चाकण शहर : पुणे जिल्हा मध्यवर्ती सहकारी बँकेच्या (पीडीसीसी) आगामी निवडणुकीच्या पार्श्वभूमीवर खेड तालुक्यातील सहकार क्षेत्रातील राजकीय हालचालींना वेग आला आहे. माजी आमदार दिलीप मोहिते पाटील यांच्या समर्थनार्थ तालुक्यातील ७२ मतदार प्रतिनिधी एकत्र आल्याचा दावा करण्यात आला असून, त्यांच्या उपस्थितीत एका पंचतारांकित हॉटेलमध्ये नुकताच सत्कार समारंभ पार पडला. खेड तालुक्यातील विविध सहकारी संस्थांमधून नव्याने निवडून आलेल्या मतदार प्रतिनिधींचा यावेळी फेटे बांधून सत्कार करण्यात आला. या वेळी उपस्थित प्रतिनिधींनी मोहिते पाटील यांच्या पाठीशी राहण्याचा शब्द दिल्याचे सांगण्यात आले. त्यामुळे आगामी जिल्हा बँक निवडणुकीच्या पार्श्वभूमीवर मोहिते पाटील गटाने आपली संघटनात्मक ताकद दाखवून दिल्याची चर्चा सहकार क्षेत्रात सुरू झाली आहे.
निमगाव खंडोबाच्या चरणी एकजुटीचा कौल
मोहिते पाटील यांच्या समर्थनार्थ असलेले मतदार प्रतिनिधी निमगाव येथील कुलदैवत श्री खंडोबाच्या मंदिरात जाऊन एकजुटीचा कौल देणार असल्याचे यावेळी सांगण्यात आले. देवाच्या साक्षीने एकत्रितपणे पाठिंबा व्यक्त करण्याचा निर्धार प्रतिनिधींनी केल्याचे आयोजकांकडून सांगण्यात आले. दरम्यान, विरोधी गटाकडे सध्या ३१ मतदार प्रतिनिधी असल्याचा दावा मोहिते पाटील समर्थकांकडून करण्यात आला आहे. त्यामुळे ७२ विरुद्ध ३१ अशी संख्या समोर येत असून, या आकडेवारीमुळे आगामी निवडणुकीतील खेड तालुक्याचे राजकीय गणित चर्चेत आले आहे.
निवडणुकीपूर्वीच राजकीय समीकरणांना वेग
जिल्हा बँकेच्या निवडणुकीला अद्याप काही दिवसांचा कालावधी असला तरी खेड तालुक्यातील सहकार क्षेत्रातील प्रतिनिधींची जुळवाजुळव सुरू झाल्याचे चित्र आहे. आगामी काळात विरोधी गटाकडून कोणती भूमिका घेतली जाते, नव्या राजकीय आघाड्या आकाराला येतात का आणि सध्याच्या संख्याबळात बदल होतो का, याकडे सहकार क्षेत्राचे लक्ष लागले आहे. मोहिते पाटील समर्थकांकडून मात्र ७२ प्रतिनिधींच्या पाठिंब्याच्या आधारे आगामी निवडणुकीसाठी तयारी सुरू करण्यात आली आहे. त्यामुळे खेड तालुक्यातील पीडीसीसी निवडणुकीचे राजकीय वातावरण निवडणूक कार्यक्रम जाहीर होण्यापूर्वीच तापू लागले आहे.
.png "Videos"){kind=small}
