रायगड लोकसभा मतदारसंघ निवडणुकीसाठी आज पहिल्या दिवशी 16 इच्छुक उमेदवारांनी 24 नामनिर्देशनपत्रांची उचल केली. त्यापैकी एकानेही आज नामनिर्देशन पत्र दाखल केले नाही. 7 मे रोजी होणाऱ्या रायगड लोकसभा निवडणुकीची आज अधिसूचना प्रसिद्ध झाल्यानंतर, नामनिर्देशन प्रक्रियेला सुरुवात झाली आहे. रायगड लोकसभा मतदारसंघ निवडणुकीसाठी 16 इच्छुक उमेदवारांनी 24 नामनिर्देशनपत्रांची उचल केली आहे.
यावेळी निवडणूक निर्णय अधिकारी तथा जिल्हाधिकारी किशन जावळे, सहायक निवडणूक निर्णय आधिकारी तथा उपजिल्हाधिकारी स्नेहा उबाळे तसेच यांच्यासह निवडणूक कामी नियुक्त अधिकारी /कर्मचारी उपस्थित होते.
एका उमेदवारास जास्तीत जास्त 4 अर्ज घेता येतात. नामनिर्देशनपत्रे 19 एप्रिलपर्यंत कोणत्याही दिवशी सकाळी 11 ते 3 वाजेपर्यंत सादर करता येतील. शुक्रवार, दि. 19 एप्रिल रोजी सकाळी 11 ते दुपारी 3 वाजेपर्यंत नामनिर्देशनपत्राचे वितरण व स्वीकृती सुरु राहणार आहे. शनिवार 20 एप्रिल रोजी नामनिर्देशनपत्रांची छाननी करण्यात येणार आहे. तर सोमवार दिनांक 22 एप्रिल 2024 रोजी उमेदवारी अर्ज मागे घेण्याचा शेवटचा दिवस आहे. मतदान मंगळवारी 7 मे रोजी होणार असून मंगळवारी 4 जूनला मतमोजणी झाल्यानंतर 6 जून रोजी निवडणुक प्रक्रिया संपुष्टात येईल.
