बारामतीत ‘बुलेट’ चोरट्यांचा धुमाकूळ, तीन बुलेट लंपास; CCTV फुटेज पोलिसांच्या हाती

बारामती तालुका पोलीस ठाणे हद्दीतही तीन बुलेट चोरीच्या घटना घडल्याची माहिती पोलिसांनी दिली आहे. या पार्श्वभूमीवर बुलेट मोटारसायकलींना लक्ष्य करणारी टोळी सक्रिय असण्याची शक्यता आहे.

बारामती : बारामती शहर व परिसरात रॉयल एनफिल्ड बुलेट मोटारसायकली चोरीच्या घटनांमध्ये वाढ झाल्याने वाहनधारकांमध्ये चिंता निर्माण झाली आहे. बारामती शहर पोलीस ठाणे हद्दीत अलीकडच्या काळात तीन बुलेट चोरीस गेल्या असून, बारामती तालुका पोलीस ठाणे हद्दीतही तीन बुलेट चोरीच्या घटना घडल्याची माहिती पोलिसांनी दिली आहे. या पार्श्वभूमीवर बुलेट मोटारसायकलींना लक्ष्य करणारी टोळी सक्रिय असण्याची शक्यता असून, संबंधित चोरट्याचे सीसीटीव्ही फुटेज पोलिसांच्या हाती आले असून त्या आधारे पोलिसांनी तपासाची चक्रे वेगाने फिरविली आहेत.

बारामती शहर पोलीस ठाण्यात दाखल गुन्ह्यानुसार, ६ ऑगस्ट रोजी रात्री दहा ते ७ ऑगस्ट रोजी सकाळी दहा या कालावधीत प्रगतीनगर येथील प्रभावती अपार्टमेंटच्या पार्किंगमधून दोन रॉयल एनफिल्ड मोटारसायकली चोरीस गेल्या. यामध्ये एमएच-४२/एव्ही-२१२१ क्रमांकाची क्लासिक ३५० आणि एमएच-४२/बीके-०७४९ क्रमांकाची हंटर ३५० या सुमारे २ लाख ६० हजार रुपये किमतीच्या मोटारसायकलींचा समावेश आहे. त्यानंतर ९ ऑगस्टच्या रात्री ११ ते १० ऑगस्टच्या सकाळी सात या कालावधीत तांदुळवाडी रोड, के-मार्टच्या पाठीमागील प्रगतीनगर येथील आर्या पॅराडाईस अपार्टमेंटच्या पार्किंगमधून एमएच-४२/बीके-९७०९ क्रमांकाची मेटल ग्रे रंगाची रॉयल एनफिल्ड क्लासिक ३५०, सुमारे १ लाख १० हजार रुपये किमतीची, चोरीस गेली.

चेन लॉकचा वापर करावा

दरम्यान, नागरिकांनी वाहन पार्क करताना केवळ हँडल लॉकवर अवलंबून न राहता डिस्क लॉक, व्हील लॉक किंवा चेन लॉकचा वापर करावा. शक्य असल्यास वाहन सीसीटीव्हीच्या निगराणीखाली व प्रकाश असलेल्या ठिकाणी पार्क करावे. वाहनामध्ये जीपीएस ट्रॅकर किंवा चोरीविरोधी अलार्म बसविण्याचे आवाहनही पोलिसांनी केले आहे.

हे सुद्धा वाचा : दारु नका बनवू, रोजगार करा! पुणे ग्रामीण पोलीस ‘त्या’ शंभर कुटुंबांना दाखवणार नवी वाट

माहिती देणाऱ्याची ओळख गोपनीय ठेवू

या घटनांनंतर बारामती शहर पोलिसांनी परिसरातील विविध ठिकाणचे सीसीटीव्ही फुटेज ताब्यात घेतले असून, त्याचे बारकाईने विश्लेषण सुरू आहे. संशयित चोरट्यांच्या हालचालींबाबत महत्त्वपूर्ण माहिती पोलिसांच्या हाती लागली असून, त्यांच्या शोधासाठी तपास पथके कार्यरत आहेत. संशयास्पद व्यक्ती किंवा वाहन आढळल्यास नागरिकांनी तत्काळ बारामती शहर पोलीस ठाणे अथवा डायल ११२ वर संपर्क साधावा. माहिती देणाऱ्याची ओळख गोपनीय ठेवण्यात येईल, असे, आवाहन पोलीस निरीक्षक श्रीशैल चिवडशेट्टी यांनी केले आहे.