Pune News : पुणे ठरतेय GCC चे हब; वर्षभरात 800 पेक्षा अधिक ग्लोबल कॅपेबिलिटी सेंटर्स होणार, मुख्यमंत्री फडणवीसांचा विश्वास

Pune News : पुणे GCC क्षेत्रात वेगाने पुढे जात असून सध्या शहरात 130 पेक्षा अधिक ग्लोबल कॅपेबिलिटी सेंटर्स कार्यरत आहेत. आगामी एका वर्षात ही संख्या 800 पेक्षा अधिक करण्याचे राज्य सरकारचे लक्ष्य असल्याचे मुख्यमंत्री देवेंद्र फडणवीस यांनी सांगितले.

• पुण्यात सध्या 130 पेक्षा अधिक GCC कार्यरत
• एका वर्षात GCC ची संख्या 800 पार करण्याचा फडणवीसांचा विश्वास
• मॅग्नमच्या केंद्रातून एक हजारांहून अधिक रोजगाराच्या संधी

 

Pune News : ग्लोबल कॅपेबिलिटी सेंटर्स अर्थात GCC क्षेत्रात पुण्याची वाटचाल वेगाने सुरू आहे. जागतिक कंपन्यांसाठी व्यवसाय सेवा आणि तंत्रज्ञानाच्या दृष्टीने पुणे महत्त्वाचे केंद्र बनत असून, शहरात आतापर्यंत 130 पेक्षा अधिक GCC कार्यरत झाले आहेत. आगामी एका वर्षात ही संख्या 800 पेक्षा अधिक होईल, असा विश्वास मुख्यमंत्री देवेंद्र फडणवीस यांनी व्यक्त केला आहे.

वाकड येथील ईओएन वेस्ट आयटी पार्कमध्ये मॅग्नम आईस्क्रीम कंपनीच्या ग्लोबल बिझनेस सोल्युशन्स सेंटरचे उद्घाटन करण्यात आले. या कार्यक्रमात मुख्यमंत्री फडणवीस बोलत होते. GCC क्षेत्रात पुण्याने देशात पहिल्या क्रमांकाचे स्थान मिळवावे, हे राज्य सरकारचे लक्ष्य असल्याचे त्यांनी स्पष्ट केले.

उद्योगपूरक वातावरणामुळे पुण्याला पसंती

महाराष्ट्र हे ग्लोबल कॅपेबिलिटी सेंटर्ससाठी देशातील प्रमुख गुंतवणूक केंद्र बनत असल्याचे मुख्यमंत्री फडणवीस यांनी सांगितले. पुण्यात जागतिक कंपन्यांकडून ग्लोबल बिझनेस सर्व्हिस सेंटर्स सुरू करण्याला मिळणारा प्रतिसाद हा शहरातील उद्योगपूरक वातावरण आणि उपलब्ध कुशल मनुष्यबळाची पावती असल्याचे त्यांनी नमूद केले.

Pratap Sarnaik: प्रवाशांच्या जीवाशी खेळणाऱ्या नियमबाह्य रिक्षांवर कारवाईचा बडगा; प्रताप सरनाईकांचे निर्देश

पुण्याची ओळख आधीपासूनच शिक्षण, माहिती-तंत्रज्ञान आणि ऑटोमोबाईल क्षेत्रातील महत्त्वाचे केंद्र म्हणून आहे. आता GCC क्षेत्राच्या माध्यमातून जागतिक कंपन्यांच्या व्यवसायातील महत्त्वाच्या प्रक्रिया आणि सेवा पुण्यातून हाताळल्या जात आहेत.

मॅग्नमच्या केंद्रातून रोजगारनिर्मिती

मॅग्नम आईस्क्रीम कंपनीने पुण्यात सुरू केलेले ग्लोबल बिझनेस सोल्युशन्स सेंटर हे या वाढत्या गुंतवणुकीचे आणखी एक उदाहरण ठरत आहे. या केंद्रामुळे एक हजारांहून अधिक रोजगाराच्या संधी निर्माण होणार असल्याचे मुख्यमंत्री फडणवीस यांनी सांगितले.

पायाभूत सुविधा अन् नागरी सेवांच्या बळकटीकरणाला वेग; पिंपरी-चिंचवडच्या स्थायी समितीत विविध विकासकामांना मंजुरी

या केंद्राच्या माध्यमातून कंपनीच्या जागतिक व्यवसायाशी संबंधित विविध सेवा आणि प्रक्रिया पुण्यातून हाताळल्या जाणार आहेत. त्यामुळे स्थानिक पातळीवर कुशल मनुष्यबळासाठी रोजगाराच्या नव्या संधी उपलब्ध होण्याची अपेक्षा आहे.

कार्यक्रमाला आमदार अमित गोरखे, शंकर जगताप, उद्योग, गुंतवणूक व सेवा विभागाचे प्रधान सचिव डॉ. पी. अनबळगन, मुख्यमंत्र्यांचे गुंतवणूक व धोरण सल्लागार कौस्तुभ धवसे, मॅग्नमचे मुख्य वित्तीय अधिकारी अभिजीत भट्टाचार्य, पोलीस आयुक्त विनयकुमार चौबे, पिंपरी-चिंचवड महापालिका आयुक्त विजय सूर्यवंशी आणि जिल्हाधिकारी जितेंद्र डुडी यांच्यासह उद्योग क्षेत्रातील अधिकारी उपस्थित होते.