतरोडीतील समस्यांबाबत खासदार श्यामकुमार बर्वे यांनी प्रत्यक्ष परिसरात येऊन नागरिकांशी संवाद साधावा, अशी अपेक्षा स्थानिकांकडून व्यक्त होत आहे, मात्र, खासदार या भागात नियमितपणे येत नसल्याचा नागरिकांचा आरोप आहे. २०२३ पासून नोव्हेंबर २०२६ पर्यंत त्यांनी परिसराला किती वेळा भेट दिली, याबाबतही नागरिकांकडून प्रश्न उपस्थित केले जात आहेत, खासदार आपल्या भागाचे प्रतिनिधित्व करतात, याचीही अनेकांना पुरेशी माहिती नसल्याची प्रतिक्रिया स्थानिकांकडून व्यक्त होत आहे.
‘लापता खासदार ‘चा फलक लावण्याची चर्चा परिसरातील समस्यांकडे लक्ष वेधण्यासाठी नागरिक आता आक्रमक भूमिका घेण्याच्या तयारीत आहेत. सोशल मीडिया तसेच परिसरातील चर्चामध्ये ‘लापता खासदार’ असा फलक लावण्याची कल्पना पुढे येत आहे. खासदारांनी परिसराचा दौरा करून नागरिकांच्या समस्या जाणून घ्याव्यात आणि त्यावर ठोस उपाययोजना कराव्यात.
परिसरातील रस्ते अरुंद असल्याने वाढत्या वाहनसंख्येचा ताण त्यांच्यावर पडत आहे. अनेक ठिकाणी वाहतुकीची कोंडी होत असून, वीज आणि पाणीपुरवठ्याबाबतही नागरिकांच्या तक्रारी आहेत. उद्यानाची संख्या अत्यल्प असून सार्वजनिक स्वच्छतागृहांचीही पुरेशी व्यवस्था नाही. विशेष म्हणजे, बांधून तयार असलेली स्मशानभूमी अद्याप कुलूपबंद असल्याचा आरोप नागरिकांनी केला आहे. त्यामुळे अंत्यसंस्कारासाठीही नागरिकांना अडचणींचा सामना करावा लागत आहे.
बेसा-बेलतरोडीतील नागरिकांच्या मते, यापूर्वीच्या खासदारांच्या कार्यकाळातही या भागाकडे पुरेसे लक्ष दिले गेले नाही. रामटेक लोकसभा मतदारसंघाशी संबंधित कामांसाठी नागरिकांना लांबचा प्रवास करावा लागतो. अनेकदा ७० ते ८० किलोमीटर अंतर पार करून लोकप्रतिनिधींपर्यंत पोहोचावे लागते.
याउलट नागपूर शहरातील लोकप्रतिनिधी परिसरापासून तुलनेने जवळ आहेत. त्यामुळे बेसा-बेलतरोडीचा नागपूर शहरात समावेश करावा, अशी मागणी नागरिकांकडून होत आहे. नागपूरचे खासदार अनेकदा या भागात भेट देतात, मात्र ग्रामीण मतदारसंघाच्या खासदारांकडून अपेक्षित संपर्क होत नसल्याची भावना नागरिक व्यक्त करतात.






