Nashik News: 8 वर्षीय विद्यार्थिनीच्या मृत्यूचे प्रकरण तापले; कळवणच्या शिक्षण विस्तार अधिकाऱ्यावर निलंबनाची कारवाई

Nashik News: नाशिक जिल्ह्यातील कळवण तालुक्यातील विसापूर येथील शासकीय माध्यमिक आश्रमशाळेत इयत्ता दुसरीत शिकणाऱ्या 8 वर्षीय सृष्टी ओंकार सूर्यवंशी हिचा उपचारादरम्यान मृत्यू झाला. ताप आणि उलट्यांचा त्रास झाल्यानंतर तिला प्राथमिक उपचार देण्यात आले होते. त्यानंतर प्रकृती पुन्हा बिघडल्याने कळवण उपजिल्हा रुग्णालयात दाखल करण्यात आले...

• नाशिकच्या आश्रमशाळेतील 8 वर्षीय विद्यार्थिनीचा मृत्यू;
• पालकांकडून प्रशासनाच्या कारभारावर गंभीर प्रश्न
• कळवणच्या आश्रमशाळेतील चिमुकलीचा उपचारादरम्यान मृत्यू

नाशिक : नाशिक जिल्ह्यातील कळवण तालुक्यातून धक्कादायक घटना समोर आली आहे. विसापूर येथील शासकीय माध्यमिक आश्रमशाळेत इयत्ता दुसरीत शिक्षण घेणाऱ्या सृष्टी ओंकार सूर्यवंशी (वय 8) या विद्यार्थिनीचा उपचारादरम्यान मृत्यू झाला. या घटनेनंतर पालकांनी शाळा प्रशासनाच्या कार्यपद्धतीवर गंभीर प्रश्न उपस्थित केले आहेत. कळवण पोलिस ठाण्यात आकस्मिक मृत्यूची नोंद करण्यात आली असून पुढील तपास सुरू असून या प्रकरणात कळवण येथील शिक्षण विस्तार अधिकाऱ्याला निलंबित करण्यात आले आहे. विद्यार्थिनी आजारी असल्याची माहिती पालकांना वेळेत न दिल्याचा आरोप करण्यात आला होता. या घटनेनंतर आश्रमशाळेतील विद्यार्थ्यांची आरोग्य सुरक्षा आणि प्रशासनाच्या कार्यपद्धतीवर गंभीर प्रश्न उपस्थित झाले आहेत.

ताप आणि उलट्यांचा झाला होता त्रास

मिळालेल्या माहितीनुसार, सृष्टीला 3 सप्टेंबर 2026 रोजी ताप आणि उलट्यांचा त्रास जाणवू लागला. त्यामुळे तिला प्राथमिक उपचारांसाठी कळवण तालुक्यातील मोकमभणी येथील प्राथमिक आरोग्य केंद्रात नेण्यात आले. तेथे उपचार झाल्यानंतर तिला पुन्हा विसापूर येथील आश्रमशाळेत आणण्यात आले. त्यानंतर 4 सप्टेंबरच्या रात्री साडेबारा वाजण्याच्या सुमारास तिची प्रकृती पुन्हा बिघडली. त्यामुळे तिला तातडीने कळवण येथील उपजिल्हा रुग्णालयात उपचारांसाठी दाखल करण्यात आले. पोलिसांच्या आकस्मिक मृत्यू नोंदीतील माहितीनुसार, वैद्यकीय अधिकाऱ्यांनी रात्री 2.27 वाजता तपासणी करून तिला मृत घोषित केले.

अमली पदार्थांच्या पैशातून उभारलेली 55 लाखांची मालमत्ता गोठवली; पुणे जिल्ह्यात 2026 मधील पहिलीच कारवाई

कळवण पोलिसांत आकस्मिक मृत्यूची नोंद

या घटनेप्रकरणी कळवण पोलिस ठाण्यात अ.मृ. नोंद क्र. 38/2026 अन्वये आकस्मिक मृत्यूची नोंद करण्यात आली आहे. सृष्टी ही सटाणा तालुक्यातील गोळवाड येथील रहिवासी असल्याचे पोलिस नोंदीत नमूद करण्यात आले आहे.

‘मुलगी आजारी असल्याचे वेळेत सांगितले नाही’

घटनेनंतर सृष्टीच्या पालकांनी शाळा प्रशासनावर गंभीर आरोप केले आहेत. मुलगी आजारी असल्याची माहिती शिक्षक किंवा शाळेतील कर्मचाऱ्यांनी वेळेत दिली नाही, असा पालकांचा दावा आहे.

पालकांच्या म्हणण्यानुसार, रात्री उशिरा सुमारे दीड वाजण्याच्या सुमारास फोन करून सृष्टीची प्रकृती चिंताजनक असल्याचे सांगण्यात आले. त्यामुळे सृष्टीला ताप आणि उलट्यांचा त्रास सुरू झाल्यानंतर पालकांना तातडीने का कळवण्यात आले नाही? प्राथमिक उपचारांनंतर तिला पुन्हा आश्रमशाळेत का आणण्यात आले? तिची प्रकृती बिघडल्यानंतर रुग्णालयात दाखल करण्यात विलंब झाला का? असे अनेक प्रश्न पालकांनी उपस्थित केले आहेत.

मृत्यूचे नेमके कारण अद्याप अस्पष्ट

सृष्टीच्या मृत्यूचे नेमके वैद्यकीय कारण अद्याप स्पष्ट झालेले नाही. त्यामुळे केवळ ताप आणि उलट्यांच्या त्रासामुळेच तिचा मृत्यू झाला, असा निष्कर्ष सध्या काढता येणार नाही. शवविच्छेदन अहवाल, वैद्यकीय तपासणी आणि संबंधित उपचारांची कागदपत्रे समोर आल्यानंतर मृत्यूचे नेमके कारण स्पष्ट होण्याची अपेक्षा आहे.

आश्रमशाळांमधील विद्यार्थ्यांच्या आरोग्य सुरक्षेचा प्रश्न

या घटनेमुळे निवासी आश्रमशाळांमधील विद्यार्थ्यांच्या आरोग्य सुरक्षेचा मुद्दा पुन्हा चर्चेत आला आहे. विद्यार्थी आजारी पडल्यास त्याला किती लवकर वैद्यकीय मदत दिली जाते, पालकांना तत्काळ माहिती देण्यासाठी कोणती यंत्रणा आहे आणि प्रकृती गंभीर झाल्यास रुग्णालयात हलवण्यासाठी कोणती व्यवस्था आहे, याबाबत प्रश्न उपस्थित होत आहेत.

पालकांनी या प्रकरणाची सखोल चौकशी करून वस्तुस्थिती समोर आणण्याची मागणी केली आहे. दरम्यान, शाळा प्रशासन आणि संबंधित अधिकाऱ्यांची अधिकृत बाजू समोर आल्यानंतरच उपचारांमध्ये विलंब किंवा प्रशासकीय हलगर्जीपणा झाला होता का, हे स्पष्ट होऊ शकेल.

Nashik News: नाशिकच्या आश्रमशाळेत आठ वर्षीय मुलीचा मृत्यू; ताप-उलटीनंतर अचानक प्रकृती खालावली