रविवार, 18 ऑक्टोबर 2026
संग्रहित फोटो
पिंपरी : पिंपरी-चिंचवड महानगरपालिकेचे दैनंदिन कामकाज अधिक गतीने व्हावे, या कारणास्तव शहरातील क्षेत्रीय कार्यालयांची संख्या ८ वरून १० करण्याच्या प्रस्तावाला शुक्रवारी (दि. १३) झालेल्या महासभेत मंजुरी देण्यात आली आहे. महापौर रवी लांडगे यांनी या प्रस्तावाला मान्यता दिली असली तरी, राष्ट्रवादी काँग्रेस आणि शिवसेनेने (शिंदे गट) या निर्णयाला जोरदार विरोध दर्शवला. स्मार्ट सिटीच्या संचालक नियुक्तीच्या विषयामध्ये ऐनवेळी उपसूचना मांडून सत्ताधारी भाजपाने बहुमताच्या जोरावर हा निर्णय पदरात पाडून घेतला.
राजकीय फायद्यासाठी तोडफोड?
गेल्या पंचवार्षिक काळात प्रशासकीय सोयीसाठी ६ क्षेत्रीय कार्यालयांचे ८ कार्यालयांत रूपांतर करण्यात आले होते. आता नगरसेवकांची संख्या १२८ असतानाही पुन्हा कार्यालयांची संख्या वाढवण्याचा निर्णय घेण्यात आला आहे. राष्ट्रवादी काँग्रेसने यावर तीव्र आक्षेप घेतला आहे. “२०१७ मध्ये केवळ भाजपाच्या ताब्यात क्षेत्रीय कार्यालये असावीत आणि स्वतःचे अध्यक्ष बसवता यावेत, यासाठीच कार्यालयांची मोडतोड करण्यात आली होती. आता पुन्हा तोच कित्ता गिरवला जात आहे,” अशी टीका राष्ट्रवादीच्या नगरसेवकांनी केली.
१०० कोटींचा खर्च अन् आर्थिक ओढताण
महापालिकेची आर्थिक स्थिती सध्या बेताची असताना नवीन कार्यालये, इमारती आणि आस्थापनेवर होणारा १०० कोटींचा खर्च शहराला परवडणारा नाही, असा मुद्दा विरोधी पक्षांनी मांडला. विरोधी पक्षनेते भाऊसाहेब भोईर यांनी सत्ताधाऱ्यांवर बोचरी टीका करताना म्हटले की, “केवळ राष्ट्रवादीचा अध्यक्ष होऊ नये म्हणून हा अट्टाहास कशासाठी? तुम्हाला अध्यक्षपद हवे असेल, तर खुशाल तुमचे अध्यक्ष करा, गाड्या घ्या, पण जनतेच्या पैशांची अशी उधळपट्टी करू नका.”
या प्रस्तावाला राष्ट्रवादीचे शहराध्यक्ष योगेश बहल, शिवसेनेचे गटनेते विश्वजीत बारणे, सुलभा उबाळे आणि संदीप वाघेरे यांनीही कडाडून विरोध केला. नागरिकांना पाणी मिळत नाही, कचऱ्याची समस्या गंभीर आहे, अशा वेळी केवळ राजकीय सोयीसाठी प्रभाग फोडणे चुकीचे असल्याचे त्यांनी नमूद केले.
प्रभाग कार्यालयांना लाभणार गडकिल्ल्यांची नावे
नव्या रचनेनुसार वाढवण्यात आलेल्या आणि जुन्या सर्व १० क्षेत्रीय कार्यालयांना आता छत्रपती शिवाजी महाराजांच्या गडकिल्ल्यांची नावे दिली जाणार आहेत. त्याचे नियोजन खालीलप्रमाणे असेल:
‘अ’ प्रभाग : राजगड
‘ब’ प्रभाग : सिंहगड
‘क’ प्रभाग : विजयदुर्ग
‘ड’ प्रभाग : देवगिरी
‘इ’ प्रभाग : शिवनेरी
‘फ’ प्रभाग : तोरणा
‘ग’ प्रभाग : भोरगड
‘ह’ प्रभाग : प्रतापगड
‘ज’ प्रभाग : रायगड
‘ल’ प्रभाग : लोहगड
भाजपचे नगरसेवक शत्रुघ्न काटे यांनी मात्र या निर्णयाचे समर्थन केले असून, वाढत्या नागरिकरणामुळे प्रशासकीय फेररचना नागरिकांच्या सोयीसाठीच असल्याचे सांगितले. विरोधकांच्या गदारोळातही सत्ताधाऱ्यांनी बहुमताच्या जोरावर हा विषय मंजूर केला, ज्यामुळे आता शहराच्या प्रशासकीय नकाशात बदल होणार हे स्पष्ट झाले आहे.
