Nagpur Crime : पोलिस पहाऱ्यातून मकोका आरोपी पसार !

Nagpur Crime : नागपूरमध्ये पोलिसांच्या पहाऱ्यात असलेला मकोका आरोपी पसार झाल्याची घटना समोर आली आहे. आरोपीच्या फरारीनंतर पोलिसांनी त्याचा शोध सुरू केला असून, सुरक्षाव्यवस्थेबाबतही प्रश्न उपस्थित झाले आहेत.

• सीसीटीव्ही फुटेजची तपासणी
• अनेक गंभीर गुन्हे दाखल
• सुरक्षा व्यवस्थेवर प्रश्नचिन्ह

Nagpur Crime : मकोका प्रकरणात कारागृहात असलेला आरोपी शेख समीर शेख रहीम शनिवारी सकाळी शासकीय वैद्यकीय महाविद्यालय व रुग्णालयातून (मेडिकल) पोलिसांना गुंगारा देत पसार झाला. त्याला दोन दिवसांपूर्वीच उपचारासाठी कारागृहातून मेडिकलमध्ये दाखल केले होते. पहिल्या मजल्यावरील शौचालयाची काचेची खिडकी फोडून त्याने सज्जावर उडी घेतली आणि तेथून खाली येत रुग्णालयातून पलायन केले.

सकाळी १०.३० वाजताच्या सुमारास हा प्रकार उघडकीस आला. मकोकासारख्या गंभीर प्रकरणातील आरोपी पोलिसांच्या पहाऱ्यातून पसार झाल्याने पोलिस विभागात खळबळ उडाली आहे. मिळालेल्या माहितीनुसार, खापरखेडा पोलिस ठाण्याच्या हद्दीतील गैंगवार प्रकरणात आरोपी समीरविरुद्ध मकोका अंतर्गत कारवाई केली होती,अन तो कारागृहात होता.

चेहरा आणि पोटात गाठ असल्याने त्याला उपचारासाठी १७ सप्टेंबर रोजी मेडिकलमध्ये दाखल केले होते. तो पहिल्या मजल्यावरील वॉर्ड क्रमांक १० मध्ये उपचार घेत होता. त्याच्या सुरक्षेसाठी पोलिस मुख्यालयातून जवान तैनात करण्यात आले होते. शनिवारी सकाळी सुमारे १०.३० वाजताच्या सुमारास समीर शौचालयात गेला. याचदरम्यान त्याने शौचालयाची काचेची खिडकी फोडली आणि तेथून सज्जावर आणि सज्जावरून खाली उडी घेतली.

Devendra Fadnavis : ‘अमृत-2’ची सर्व कामं मार्च 2027 पर्यंत पूर्ण करा, कुचराई करणाऱ्यांवर कारवाई,’ मुख्यमंत्री फडणवीसांचा मोठा आदेश

सीसीटीव्ही फुटेजची तपासणी

मेडिकल परिसर तसेच आजूबाजूच्या भागातील सीसीटीव्ही कॅमेऱ्याचे फुटेज तपासले जात आहेत. समीरच्या रुग्णालयातील हालचाली, त्याला भेटण्यासाठी आलेल्या व्यक्ती तसेच त्याच्या संपर्कातील व्यक्त्तीची माहिती पोलिसांकडून तपासली जाण्याची शक्यता आहे. समीरने पलायनाची पूर्वतयारी केली होती की रुग्णालयातील सुरक्षेतील त्रुटीचा फायदा घेतला, याचाही तपास सुरू आहे.

अनेक गंभीर गुन्हे दाखल

समीरविरुद्ध नवीन कामठी पोलिस ठाण्यात ७. कळमना येथे ४, तर गणेशपेठ, तहसील, नंदनवन आणि खापरखेडा पोलिस ठाण्यात प्रत्येकी १ गुन्हा दाखल असल्याची माहिती आहे. लूटमार, खंडणी, अवैध शस्त्र बाळगणे आणि गैंगवाराशी संबंधित १६ गुन्ह्यांचा त्यात समावेश आहे.

Nagpur News : प्रवासात बाळाला मांडीवर घेतलं तर ३ हजारांचा फटका! नियमाने पालकांना धक्का

सुरक्षा व्यवस्थेवर प्रश्नचिन्ह

समीरने शौचालयाची खिडकी फोडून पहिल्या मजल्यावरील सज्जावरून पलायन केल्याने सुरक्षा व्यवस्थेवर प्रश्नचिन्ह निर्माण झाले आहे. या प्रकरणाचा पोलिस तपास सुरू असून, निष्काळजीपणा आढळल्यास संबंधितांवर विभागीय कारवाई होण्याची शक्यता आहे.