Voter list
राज्यात एसआयआरची प्रक्रिया अंतिम टप्प्यात पोहोचली आहे. रविवारपर्यंत सुमारे ९८ टक्के मतदारांपर्यंत गणना अर्ज पोहोचले असून, त्यापैकी ७७ टक्के अर्जांचे डिजिटायझेशन पूर्ण झाले आहे. पुणे जिल्ह्यात २५ टक्क्यांहून अधिक अर्जांचे वाटप झाले असून, त्यापैकी ६५.१४ टक्के अर्जांचे डिजिटायझेशन पूर्ण झाले आहे.
राज्यातील मतदारयादीत एकाच व्यक्तीचे नाव एकापेक्षा अधिक ठिकाणी असल्यास संबंधित मतदाराने सध्या वास्तव्य असलेल्या ठिकाणीच गणना अर्ज भरून देणे अपेक्षित आहे. इतर ठिकाणी असलेल्या नोंदीवर ‘ऑलरेडी एनरोल्ड’ असा शेरा नोंदविला जाईल. त्यामुळे अशा नोंदी प्रारूप मतदारयादीत राहणार नाहीत. लोकप्रतिनिधित्व अधिनियम, १९५० मधील कलम १७ व १८ नुसार एकाच व्यक्तीचे नाव एकापेक्षा अधिक मतदारसंघांत मतदार म्हणून नोंदविता येत नाही.
एसआयआरनंतर २४ ऑगस्ट रोजी प्रारूप मतदारयादी प्रसिद्ध केली जाणार आहे. या यादीत एखाद्या पात्र मतदाराचे नाव नसल्यास २४ ऑगस्ट ते २३ सप्टेंबर या कालावधीत अर्ज क्रमांक ६ भरून नाव समाविष्ट करता येणार आहे. मतदार यादीतील नोंदीत दुरुस्ती करण्यासाठी अर्ज क्रमांक ८ भरता येईल.
याच कालावधीत मतदारसंघातील कोणत्याही मतदाराला एखादी नोंद वगळण्यासाठी अर्ज क्रमांक ७ द्वारे हरकत घेता येणार आहे. मात्र, केवळ हरकत दाखल झाली म्हणून संबंधित मतदाराचे नाव तत्काळ वगळले जाणार नाही. निर्णय घेण्यापूर्वी संबंधित मतदाराला आपली बाजू मांडण्यासाठी सुनावणीची संधी दिली जाणार आहे.
दावे आणि हरकतींची प्रक्रिया पूर्ण झाल्यानंतर २७ ऑक्टोबर रोजी अंतिम मतदारयादी प्रसिद्ध केली जाणार आहे. अंतिम यादी प्रसिद्ध झाल्यानंतरही पात्र नागरिकांना अर्ज क्रमांक ६ भरून मतदारयादीत नाव समाविष्ट करता येणार आहे. तसेच मतदारयादीतील नोंदी दुरुस्त करण्याची प्रक्रिया पुढेही सुरू राहणार असल्याचे मुख्य निवडणूक अधिकारी कार्यालयाने स्पष्ट केले आहे.
मतदारयादीत नाव समाविष्ट करणे, नोंदीत दुरुस्ती करणे किंवा नाव वगळण्यासाठी अर्ज करताना चुकीची घोषणा किंवा विधान केल्यास लोकप्रतिनिधित्व अधिनियम, १९५० मधील कलम ३१ नुसार संबंधित व्यक्तीला एक वर्षापर्यंतची शिक्षा, दंड किंवा दोन्ही होऊ शकतात.
.png "Videos"){kind=small}
