शुक्रवार, 26 जून 2026
पुणे : रात्री उशिरापर्यंत सुरू असणारे चायनिज सेंटर (Chinese Center) गस्तीवरील पोलिसांनी (Police) बंद केल्यानंतर जेवण न मिळाल्याने एकाने चायनिज सेंटरमधील चाकूनेच पोलीस कर्मचाऱ्यावर हल्ला केला. या हल्ल्यात पोलीस कर्मचारी गंभीररित्या जखमी झाले आहेत. पावणे तीनच्या सुमारास लोहगाव परिसरात ही घटना घडली आहे.
पोलीस नाईक सचिन उत्तम जगदाळे (वय ३८) असे जखमी झालेल्या पोलीस कर्मचाऱ्याचे नाव आहे. याप्रकरणी विमानतळ पोलीस ठाण्यात महानंदेश्वर उर्फ मल्या महादेव बताले (वय २४, रा. नळदुर्ग, जि. उस्मानाबाद) याच्यावर गुन्हा दाखल केला आहे. त्याला पोलिसांनी ताब्यात घेतले आहे.
तक्रारदार रात्रगस्तीवर होते. या दरम्यान, लोहगाव येथील धानोरी जकात नाका येथील समायरा चायनिज सेंटर रात्री अडीच वाजता देखील सुरू होते. हे सेंटर पोलीस कर्मचारी सचिन व त्यांच्या सहकार्यांनी बंद केले. त्याच दरम्यान, महानंदेश्वर हा त्याठिकाणी जेवणासाठी आला होता. सेंटर बंद केल्याने त्याला जेवण मिळाले नाही. त्याचा राग आल्याने त्याने सेंटरमधील चाकू घेऊन सचिन यांच्यावर हल्ला केला. त्यांच्या गालावर चाकू मारल्याने ते यात गंभीर जखमी झाले असून, त्यांचा गाल फाटला गेला आहे. पुढील तपास पोलीस करत आहेत.
रात्रीच्या मध्यापर्यंत हातगाडे सुरूच…
शहरातील अनेक भागात त्यातही उपनगरांमध्ये अंडाभुर्जी तसेच चायनिज सेंटरचे हातगाडे पहाटेपर्यंत सुरू असतात. हे गाडे पोलिसांच्याच आर्शिवादाने सुरू असल्याचे पाहिला मिळत आहे. स्थानिक पोलिसांना त्यातून मलिदा मिळतो. त्यामुळे हे गाडे बंद होत नसल्याचे वास्तव आहे. स्वारगेट, हडपसर तसेच उपनगरांमध्ये हातगाडे मोठ्या प्रमाणात आहेत. याठिकाणी रात्रीपर्यंत गर्दी पाहिला मिळते. तर, अनेक गाड्यांवर दारूचे प्यागही रिचवले जातात. हाणामारीच्या देखील घटना यापुर्वी अशा ठिकाणी घडलेल्या आहेत. पण, पोलिसांकडून याकडे सरास दुर्लक्ष होताना दिसत आहे.
