पिके करपली, शेतकरी संकटात; इंदापुर तालुक्यात कृषिमंत्री भरणेंनी घेतला नुकसानीचा आढावा

इंदापूर तालुक्यातील लाकडी, निरगुडे आणि म्हसोबाची वाडी परिसरात पावसाने दिलेल्या दीर्घ खंडामुळे पिकांची अवस्था गंभीर झाली असून, तोंडाशी आलेला घास हातातून निसटण्याची वेळ शेतकऱ्यांवर आली आहे.

इंदापूर : इंदापूर तालुक्यातील लाकडी, निरगुडे आणि म्हसोबाची वाडी परिसरात पावसाने दिलेल्या दीर्घ खंडामुळे पिकांची अवस्था गंभीर झाली असून, तोंडाशी आलेला घास हातातून निसटण्याची वेळ शेतकऱ्यांवर आली आहे. अनेक ठिकाणी पिके जळून गेल्याने शेतकरी मोठ्या आर्थिक संकटात सापडले आहेत. या पार्श्वभूमीवर कृषिमंत्री दत्तात्रय भरणे यांनी शनिवारी (दि. २६) थेट शेतकऱ्यांच्या बांधावर जाऊन पिकांची पाहणी केली आणि शेतकऱ्यांशी संवाद साधत त्यांच्या व्यथा जाणून घेतल्या. यावेळी कृषिमंत्री दत्तात्रय भरणे यांनी लाकडी, निरगुडे आणि म्हसोबाची वाडी परिसरातील विविध शेतांमध्ये जाऊन पिकांची प्रत्यक्ष पाहणी केली.

 

पावसाच्या खंडामुळे पिकांची झालेली अवस्था, जमिनीतील घटलेली ओल, पिकांना बसलेला फटका तसेच संभाव्य उत्पादनातील घट याबाबत त्यांनी शेतकऱ्यांकडून माहिती घेतली. यावेळी शेतकऱ्यांनी अपुऱ्या पावसामुळे निर्माण झालेल्या परिस्थितीची माहिती देत नुकसान झालेल्या पिकांचा प्रश्न मांडला. हातातोंडाशी आलेले पीक पावसाअभावी जळून गेल्याने उत्पादन खर्चही वसूल होणार नसल्याची चिंता अनेक शेतकऱ्यांनी व्यक्त केली.

‘शेतकऱ्यांच्या दुःखाची जाणीव आहे; सरकार खंबीरपणे पाठीशी’

शेतकऱ्यांच्या जळालेल्या पिकांची अवस्था आणि त्यांच्या अडचणी पाहून कृषिमंत्री दत्तात्रय भरणे यांनी सरकार शेतकऱ्यांच्या पाठीशी भक्कमपणे उभे असल्याचे सांगितले. शेतकऱ्यांच्या हातातोंडाशी आलेला घास पिके जळाल्यामुळे हिरावला गेला आहे. शेतकऱ्यांचे दुःख, त्यांची व्यथा आणि जळालेल्या पिकांची अवस्था पाहून परिस्थितीचे गांभीर्य स्पष्ट होते. हे निसर्गनिर्मित संकट आहे. या संकटाला आपल्या सर्वांना सामोरे जावे लागेल; मात्र संकटाच्या काळात सरकार शेतकऱ्यांच्या पाठीशी खंबीरपणे उभे आहे, असे भरणे यांनी प्रसारमाध्यमांशी बोलताना सांगितले.

२६५ तालुक्यांमध्ये दुष्काळ जाहीर; इंदापूरचाही समावेश’

राज्यातील दुष्काळी परिस्थितीचा उल्लेख करताना भरणे म्हणाले की, राज्यातील २६५ तालुक्यांमध्ये दुष्काळ जाहीर करण्यात आला असून, त्यामध्ये इंदापूर तालुक्याचाही समावेश आहे. त्यामुळे संकटग्रस्त शेतकऱ्यांना दिलासा मिळण्याचा मार्ग मोकळा झाला असून, शासनाच्या माध्यमातून आवश्यक उपाययोजना करण्यात येणार असल्याचे त्यांनी स्पष्ट केले. दुष्काळाच्या संकटात शासनाकडून शेतकऱ्यांना आवश्यक मदत मिळावी, यासाठी प्रशासनाने परिस्थितीचा आढावा घेऊन पुढील कार्यवाही करण्याची आवश्यकता असल्याचेही त्यांनी नमूद केले.

हे सुद्धा वाचा : बारामतीत गणेश विसर्जन मिरवणूक शांततेत; अनेक मंडळांकडून यंदा साधेपणाने गणेशोत्सव साजरा

मुख्यमंत्र्यांचे आभार; भरीव मदतीचा विश्वास

इंदापूर तालुक्याचा दुष्काळी परिस्थितीत समावेश झाल्याने शेतकऱ्यांना मोठा दिलासा मिळणार असल्याचे सांगत भरणे यांनी मुख्यमंत्री देवेंद्र फडणवीस यांचे आभार व्यक्त केले. पावसातील खंडामुळे निर्माण झालेली परिस्थिती ही निसर्गनिर्मित असल्याने या संकटाचा सामना सामूहिकपणे करावा लागणार आहे. मात्र, संकटग्रस्त शेतकऱ्यांना शासनाच्या माध्यमातून आवश्यक मदत आणि दिलासा देण्यासाठी सरकार प्रयत्नशील राहील, असे भरणे यांनी स्पष्ट केले. दरम्यान, शेतकऱ्यांच्या बांधावर जाऊन प्रत्यक्ष पिकांची पाहणी केल्याने शेतकऱ्यांच्या समस्या कागदोपत्री नव्हे, तर प्रत्यक्ष परिस्थितीतून समजून घेण्याचा प्रयत्न झाल्याचे चित्र पाहायला मिळाले. आता पाहणीच्या पार्श्वभूमीवर नुकसानग्रस्त शेतकऱ्यांना प्रत्यक्ष मदत आणि शासनाच्या दुष्काळी उपाययोजनांचा लाभ कितपत आणि किती वेगाने मिळतो, याकडे शेतकऱ्यांचे लक्ष लागले आहे.