Palghar Drought Relief Controversy : पालघरला सरकारने दुष्काळातून का वगळले? आदिवासी शेतकरी मदतीपासून वंचित

Palghar Drought Relief Controversy : राज्य सरकारने जाहीर केलेल्या २६५ तालुक्यांच्या दुष्काळसदृश यादीतून संपूर्ण पालघर जिल्ह्याला तांत्रिक निकषांमुळे वगळण्यात आल्यामुळे येथील आदिवासी शेतकरी सरकारी मदतीपासून पूर्णपणे वंचित राहणार आहेत. जुलैमध्ये मुसळधार पाऊस झाला असला, तरी सध्या भाताचे पीक संवेदनशील टप्प्यावर आहे.

• पालघर जिल्हा सरकारने दुष्काळातून वगळला
• आदिवासी शेतकरी मदतीपासून वंचित
• तांत्रिक निकषाचा बसला फटका

Palghar Drought Relief Controversy : राज्यातील दुष्काळी परिस्थितीचा आढावा घेत शासनाने २६५ तालुक्यांमध्ये दुष्काळसदृश परिस्थिती जाहीर केली असून, तेथे १२ विविध उपाययोजना व सवलती लागू केल्या आहेत. मात्र, हा निर्णय घेताना जून ते सप्टेंबर या कालावधीत पर्जन्यमानात १८ टक्क्यांपेक्षा जास्त तूट असल्याचा तांत्रिक निकष लावल्याने संपूर्ण पालघर जिल्हा या दुष्काळातून वगळला गेला आहे. केवळ पर्जन्यमानाच्या आकडेवारीवर अवलंबून न राहता पालघरमधील पिकांची प्रत्यक्ष स्थिती पाहून दुष्काळ जाहीर करावा, अशी मागणी येथील आदिवासी शेतकऱ्यांमधून होत आहे. ( Palghar Drought Relief Controversy ) 

Ganesh Visarjan : विसर्जन मिरवणुकीवर पोलिसांची करडी नजर! 6500 हून अधिक जवान तैनात; CCTV अन् Drone ने देखरेख

शासनाकडून झालेल्या २६५ तालुक्यांमध्ये ‘ट्रिगर १’ अंतर्गत प्रत्यक्ष शेतात जाऊन पिकांचे पंचनामे, जिओ-टॅगिंग व छायाचित्रांसह सर्वेक्षण केले जात आहे. मात्र, पालघरचा यात समावेश नसल्याने येथील शेतकरी सरकारी मदतीपासून पूर्णपणे वंचित राहणार आहेत. जिल्ह्यात जुलै महिन्यात मुसळधार पाऊस झाला असला, तरी भाताची रोवणी उशिरा झाली. सद्यस्थितीत भात पीक पोटरीमध्ये (दाणे भरण्याच्या अवस्थेत) आले असून, पिकाच्च्या वाढीसाठी पाण्याची नितांत गरज आहे. परंतु गेल्या काही दिवसांपासून पावसाने पूर्णपणे पाठ फिरवल्याने ऐन भरात आलेले भात पीक करपण्याची भीती निर्माण झाली आहे.

फेरसर्वेक्षणाची गरज

इतर जिल्ह्यांप्रमाणे पालघरमध्ये बारमाही सिंचनाची सोय, विहिरींचे जाळे किंवा रब्बी हंगामात हरभरा-गहू अशी दुबार पिके घेण्याची परिस्थिती नाही. येथील बहुतांश आदिवासी शेतकरी केवळ पावसाच्या पाण्यावर येणाऱ्या भात पिकावरच वर्षभराची गुजराण करतात. जुलैतील पावसाच्या नोंदीच्या आधारे तालुक्यांना वगळणे येथील गरीब शेतकऱ्यांचे कंबरडे मोडण्यासारखे आहे. त्यामुळे जिल्हा प्रशासनाने पिकांबी सद्य स्थिती पाहून फेरसर्वेक्षण अहवाल शासनाकडे सादर करावा, अशी मागणी केली जात आहे.

पालघरला दुष्काळातून वगळणे अन्यायकारक

माजी सभापती तथा शेतकरी प्रदीप वाघ यांनी स्पष्ट केलं की “राज्यातील इतर भागांपेक्षा पालघरमधील शेतीची रचना पूर्णपणे वेगळी आहे. भाताचे पीक सच्या संवेदनशील टप्प्यावर असून पाऊस न पडल्यास उत्पादनात प्रचंड घट होईल. हाताशी आलेले पीक जाण्याची भीती असताना पालघरला दुष्काळातून वगळणे अन्यायकारक आहे”.

Palghar PWD Scam : पीडब्ल्यूडीत 73 लाखांचा घोटाळा, बनावट दस्तऐवज तयार; ‘अभिप्राया’च्या नावाखाली FRI रोखला