चालकअभावी रुग्णाला पाठविले खासगी वाहनाने! 'डफरीन' प्रशासनाचा अजब कारभार; दोन रुग्णवाहिका आहे उपलब्ध
डफरीन रुग्णालय प्रशासनाच्या कार्यपद्धतीवर पुन्हा एकदा प्रश्नचिन्ह निर्माण झाले आहे. रुग्णालयाच्या आवारात दोन रुग्णवाहिका उपलब्ध असतानाही एका रुग्णाला पुढील उपचारासाठी खासगी वाहनातून नागपूरला नेण्याची वेळ आली. ही घटना समोर आल्यानंतर रुग्णालय प्रशासनाच्या कारभाराविरोधात नागरिकांमध्ये नाराजी व्यक्त होत आहे.(फोटो सौजन्य – istock)
रुग्णाला पुढील उपचारासाठी नागपूरला रेफर करण्याची आवश्यकता होती. यावेळी रुग्णालय प्रशासनाकडून ‘ड्रायव्हर उपलब्ध नाही’ असे कारण सांगण्यात आल्याची माहिती आहे. त्यामुळे रुग्णाच्या नातेवाइकांना खासगी वाहनाची व्यवस्था करून रुग्णाला नागपूरला घेऊन जावे लागले. विशेष म्हणजे, रुग्णालयाच्या आवारात दोन रुग्णवाहिका उभ्या होत्या. असे असतानाही रुग्णाला नागपूरला नेण्यासाठी त्यांचा वापर का करण्यात आला नाही, असा सवाल उपस्थित होत आहे. रुग्णवाहिका उपलब्ध असताना केवळ ड्रायव्हर उपलब्ध नसल्याचे कारण देऊन रुग्णाला खासगी वाहनातून पाठविणे कितपत योग्य आहे, याची चौकशी होण्याची गरज आहे. रुग्णालयात रुग्णवाहिका उपलब्ध असतानाही त्यांचा वापर का करण्यात आला नाही? ड्रायव्हरची व्यवस्था करण्याची जबाबदारी नेमकी कोणाची? तसेच या संपूर्ण प्रकारामुळे रुग्णाच्या उपचाराला कोणत्याही प्रकारचा विलंब झाला किंवा रुग्णाच्या जीवितास धोका निर्माण झाला का, याबाबतही प्रशासनाने स्पष्टीकरण देणे आवश्यक आहे.
या घटनेनंतर रुग्णालयातील रुग्णवाहिका चालकांचे अधिकृत संपर्क क्रमांक तसेच संबंधित जबाबदार अधिकाऱ्यांचे अधिकृत दूरध्वनी क्रमांक सार्वजनिक करण्याची मागणी जोर धरू लागली आहे. रुग्णवाहिका उपलब्ध असतानाही रुग्णाला खासगी वाहनातून नागपूरला जावे लागत असेल, तर याची जबाबदारी नेमकी कोणाची, असा सवाल नागरिकांकडून उपस्थित केला जात आहे.
या संपूर्ण प्रकरणाची वरिष्ठ अधिका-यांकडून चौकशी करून रुग्णालयातील रुग्णवाहिका व्यवस्था, चालकांची नियुक्ती तसेच आपत्कालीन सेवांच्या कार्यपद्धतीचा आढावा घेण्यात यावा. दोषी आढळणाऱ्यांची जबाबदारी निश्चित करून भविष्यात अशा घटनांची पुनरावृत्ती होऊ नये, यासाठी योग्य उपाययोजना करण्यात याव्यात, अशी मागणी रुग्णांच्या नातेवाइकांसह नागरिकांकडून होत आहे.
.png "Videos"){kind=small}
