वाढत्या महागाईमुळे सर्वसामान्यांचे बजेट कोलमडले, घरखर्चाचा ताळमेळ बसेना; दरवाढीमुळे नागरिक हवालदिल

गेल्या काही महिन्यांपासून सातत्याने वाढत असलेल्या महागाईमुळे सर्वसामान्य नागरिकांचे आर्थिक गणित पूर्णपणे कोलमडले आहे. “महिन्याचा पगार हातात पडतो आणि काही दिवसांतच संपतो,” अशी व्यथा अनेक कुटुंबप्रमुखांनी व्यक्त केली आहे.

• वाढत्या महागाईमुळे सर्वसामान्यांचे बजेट कोलमडले
• घरखर्चाचा ताळमेळ बसेना
• दरवाढीमुळे नागरिक हवालदिल

राजगुरूनगर/प्रभाकर जाधव : गेल्या काही महिन्यांपासून सातत्याने वाढत असलेल्या महागाईमुळे सर्वसामान्य नागरिकांचे आर्थिक गणित पूर्णपणे कोलमडले आहे. घरगुती गॅस, पेट्रोल-डिझेल, भाजीपाला, खाद्यतेल, डाळी तसेच दैनंदिन वापराच्या वस्तूंच्या दरात झालेल्या वाढीमुळे मध्यमवर्गीय व कामगार वर्गाचे जगणे अधिक कठीण बनले आहे. पूर्वी महिन्याचा खर्च ठराविक मर्यादेत भागत होता; मात्र आता पगार वाढत नसताना खर्च दुप्पट झाल्याची भावना नागरिक व्यक्त करीत आहेत. “महिन्याचा पगार हातात पडतो आणि काही दिवसांतच संपतो,” अशी व्यथा अनेक कुटुंबप्रमुखांनी व्यक्त केली आहे.

 

बाजारपेठेत टोमॅटो, कांदा, बटाटा यांसारख्या सर्वसामान्य भाज्यांचे दरही चढेच राहिले आहेत. त्यातच दूध, खाद्यतेल व किराणा सामानाच्या किंमती वाढल्याने गृहिणींचे बजेट विस्कळीत झाले आहे. घरखर्च भागविताना अनेकांना बचतीकडे पाठ फिरवावी लागत असून, काही कुटुंबांनी अनावश्यक खर्चाला कात्री लावण्यास सुरुवात केली आहे.

वाहनधारकांनाही इंधन दरवाढीचा मोठा फटका बसत आहे. पेट्रोल-डिझेलच्या वाढत्या किमतीमुळे प्रवास खर्च वाढला असून, त्याचा परिणाम भाडेवाढ आणि मालवाहतुकीवरही होत आहे. परिणामी बाजारातील वस्तूंच्या किंमती आणखी वाढत असल्याचे व्यापाऱ्यांचे म्हणणे आहे.

हे सुद्धा वाचा : विमानतळ प्रकल्पबाधित कर्जमाफीपासून राहणार वंचित; ‘या’ अटीमुळे पुरंदरच्या शेतकऱ्यांमध्ये नाराजी

रोजंदारीवर काम करणाऱ्यांना सर्वाधिक फटका

महागाईचा सर्वाधिक फटका रोजंदारीवर काम करणाऱ्या कामगार, शेतमजूर आणि लहान व्यावसायिकांना बसत आहे. अनेकांच्या हाताला काम नसताना वाढत्या खर्चामुळे आर्थिक अडचणी अधिक तीव्र झाल्या आहेत. “दोन वेळच्या जेवणाची चिंता निर्माण झाली आहे,” अशी खंत काही नागरिकांनी व्यक्त केली. दरम्यान, वाढती महागाई नियंत्रणात आणण्यासाठी शासनाने ठोस उपाययोजना कराव्यात, जीवनावश्यक वस्तूंच्या किंमती नियंत्रणात ठेवाव्यात तसेच सर्वसामान्य नागरिकांना दिलासा द्यावा, अशी मागणी नागरिकांकडून होत आहे.

हे सुद्धा वाचा : प्रत्येक कामात तरुणांचा सहभाग महत्वाचा; पुण्यात स्वच्छता मोहिमेला सतेज पाटील, यशोमती ठाकूर यांची उपस्थिती