लॉन्सचालकांनी शोधला डिझेल भट्टीचा पर्याय; मागणी वाढल्याने चारपटीने झाली दरवाढ (फोटो सौजन्य-Gemini)
शहरातील छत्रपती संभाजीनगर महामार्ग, पंचवटी, नाशिकरोड, सिडको, त्र्यंबकेश्वर रोड, गंगापुररोड या शहरालगतच्या भागात सुमारे ४०० हून अधिक लॉन्स व मंगल कार्यालये आहेत. वाहनांसाठी पुरेशी जागा व दळणवळणासाठी सोयीस्कर ठिकाणे म्हणून लग्न समारंभासाठी येथील लॉन्सला पसंती आहे. तीन ते चार महिने अगोदरच बुकींग झाले आहे. बहुतांशी लॉन्स चालकांचेच केटर्स संलग्न असल्यामुळे लग्नाचे पॅकेज जेवणासह घेण्याकडे कल आहे. अशा परिस्थितीत आता त्यांच्यापुढे व्यावसायिक सिलींडरचा मोठा यक्ष प्रश्न निर्माण झाला आहे. लग्न समारंभाच्या तारखा अगोदरच निश्चित झाल्याने वधु-वर मंडळींकडून त्याची तयारी केली जात असली तरी, आता त्यात बदल करण्याची वेळ येवून ठेपल्याचे नारायण सांगळे यांनी सांगितले. मात्र काही लग्न समारंभ पुढे ढकलण्यास दोन्ही बाजूंकडील मंडळी तयार नसल्याने गॅस टंचाईवर कशी मात करावी अशी विवंचना आहे. त्यावर पर्याय शोधला जात असल्याचे सांगळे यांनी सांगितले.
व्यावसायिक गॅस सिलींडर सुरळीत मिळेपर्यंत केटर्सचा मोर्चा आता डिझेल भट्टीकडे वळाला आहे. पूर्वी १२ ते १४ हजाराला मिळणाऱ्या डिझेल भट्टीचा दर आता ४५ ते ६० हजारापर्यंत पोहोचला आहे. इंदौर अथवा पुण्याहून त्या मागवाव्या लागतात. ऑर्डर दिल्यानंतर पंधरा ते वीस दिवसांनी त्या मिळतात, असे केटर्सचे म्हणणे आहे. डिझेल भट्टी घेतल्याने काही प्रश्न सुटणार असले तरी, आखातातील युद्धामुळे इंधनाची टंचाई निर्माण झाली तर पुढे काय असा प्रश्न त्यांच्यापुढे उभा ठाकला आहे.
केटर्सचा व्यवसाय करणाऱ्या काहींनी अगोदरच सिलीडरची व्यवस्था करून ठेवली आहे. दोन किंवा तीन टाक्यामध्ये एक लग्न समारंभपार पडतो. त्यामुळे हातात आहे तेवढ्या सुपारी पूर्ण करून घेण्यावर भर देण्यात आला असल्याचे निलेश पैखळे यांनी सांगितले. स्टॉक आहे तो पर्यंत ठीक आहे. त्यानंतर अन्य पर्याय शोधावे लागतील, पुढे सिंहस्थ कुंभमेळ्यामुळे लग्न समारंभहोणार नाही. त्यामुळे सध्याचा हंगाम हातचा जावू द्यायचा नाही असेही पेखळे यांनी सांगितले.
गॅस सिलिंडरच्या टंचाईच्या झळा आता थेट सर्वसामान्य नागरिकांच्या खिशापर्यंत पोहोचल्या आहेत. सध्या लग्नाचा हंगाम सुरू आहे. मोठ्या प्रमाणात लग्नाची तयारी अनेक कुटुंबांनी केलेली आहे. यासाठी आप्तेष्टांना सुग्रास भोजन मिळावे, यासाठी चांगल्या केटरर्सची निवड करून ठेवली, मात्र आता ऐन वेळी सिलिंडरची टंचाई निर्माण झाली आहे. तर व्यावसायिक सिलिंडरचा पुरवठाही थांबवण्यात आला आहे. त्यामुळे इतर मागाँनी केटरर्स आपला व्यवसाय पुढे नेत आहेत. यात जादा पैसे देऊन सिलिंडरची उपलब्धता करणे अथवा स्वयंपाकासाठी इतर मार्गाचा वापर करून लग्नकार्य पार पाडावे लागत आहे. त्यामुळे आपसूकच खर्च वाढला आहे. त्यामुळे ग्राहकांनी आमच्या अडचणी समजून घेऊन वाढीव दर द्यावेत, असे आवाहन करणारे पत्रकच केटरिंग असोसिएन, नाशिक यांनी काढले आहे.
मे महिन्याच्या अखेरपर्यंत लग्न समारंभाच्या तारखा असल्याने आगामी अडीच महिने लॉन्स व केटर्स चालकांसाठी पर्वणी असली तरी, सध्याची परिस्थिती पाहता त्यांचा व्यवसायही धोक्यात येण्याची शक्यता बळावली आहे. सिलींडर जवळ जवळ मिळत नसल्याने काही लॉन्स चालकांनी वधू-वराकडील मंडळींना विनंती करून तारखा पुढे ढकलण्याची विनंती केली आहे. काहींनी परिस्थिती पाहून तारखा पुढे ढकलल्या. तर काहींनी जेवणाच्या पदार्थांमध्ये कपात करून का होईना लग्न समारंभ पार पाडण्याची तयारी दर्शविली आहे.
.png "Videos"){kind=small}
