Pune News : राष्ट्रीय विधी सेवा प्राधिकरण, सर्वोच्च न्यायालय, नवी दिल्ली तसेच महाराष्ट्र राज्य विधी सेवा प्राधिकरण, उच्च न्यायालय, मुंबई यांच्या निर्देशानुसार शनिवार, दि. १२ सप्टेंबर रोजी जिल्हा व सत्र न्यायालय, वडगाव मावळ येथे राष्ट्रीय लोकअदालतीचे आयोजन करण्यात आले आहे. या लोकअदालतीच्या माध्यमातून प्रलंबित तसेच दाखलपूर्व प्रकरणांचा जलद, कमी खर्चात आणि सामंजस्याने निपटारा करण्याचा प्रयत्न करण्यात येणार असून, मावळ तालुक्यातील नागरिकांनी या संधीचा लाभ घ्यावा, असे आवाहन करण्यात आले आहे.
राष्ट्रीय लोकअदालतीमध्ये विविध प्रकारच्या तडजोडयोग्य प्रकरणांचा समावेश करण्यात आला आहे. त्यामध्ये वीज व पाणी बिलांची देयके, बँक कर्ज वसुलीची प्रकरणे, मोटार वाहन अपघात नुकसानभरपाई दावे, कौटुंबिक वाद, मालमत्ता विवाद, कर्मचारी नुकसानभरपाईची प्रकरणे तसेच तडजोडयोग्य दिवाणी व फौजदारी स्वरूपातील प्रकरणांचा सामंजस्याने निपटारा करण्यात येणार आहे.
लोकअदालतीत प्रकरण निकाली निघाल्यास संबंधित पक्षकारांना न्यायालयीन शुल्क परत मिळण्याची कायदेशीर तरतूद असून, कमी खर्चात, कमी वेळेत आणि परस्पर सामंजस्यातून न्याय मिळण्याचा लाभही मिळतो. त्यामुळे न्यायालयीन प्रक्रियेतील वेळ आणि खर्चाची बचत होऊन दोन्ही पक्षांमध्ये सौहार्दपूर्ण तोडगा निघण्यास मदत होते.
याशिवाय, लोकअदालतीस प्रत्यक्ष उपस्थित राहणे शक्य नसलेल्या पक्षकारांसाठी दृकश्राव्य (व्हिडिओ कॉन्फरन्सिंग) प्रणालीद्वारे सहभागी होण्याची सुविधाही उपलब्ध करून देण्यात आली आहे. त्यामुळे बाहेरगावी असलेल्या किंवा इतर कारणांमुळे न्यायालयात उपस्थित राहू न शकणाऱ्या नागरिकांनाही या लोकअदालतीचा लाभ घेता येणार आहे.
ज्या पक्षकारांना आपली प्रकरणे राष्ट्रीय लोकअदालतीमध्ये ठेवावयाची आहेत त्यांनी संबंधित न्यायालयाशी किंवा वडगाव मावळ विधी सेवा समितीशी त्वरित संपर्क साधावा, असे आवाहन करण्यात आले आहे.
मावळ तालुक्यातील नागरिकांनी दि. १२ सप्टेंबर रोजी आयोजित राष्ट्रीय लोकअदालतीचा लाभ घेऊन आपल्या प्रकरणांचा सामंजस्याने निपटारा करून घ्यावा, असे आवाहन जिल्हा व सत्र न्यायालय, वडगाव मावळ यांच्या वतीने करण्यात आले आहे.
.png "Videos"){kind=small}
