महाशिवरात्रीच्या पार्श्वभूमीवर उपवासाचे पदार्थ महाग; सध्याचे दर जाणून घ्या सविस्तर

महाशिवरात्रीच्या पार्श्वभूमीवर उपवासाच्या खाद्यपदार्थांच्या किमतीत मोठी वाढ झाली आहे. वाढत्या महागाईमुळे यंदा 'उपवास करणेही महाग' पडत असल्याची प्रतिक्रिया गृहिणींमधून व्यक्त होत आहे.

• महाशिवरात्रीमुळे उपवासाचे पदार्थ महाग
• सर्वसामान्यांचे आर्थिक बजेट कोलमडले
• सध्याचे दर जाणून घ्या सविस्तर

पिंपरी : महाशिवरात्रीच्या पार्श्वभूमीवर उपवासाच्या खाद्यपदार्थांच्या किमतीत मोठी वाढ झाली आहे. पिंपरी, चिंचवड आणि भोसरी यांसारख्या प्रमुख बाजारपेठांमध्ये शेंगदाणा, भगर, साबुदाणा आणि राजगिरा यांचे दर कडाडले असून, यामुळे सर्वसामान्यांचे आर्थिक बजेट कोलमडले आहे. वाढत्या महागाईमुळे यंदा ‘उपवास करणेही महाग’ पडत असल्याची प्रतिक्रिया गृहिणींमधून व्यक्त होत आहे.

 

शेंगदाण्याच्या दराचा भडका

यंदा शेंगदाण्याने गेल्या २५ वर्षांतील विक्रमी दरवाढ नोंदवली आहे. किरकोळ बाजारात शेंगदाणा चक्क २०० ते २२० रुपये प्रति किलोपर्यंत पोहोचला आहे. अतिवृष्टी, अवकाळी पाऊस आणि काही भागांतील दुष्काळामुळे उत्पादनात सुमारे ६० टक्क्यांची घट झाली आहे. त्यातच परदेशात शेंगदाण्याची निर्यात वाढल्याने स्थानिक बाजारपेठेत टंचाई निर्माण होऊन दराचा भडका उडाला असल्याचे व्यापाऱ्यांचे म्हणणे आहे.

भेसळयुक्त भगरीपासून सावधान!

भगरीचे दर वाढल्याने बाजारात भेसळयुक्त भगर विक्रीला येण्याची शक्यता आहे. या पार्श्वभूमीवर ग्राहकांनी केवळ दर्जेदार आणि खात्रीशीर दुकानातूनच खरेदी करावी, असे आवाहन व्यापाऱ्यांकडून करण्यात येत आहे.

हे सुद्धा वाचा : मोजणी अधिकाऱ्यांना शेतकऱ्यांनी परत पाठवले; ड्रोनच्या माध्यमातून मोजणीचा प्रयत्न हाणून पाडला

तयार फराळाकडे कल, पण गृहिणींचा घरगुती फराळावर भर

वाढत्या किमतींमुळे तयार (रेडिमेड) फराळी पदार्थ, केळी आणि बटाटा चिप्सला मागणी वाढली आहे. मात्र, हॉटेल किंवा दुकानातील तयार पदार्थ महाग पडत असल्याने, पिंपरी-चिंचवडमधील अनेक गृहिणींनी यंदा घरच्या घरीच फराळ बनवण्यास पसंती दिली आहे.

बाजारभाव : प्रति किलो

उत्पादन घट, बाजारातील कमी आवक आणि निर्यातीतील वाढ ही दरवाढीची मुख्य कारणे आहेत. शेंगदाण्याचे उत्पादन यंदा निम्म्यावर आल्याने किमतींवर त्याचा थेट परिणाम झाला आहे. -सुदेश मयेकर, किराणा दुकानदार

भीमाशंकर मंदिर राहणार बंद

श्री क्षेत्र भीमाशंकर मंदिर विकासकामांसाठी बंद असल्यामुळे परिसरातील शेकडो लहान व्यावसायिकांच्या उदरनिर्वाहावर मोठा परिणाम झाला असून, दुकानदारांचे आर्थिक गणित बिघडले आहे. मंदिरातील सभा मंडप व पायरी दर्शन मार्गाच्या कामासाठी ९ जानेवारी २०२६ पासून पुढील तीन महिने मंदिर बंद राहणार असल्याचे प्रशासनाने जाहीर केले होते. त्या नुसार सध्या भाविकांची ये-जा पूर्णपणे थांबली आहे.