पुण्यात आंब्याच्या झाडावर चढलेला इसम बेशुध्द; अग्निशमन दलाकडून प्रयत्नांनी सुटका

कोथरुड अग्निशमन केंद्र येथील फायरगाडी व मुख्यालयातून रेस्क्यु व्हॅन रवाना करण्यात आली होती.

पुणे – काल दिनांक ३०•०४•२०२४ रोजी दुपारी ०३•४८ वाजता अग्निशमन दल नियंत्रण कक्षात कोथरुड, पौड रोड, कृष्णा हॉस्पिटल जवळ, गल्ली क्रमांक ०३ येथे एका इमारतीच्या मागच्या बाजूस झाडावर एक इसम चढला असून तो अडकला आहे अशी वर्दि मिळताच दलाकडून कोथरुड अग्निशमन केंद्र येथील फायरगाडी व मुख्यालयातून रेस्क्यु व्हॅन रवाना करण्यात आली होती.

सदर घटनास्थळी जवान पोहोचल्यावर त्यांनी पाहिले की, एका उंच आंब्याच्या झाडावर तीन फांद्याच्या मधोमध एक इसम सुमारे पस्तीस फुट उंच अडकलेल्या स्थितीत असल्याचे निदर्शनास आले. घटनेचे गांभीर्य ओळखून लगेच जवान दलाकडील शिडी झाडाला लावून झाडावर गेले आणि सदर इसमाशी संवाद साधण्याचा प्रयत्न केला असता त्याची शुध्द हरपली असून तो बेशुद्ध अवस्थेत असल्याचे जाणवले. त्याचवेळी तातडीने रश्शी, दोर याचा वापर करुन रेस्क्यु बेल्टच्या साह्याने तसेच त्याचे वजन अंदाजे शंभर किलोच्या आसपास असल्याने विषेश गाठीचा उपयोग करुन त्या इसमाला हळूहळू व कोणतीही इजा होणार नाही याची काळजी घेत सुमारे ३० मिनिटात झाडावरुन खाली उतरवले आणि तातडीने अँब्युलंस मधून रुग्णालयात उपचाराकरिता रवाना केले.

सदर कामगिरीत अग्निशमन अधिकारी गजानन पाथ्रुडकर, तांडेल आंगद लिपाणे, वाहनचालक महेश शिळीमकर, शरद गोडसे, फायरमन रोशन हरड, वैभव आवरगंड, रविंद्र बडे, प्रतीक पागसे, मारुती देवकुळे, कृष्णा नरवटे, महेश घुले, सुबोध भुतकर, परेश जाधव यांनी सहभाग घेतला.