लिफ्टच्या दरवाजात चिमुकलीचा हात अडकला; पिंपरी-चिंचवड परिसरातील थरारक घटना

एका गृहनिर्माण सोसायटीत लिफ्टच्या दरवाजाच्या सापटीत चिमुकलीचा हात अडकल्याची थरारक घटना घडली आहे. सुदैवाने, काही मिनिटांच्या प्रयत्नांनंतर तिचा हात सुरक्षित बाहेर काढण्यात यश आले.

• लिफ्टच्या दरवाजात चिमुकलीचा हात अडकला
• पिंपरी-चिंचवड परिसरातील थरारक घटना
• सुदैवाने मोठा अनर्थ टळला

पिंपरी : लिफ्टचा वापर करताना लहान मुलांच्या सुरक्षिततेकडे दुर्लक्ष केल्यास किती मोठा धोका निर्माण होऊ शकतो, याचा प्रत्यय पिंपरी-चिंचवडमधील दिघी परिसरात आला आहे. एका गृहनिर्माण सोसायटीत लिफ्टच्या दरवाजाच्या सापटीत चिमुकलीचा हात अडकल्याची थरारक घटना घडली आहे. सुदैवाने, काही मिनिटांच्या प्रयत्नांनंतर तिचा हात सुरक्षित बाहेर काढण्यात यश आले आणि मोठा अनर्थ टळला. या घटनेमुळे सोसायटी परिसरात काही काळ भीतीचे वातावरण निर्माण झाले होते.

 

मिळालेल्या माहितीनुसार, दिघीतील एका गृहनिर्माण सोसायटीमध्ये ही घटना घडली आहे. एक महिला आपल्या काही महिन्यांच्या चिमुकलीसह लिफ्टमधून इच्छित मजल्यावर जात होती. लिफ्ट थांबल्यानंतर दरवाजा उघडला आणि पुन्हा बंद होऊ लागला. याच वेळी चिमुकलीने सहजपणे आपला हात लिफ्टच्या दरवाजावर ठेवला. दरवाजा बंद होत असताना तिचा हात दरवाजाच्या सापटीत अडकला.

हा प्रकार लक्षात येताच लिफ्टमधील महिलेसह आजूबाजूचे नागरिक घाबरले. चिमुकली वेदनेने जोरात रडू लागली. तिला तातडीने मदत करण्यासाठी सोसायटीतील नागरिकांनी प्रयत्न सुरू केले. काही मिनिटे प्रयत्न केल्यानंतर तिचा हात सावधपणे बाहेर काढण्यात आला. सुदैवाने या घटनेत चिमुकलीला गंभीर दुखापत झाली नाही.

दरम्यान, ही संपूर्ण घटना सोसायटीच्या सीसीटीव्ही कॅमेऱ्यात कैद झाली असून त्याचा व्हिडिओ सध्या सोशल मीडियावर मोठ्या प्रमाणात व्हायरल होत आहे. या घटनेच्या पार्श्वभूमीवर प्रशासनाने नागरिकांना लिफ्टचा वापर करताना विशेषतः लहान मुलांकडे लक्ष ठेवण्याचे आणि सुरक्षिततेची खबरदारी घेण्याचे आवाहन केले आहे. तसेच सोसायटी व्यवस्थापनांनी लिफ्टची नियमित तपासणी व सुरक्षा यंत्रणा कार्यरत ठेवणे आवश्यक असल्याचेही सांगितले जात आहे.

हे सुद्धा वाचा : पिंपरी-चिंचवडमध्ये आता 10 क्षेत्रीय कार्यालये; राष्ट्रवादी-शिवसेनेचा विरोध डावलून भाजपाकडून प्रस्ताव मंजूर

पुणे-अहिल्यानगर रस्त्यावर खाजगी बसने घेतला पेट

पुणे – अहिल्यानगर महामार्गावरील रांजणगाव गणपती (ता. शिरुर) येथील अष्टविनायक श्री महागणपती मंदिरासमोर एका चालत्या खाजगी बसने अचानक पेट घेतला. परंतू बसचालकाने प्रसंगावधान राखत सर्व प्रवाशांना तातडीने खाली उतरविल्यामुळे बसमधील ३६ प्रवाशांचे प्राण वाचले, मात्र या आगीत बस पूर्णपणे जळून खाक झाली. ही बस रस्त्याच्या कडेलाच असल्याने बघ्यांची मोठी गर्दी झाली होती. यामुळे महामार्गावरील दोन्ही बाजूची वाहतूक जवळपास दोन तास विस्काळीत झाली होती.