नांदेडमध्ये सुखबीर सिंह बादल यांच्यावर हल्ला; आरोपीला अटक, फडणवीसांकडून चौकशीचे आदेश
घटनेनंतर समोर आलेल्या व्हिडीओमध्ये सुखबीर सिंह बादल यांना एका इमारतीच्या दिशेने नेण्यात येत असल्याचे दिसत आहे. त्यांच्या उजव्या हाताला कापड बांधलेले असल्याचेही या दृश्यांमध्ये दिसून येते. पक्षाच्या प्रवक्त्यांनी बादल यांच्या उजव्या हाताच्या मनगटाजवळ दुखापत झाल्याचे सांगितले असून ते धोक्याबाहेर असल्याचे म्हटले आहे.
हल्ल्याच्या वेळी सुखबीर सिंह बादल यांच्यासोबत त्यांच्या पत्नी आणि अकाली दलाच्या खासदार हरसिमरत कौर बादल उपस्थित होत्या. बादल हे नांदेडमधील तख्त श्री हजूर साहिब येथे गेले होते. त्याचवेळी ही घटना घडली.
या प्रकरणात पोलिसांनी आरोपीला तात्काळ ताब्यात घेतले आहे. उपलब्ध माहितीनुसार आरोपीचे नाव जसपाल सिंह असल्याचे सांगण्यात येत आहे. त्याने कृपाणच्या सहाय्याने बादल यांच्यावर हल्ला केल्याची माहिती पोलिसांकडून समोर आली आहे. हल्ल्यामागचा नेमका हेतू काय होता, याचा तपास सुरू आहे.
महाराष्ट्राचे मुख्यमंत्री देवेंद्र फडणवीस यांनी या घटनेची गंभीर दखल घेतली आहे. त्यांनी नांदेडच्या पोलीस अधीक्षकांकडून घटनेची माहिती घेतली आणि हल्ल्यामागील उद्देशाचा सखोल तपास करण्याचे आदेश दिले. फडणवीस यांनी सुखबीर सिंह बादल यांच्याशी फोनवरून संवाद साधून त्यांच्या प्रकृतीची विचारपूस केली. बादल यांची प्रकृती स्थिर असल्याचे मुख्यमंत्र्यांना सांगण्यात आले.
हल्ल्याच्या घटनेनंतर शिरोमणी अकाली दल आणि भाजपच्या नेत्यांकडून निषेध व्यक्त करण्यात आला आहे. अकाली दलाने या घटनेची सखोल आणि स्वतंत्र चौकशी करण्याची मागणी केली आहे. राजकीय मतभेद असले तरी हिंसेला लोकशाहीत स्थान नसल्याची प्रतिक्रिया भाजपकडूनही देण्यात आली आहे.
राज्याचे गृह राज्यमंत्री डॉ. पंकज भोयर यांनीही या घटनेची माहिती घेऊन दोषींवर कडक कारवाई केली जाईल, अशी भूमिका मांडली आहे. दरम्यान, पोलिसांकडून आरोपीची चौकशी सुरू असून हल्ल्यामागे नेमका कोणता हेतू होता आणि सुरक्षाव्यवस्थेत काही त्रुटी राहिल्या का, याचा तपास महत्त्वाचा ठरणार आहे. घटनेनंतर तख्त श्री हजूर साहिब परिसरातील सुरक्षाव्यवस्थेचाही आढावा घेतला जात आहे.
.png "Videos"){kind=small}
